1 “Ipan nopa tonali nijtlapos se ameli campa meya miyac atl para nochi iteipa ixhuihua David huan nochi Jerusalén ehuani. Huan nopa atl quinpajpacas tlen inintlajtlacolhua huan tlen nochi tlamantli tlen ica moijtlacojtoque. 2 Ipan nopa tonali niquintlamiixpolihuiltis nochi totiotzitzi huan tlaixcopincayome tlen quinhueyichihuaj ipan nopa tlali huan ayoc quema quiilnamiquise inintoca. Nojquiya niquintlamiixpolihuiltis nopa tlacajcayajca tiocamanalohuani huan nochi nopa ajacame tlen Axcualtlacatl tlen quinyacana.” Queja nopa quiijtohua TOTECO Tlen Quinyacana Ielhuicac Ejcahua Ma Tlatlanitij. 3 “Huan intla noja motlalanas se huan camatis queja se tiocamanalojquetl, itata huan inana quiilhuise: ‘Monequi timiquis pampa tiistlacatitoc. Tiquijtohua para TOTECO mitzmacatoc motlajtol, pero yajaya ax quiijtojtoc.’ Huan ipan nopa tlalochtli itatahua quicuaxahuase ica se huehueyac cuatlamintli huan quimictise.

4 “Ipan nopa tonali nochi tlen quiitase ipan tlanextili queja tiocamanalohuani mopinahuase pampa quimatise para ax melahuac huala tlen na. Axaca mohueyimatis huan quiijtos para yajaya se tiocamanalojquetl pampa quimatis para ax neli. Huan ayoc aqui quinequis tlacajcayahuas huan moquentis nopa yoyomitl tlen fiero queja quemantzi moquentíaj tiocamanalohuani tlen melahuac ipan ni tonali. 5 Huan teipa se tlacatl tlen quiselis tlajtoli tlen ax melahuac, quiijtos: ‘Ax na nitiocamanalojquetl. Na se nimilchijquetl. Hasta quema noja eliyaya nioquichpil, san nitequiti mila.’

6 “Huan se quiilhuis: ‘Huajca ¿para tlen lijlipintic moma?’ Huan yajaya quiijtos: ‘Ya ni pampa nechcocojque ipan ininchaj nohuampoyohua.’ ”