16
1 Umuntu angawabumba amacebo ngenhliziyo yakhe,
kodwa uThixo nguye omupha amazwi okuwachaza.
2 Umuntu angabona sengathi zonke izindlela zakhe ziqondile,
kodwa uThixo uyazihlolisisa zonke injongo zomuntu.
3 Nikela kuThixo konke okwenzayo,
kuzaphumelelisa wonke amacebo akho.
4 UThixo uzilungisele isiphetho sakho konke
kanye lababi usuku lokubhujiswa.
5 UThixo uyabazonda bonke abazikhukhumezayo.
Ngempela kabayikuphepha ukujeziswa.
6 Isono siyahlawulelwa ngothando langokwethembeka;
ngokwesaba uThixo umuntu uyaphepha ebubini.
7 Nxa izindlela zomuntu zimthokozisa uThixo ,
uyenza lezitha zakhe zihlalisane laye ngokuthula.
8 Kungcono ukuzuza okulutshwana ngendlela elungileyo
kulokuzuza okunengi ngobuqili.
9 Umuntu angalungisa indlela yakhe engqondweni yakhe,
kodwa uThixo nguye olawula izinyathelo zakhe.
10 Izindebe zombusi zikhuluma kungathi lidlozi
ngakho umlomo wakhe kawungaphambuli umthetho.
11 Izilinganiso eziqondileyo zivela kuThixo ;
zonke izisindo ezisemgodleni zenziwa nguye.
12 Amakhosi ayakuzonda ukwenza okubi,
ngoba isihlalo sobukhosi sakhelwe phezu kokulunga.
13 Amakhosi athokoziswa yizindebe ezithembekileyo;
ayamazisa umuntu okhuluma iqiniso.
14 Ulaka lwenkosi luyisithunywa sokufa,
kodwa umuntu ohlakaniphileyo uyaluxolisa.
15 Nxa ubuso benkosi bulentokozo, kukhomba ukuphila;
ukuthandwa yiyo kunjengeyezi lezulu entwasa.
16 Kungcono kangakanani ukuzuza ukuhlakanipha kulegolide,
ukukhetha ukuzwisisa kulesiliva!
17 Umgwaqo womuntu oqotho uceza ububi;
lowo onanzelelayo indlela yakhe unanzelela impilo yakhe.
18 Ukuzigqaja kwandulela ukubhujiswa,
umoya omubi ulandelwa yikuwa.
19 Kungcono umoya othobekileyo lokuhlala kwabancindezelweyo
kulokwabelana impango labazigqajayo.
20 Lowo olalela izeluleko uyaphumelela,
njalo ubusisiwe lowo othemba uThixo .
21 Abahlakaniphileyo enhliziyweni kuthiwa bayaqedisisa,
njalo amazwi amnandi aqinisa izeluleko.
22 Ukuzwisisa kungumthombo wokuphila kulabo abalakho,
kodwa ubuwula buletha isijeziso eziwuleni.
23 Inhliziyo yomuntu ohlakaniphileyo ikhokhela umlomo wakhe,
kanti lezindebe zakhe zikhuthaza izeluleko.
24 Amazwi amahle alikhekheba loluju,
amnandi emphefumulweni njalo ayelapha emathanjeni.
25 Kukhona indlela ebonakala ilungile emuntwini,
kodwa isiphetho sayo siyikufa.
26 Isisebenzi sifuqwa liphango ukusebenza kakhulu;
ukulamba yikho okusikhuthazayo.
27 Isixhwali siceba ububi,
lenkulumo yaso injengomlilo ohaqazayo.
28 Umuntu ongelangqondo udaza inkani,
njalo lomuntu onyeyayo wehlukanisa abangane.
29 Umuntu wodlakela uhuga umakhelwane wakhe
amholele endleleni engalunganga.
30 Lowo ofica ngelihlo lakhe uceba izibozi;
lowo oluma indebe zakhe uqonde ububi.
31 Inwele ezimhlophe zingumqhele wobukhulu,
zizuzwa ngempilo elungileyo.
32 Ungcono umuntu obekezelayo kuleqhawe,
umuntu ozinqandayo ulaka lwakhe kulalowo othumba idolobho.
33 Inkatho iphoselwa enkundleni,
kodwa isinqumo sayo sisemandleni kaThixo .