Ibulu 10

Ncese wvù Jisos to geɛ nu ɛ jo wase bvudvuu bvu boncese le bocii

1 [a]Bonci bo Muses e to nu kɛ lo kenjiŋjiŋ ke mwɛɛm mvù jee mvù to nu keeke enu le. Kɛ bó to nu wase cɛɛy cɛɛy mwɛɛm mvù to nu keeke enu kɛ. Ɛ bó mum no shee gee boncese ɛ̂ kelum ɛ̂ kelum, sɛ ɛ̀ nulo ɛ́ boncese bodvu ege ɛ́ bonyii bò benci too fô Nyo' le eyuule gɛne mɛɛse ŋkuuŋ. 2 Ɛ́ ɛ̀ to nu lɛ boncese bodvu nulo ege ɛ́ bó eyuule nonɛn, tu kɛ bó to bee ebvuu eshee egee boncese bó le bó le kɛ, njefo bonyii bò bunlee Nyo' to bee keenu ɛ bó ɛ cukɛ wase bibefɛ bibole kaŋ mwaaŋ, ɛ mvuntelem mvubole yaa bvuu saake bó yî bibefɛ le kɛ. 3 Geenɛn, boncese bò bó to gee ɛ̂ kelum ɛ̂ kelum ban to kaa gee ɛ bonyii kumyi lo bibefɛ bibole. 4 [~2~]Ɛ fí nu nonɛn, njefo kɛ ɛ̀ nu naa lo ɛ́ ɛlɛmɛ ke bona' [~3~] bô ke bíe le ecukɛ bibefɛ bi wee le kɛ. 5 [~4~]Ɛ̀ nɛɛ fiɛɛ fì to geɛ ɛ Klistu dioo to fokuse fɛn gay ɛ̂ Nyo' lɛ,

“Kɛ wo kɛŋke shiee fô boncese bò bó gee bô nyám e,

noo fô mwɛɛm mvù bó nyaa ɛ̂ wo le kɛ.

Wo nu ɛ nya me ɛ ɛ̀ nu bô ye lɛ me eŋge ncese dvú.

6 Kɛ nyám yì bó nyaa ɛ bó tone gee boncese dvú fô wo le,

noo mwɛɛm mvù bó nyaa ɛ bó gee boncese dvú

keecukɛ bibefɛ bi bonyii le baa cim ege ɛ́ wo eyuuke njoŋ kɛ.

7 Me ɛ mum ɛ ŋgay lɛ,

‘O Nyo' taa eyɛn, me nu ɛ nto keeŋge fiɛɛ fì wo shieele,

kɛ no bó saŋɛɛ ɛkumɛ me ɛ̂ Ŋwa' wo le.’ ”

8 Wvú to yaw gay ɛ̂ Nyo' lɛ,

“Kɛ wo baa kɛŋke shiee kɛnɛɛ yuuke njoŋ bô boncese

noo nnyá yì bó nyaa ɛ̂ wo noo nyám yì bó nyaa

ɛ bó tone gee boncese dvú fô wo le,

noo mwɛɛm mvù bó nyaa ɛ bó gee boncese dvú

keecukɛ bibefɛ bi bonyii le kɛ.”

Ɛ mwɛɛm mvun nu ɛ bó to gee kɛ naa bii no nci gomte. 9 No wvú gay nonɛn, mum bise fó gay ɛ̂ Nyo' lɛ,

“Taa eyɛn, me nu ɛ nto keeŋge fiɛɛ fì wo shieele.”

Wvú to jeme nonɛn, mum lɛse boncese bo boyvuum keegɛɛ wvu fwɛ. 10 [~5~]No Jisos Klistu to geɛ fiɛɛ fì Nyo' to shieele lɛ wvú ege, ɛ ye ye yì wvú to nyaɛ kaŋ mwaaŋ ɛ fí ka lo nonɛn, ge ɛ beene mum no yuule. 11 [~6~]Cee ncese tfuu ké no gɛne leeme fô bvudvuu bwew bvu lemme le ɛdiuw ɛcii gee boncese biinene bokaŋ e bokaŋ e, sɛ boncese bodvu nulo ecake bibefɛ bi bonyii le ŋkuuŋ. 12 [~7~]Geenɛn Klistu to nu ɛ ge we ncese kɛ kaŋ mwaaŋ ɛ wvú mum kocɛn wvù ecake bibefɛ bi bonyii le kemakaa. No wvú geɛ nonɛn mum shii ɛ̂ ɛbo ke ɛcɛɛy ke Nyo' le. 13 [~8~]Wvú nu fó ɛ kɛw sekekiɛ le, cɛyte egɛn ebuy seke Nyo' ke ejike bonyii bew bo bvuban e diɛwɛ kedvuushɛɛ ke bikaa biew e ɛ́ wvú etome bikaa yî bó le. 14 Ncese we wvù mwaaŋ wvun nu ɛ ge bonyii bò wvú gee ɛ bó yuule, ɛ mum ɛ no yuule tɛn ɛ̂ Nyo' ɛjise gɛne mɛɛse sekecii. 15 Keyoy ke Yuule jemyi tɛn ɛ̂ beene tomte fiɛɛ fin. Kí to nu ɛ yaw gay lɛ,

