UMatewu 15

Okuhlanzekileyo Lokungahlanzekanga

1 Ngalesosikhathi abanye abaFarisi labafundisi bomthetho beza kuJesu bevela eJerusalema bambuza bathi, 2 “Kungani abafundi bakho besephula isiko labadala na? Kabagezi izandla zabo bengakadli!”

3 UJesu waphendula wathi, “Kungani lina lisephula umlayo kaNkulunkulu ngenxa yamasiko enu na? 4 Phela uNkulunkulu wathi, ‘Hlonipha uyihlo lonyoko’[a]njalo ‘Lowo othuka uyise loba unina ufanele ukubulawa.’[b] 5 Kodwa lina lithi nxa umuntu esithi lokho obekungaba lusizo kuyise kumbe unina kuphawulelwe uNkulunkulu, 6 akasamelanga ahloniphe uyise lonina ngakho. Ngaleyondlela lichitha ilizwi likaNkulunkulu ngenxa yesiko lenu. 7 Lina bazenzisi! U-Isaya wayeqinisile aze aphrofithe ngani esithi:

8 ‘Lababantu bangidumisa ngezindebe zabo,

kodwa inhliziyo zabo zikhatshana lami.

9 Bangikhonza ngeze;

imfundiso yabo yimithetho yabantu.’[c]”

10 UJesu wabizela ixuku labantu kuye wathi, “Lalelani lizwisise. 11 Lokho okungena emlonyeni womuntu ‘kakumngcolisi’ kodwa lokho okuphuma emlonyeni wakhe yikho ‘okumngcolisayo.’ ”

12 Abafundi basebesiza kuye bambuza bathi, “Uyakwazi yini ukuthi abaFarisi kubakhubile ukuzwa lokhu?”

13 Waphendula wathi, “Zonke izihlahla ezingahlanyelwanga nguBaba osezulwini zizasitshunwa lezimpande zazo. 14 Bayekeleni; ngabakhokheli abazimpumputhe. Nxa impumputhe ihola impumputhe zombili zizawela egodini.”

15 UPhethro wathi, “Sichasisele umzekeliso lowo.”

16 UJesu wababuza wathi, “Lilokhu lingelakuqedisisa na? 17 Kaliboni yini ukuthi noma yini engena emlonyeni iya esiswini besekuphuma emzimbeni? 18 Kodwa lezozinto eziphuma emlonyeni womuntu zivela enhliziyweni yizo ezenza umuntu angcole. 19 Ngoba enhliziyweni kuphuma imicabango emibi, ukubulala, ukufeba, ukuhlobonga, ubusela, ukufakaza amanga, ukunyeya lokuhlambaza. 20 Lokhu yikho okwenza umuntu angcole, kodwa ukudla ngezandla ezingagezwanga kakumenzi angcole.”

Ukholo Lowesifazane WaseKhenani

21 Esuka kuleyondawo uJesu waya emangweni waseThire leSidoni. 22 Umfazi ongumKhenani wakuleyondawo weza kuye ezokhala esithi, “Nkosi, Ndodana kaDavida, ake ungihawukele! Indodakazi yami ithwele nzima, ihlutshwa ngamadimoni.”

23 UJesu kazange amphendule. Ngakho abafundi bakhe beza kuye bamkhuthaza bathi, “Mxotshe, nangu uselokhu ememeza esilandela.”

24 Waphendula wathi, “Ngathunywa kuphela ezimvini ezilahlekileyo zako-Israyeli.”

25 Owesifazane lowo weza waguqa phambi kwakhe wathi, “Nkosi, ake ungisize.”

26 Waphendula uJesu wathi, “Kakulunganga ukuthatha isinkwa sabantwana usiphosele izinja.”

27 Owesifazane wathi, “Yebo Nkosi, angithi izinja ziyayidla imvuthu eziwa etafuleni yabaninizo.”

28 UJesu wasephendula wathi, “Nkosazana, ulokukholwa okukhulu! Isicelo sakho sesamukelwe.” Indodakazi yakhe yahle yasila ngalesosikhathi.

UJesu Usuthisa Izinkulungwane Ezine

29 UJesu wasuka lapho wehla egudlana loLwandle lwaseGalile. Wasekhwela entabeni wahlala phansi. 30 Kweza kuye amaxuku amakhulu abantu eletha abaqhulayo, iziphofu, izigoga, izimungulu labanye abanengi, bababeka phambi kwakhe; wabasilisa. 31 Abantu bamangala ukubona izimungulu sezikhuluma, izigoga sezitshwaphulukile, abaqhugezelayo sebezihambela leziphofu sezibona. Bamdumisa uNkulunkulu ka-Israyeli.

32 UJesu wabiza abafundi bakhe wathi, “Ngibazwela usizi lababantu; sebehlale lami insuku ezintathu bengadlanga lutho. Angifuni kubakhulula belambile funa bayathe endleleni.”

33 Abafundi bakhe bamphendula bathi, “Singakuthatha ngaphi ukudla okwaneleyo endaweni ekhatshana kanje ukuba sisuthise ixuku elingaka na?”

34 UJesu wabuza wathi, “Lilezinkwa ezingaki?”

Bathi, “Eziyisikhombisa lenhlanzi ezincane ezimbalwa.”

35 Wasetshela ixuku labantu ukuba lihlale phansi. 36 Wasethatha lezozinkwa eziyisikhombisa lenhlanzi, kwathi esebongile, wazihlephula waziqhubela abafundi, labo bazinika abantu. 37 Bonke badla basutha. Ngemva kwalokho abafundi babutha imvuthu kwagcwala izitsha eziyisikhombisa. 38 Inani lalabo abadlayo lalizinkulungwane ezine kungabalwa abafazi labantwana. 39 UJesu eselikhulule ixuku labantu, wangena esikepeni waya emangweni waseMagadani.

<- UMatewu 14 UMatewu 16 ->