16 [~9~]“Tata gayte lɛ, ɛ̀ nɛɛ moŋkan man

mò me nu ŋke eŋgbwo bee bó

ɛjim jo ɛdiuw yoya le:

Me nu ŋke eŋgɛɛ bonci bem ɛ̂ mvuntelem mvubole,

embvuu ensaŋ ɛ̂ boŋkpwawcɛ bobole.”

17 No wvú gay nonɛn bvuu bise lɛ,

“Kɛ me mbɛɛ ŋke embvuu eŋkpwawci bibefɛ bibole

kɛnɛɛ gee dibole dì befe kɛ”

18 Fí ɛ mum ɛ no nu lɛ ɛ́ bó lɛɛshi wase bibefɛ bi bonyii le, tu kɛ shiee mwɛɛm mvù bó enyaa ɛ bó gee boncese dvú keecukɛ bibefɛ bi bonyii le bvuu bɛɛ kɛ.

Beene ebencì too nceencee mbew Nyo' le

19 [~10~]Boom bo bwɛɛm e, fí ɛ mum ɛ no nu lɛ ɛlɛmɛ ke Jisos e nu ɛ yene wase je ɛ beene nulo eley keseen yaa fane kɛ, egɛn fô Bvudvuu bwɛ bvù looci Yuule naa ntay e. 20 [~11~]Beene nulo efey ɛ̂ je yi fiɛ yì nyaa nshii le yì Jisos to yen'yɛɛ fô beene le. Wvú to yene je yin bô ye ye, ɛ fí mum no nu lɛ wvú nu ɛ cake wase ndvu yì bó to shɛŋkɛɛ baŋ bvudvuu bvudvu dvú. 21 [~12~]Beene kɛŋke wase cee ncese wvu baay wvù taale fô yew Nyo' le yì ɛ̀ nu bonyii bew. 22 [~13~]No mwɛɛm mvun nu nonɛn, beene emum ebencì too mbew Nyo' le bô fitele fimwaaŋ ɛ beene ɛ lese fitele yî ye le ficii nu sɛ kemaŋɛn. Beene ebencì njefo bó nu ɛ miawmiaw wase mvuntelem mvusɛɛbeene bô ɛlɛmɛ ke Klistu le mvú ɛ no yuule, yaa bvuu saake beene yî fiɛɛ le kɛ. Ɛ beene bvuu nu tɛn ɛ bó ɛ cukɛ wase ye yesebeene bô joo yì yuule. 23 [~14~]Beene eleemè tɛmyi ntay yî fiɛɛ fì beene taale fwe yî dvú le fì beene ké no jemyi ɛ̂ bonyii ɛkumɛ fí le. Fo beene etuwtenè kɛ, njefo wee wvù kawɛɛ beene leeme yî diɛw ye le. 24 [~15~]Beene egomtè tɛn je keeyvuwse mvuntelem mvu wee noo wee le keekoŋene noo keegee mwɛɛm mvù jee. 25 Fo beene ecin'yì keetoo yî kentaashɛ le diɛwɛ no bonyii bomew nu ɛ nɛ wase ɛ no gee kɛ. Beene eyvuwsè lo mvuntelem mvusɛɛbeene, ɛfey mvunciim no beene yɛne wase ɛ diuu dì Tata wesebeene nu ke ekase eto nu wase nceencee.

26 [~16~]Beene ekeè lɛ ɛ́ beene nɛ ɛ bvuu ɛ no gee bibefɛ, gee kee, ɛ beene nu ɛ bó ɛ fiisɛn wase je yi kecɛɛy, ɛ́ beene no keè lɛ kɛ ncese wvumvu bvuu nu dvú wvù ɛ̀ nulo ɛ́ bó ebvuu ege fô bibefɛ bisɛɛbeene le kɛ. 27 [~17~]Ɛ́ wee gee nonɛn, ɛ́ wvú no cɛyte kɛ wase bô nfan ɛ ɛ̀ nu nsaw Nyo' noo ŋguy wvù befe wvù nu ke eyɛse lo bonyii bo bvuban e bo Nyo' le. 28 [~18~]Wee ké ŋgoyte nci Muses, ɛ́ bonyii eleem bofɛɛ kɛnɛɛ botɛte etom lɛ bó nu ɛ yɛn fiɛɛ fì wvú ge le, ɛ́ nsaw mum koo mwɛtɛn, ɛ bó mum yu lo wvú yaa koole yii kɛ. 29 [~19~]Ɛ́ fí nu nonɛn, tu ben kpwaake lɛ wee wvù joo Waa Nyo' ɛkuse, joo ɛlɛmɛ ke moŋkan mò Nyo' gbwolɛɛ keecukɛ wvú dvú ɛ́ wvú eyuule lɛ kí nu fiɛɛ fi ɛcici, nan'yi tɛn Keyoy ke Yuule kè too bô mbuwma Nyo', nu ɛ kfuu ŋgɛw wvù wvuwɛ wee nu ke ekɛŋkɛ nu ke enu nɛɛ? 30 [~20~]We ŋgɛw nu ke ebɛmte lo njefo beene kee wee wvù to gayɛɛ lɛ,

“Ɛ̀ nu me wvù nu ke etfuse ɛnvukɛ,

ɛ ɛ̀ nu me wvù nu ke enya nlawma wvubo.”

Ɛ wvú ɛ bvuu ɛ gay lɛ,

“Ɛ̀ nu me wvù Tata wvù nu ke esaw bonyii bem.”

31 Ɛ̀ nu fiɛɛ fi nfan e baay keegbwe can Nyo' wvù kɛŋke nshii le.

32 [~21~]Geenɛn, ben ekumyì ɛdiuw yo fwe yò bó to yuusɛɛ ben yî fiɛɛ fi Nyo' le. Ben to nu ɛ kuu shém no diuu bô boŋgɛw bò to too fô ben e. 33 [~22~]Kefew kemew e nu ɛ bonyii to ké no nan'yi bvuu nyɛwle bô ben ya le. Kefew kemew e, ɛ ben no leeme ɛjim jo bonyii bò bó nyaa tɛn ŋgɛw ɛ̂ bó ɛ̂ yiyɛ je le. 34 [~23~]Ben to ké no koole shen bô boba bonyii bò nu yî ncaw e, fii bó. Bó to ké loo mwɛɛm mvunɛn, ɛ ben cinɛ kɛ dvú no yuuke ɛ ɛ̀ nu njoŋ, njefo ben kee lɛ ben kɛŋke mwɛɛm mvumew mvù fele mvumwɛ ɛ ɛ̀ nu mvù nu ke emɛy nu sekecii. 35 [~24~]Nonɛn, fo ben ecinɛ fiɛɛ fì ben leeme wase yî dvú le kɛ, njefo ɛ̀ nu fiɛɛ ɛ fí kɛŋke nlawma wvù kuuke. 36 Fiɛɛ fi shiee le fô ben e nu lɛ ben esuu shém wvu lɛ ben nulo egee ɛ ɛ̀ nu fiɛɛ fì Nyo' shieele, ɛ́ ben ke emum ekɛŋkɛ fiɛɛ fì wvú nu ɛ kaw beene dvú. 37 [~25~]Bó nu ɛ saŋ lɛ,

“Ɛ̀ shɛɛte kɛ wase caan ɛ́ wee wvù nu keeto emum efɛse.

Kɛ wvú nu emoocɛ kɛ.

38 [~26~]Wee wɛm wvu teytey nu ke ekɛŋkɛ nshii

nje fitele fì wvú lese yî yɛm e.

Geenɛn ɛ́ wvú nɛ lo ɛ no fane ɛ tfuw bikaa,

fitele fiem saa ejee bô wvú kɛ.”

39 Geenɛn, kɛ beene nu boba bò tfuuke bikaa bò nu ke ela kɛ. Beene nu fisɛɛbeene bonyii bò nu ɛ lese fitele yî Nyo' le bò biyoy bibole nu ke eboy.

<- Ibulu 9 Ibulu 11 ->