UMtshumayeli 2

Ukuzithokozisa Kakusizi Lutho

1 Ngacabanga ngenhliziyo ngathi, “Kulungile, ake ngizame ukuzithokozisa ngibone ingabe kuhle yini.” Kodwa lokho lakho kwakhanya kuyize. 2 Ngathi, “Ukuhleka kuyibuthutha. Ukuzithokozisa khona kusizani?” 3 Ngazama ukuzithabisa ngewayini, ngisenza ubuwula kodwa ingqondo yami ilokhu ingikhokhela ngokuhlakanipha. Ngangifuna ukubona ukuthi kuyini okumlungeleyo umuntu ukuthi akwenze lapha ngaphansi kwezulu ngezinsukwana lezo zokuphila kwakhe.

4 Ngaqalisa imisebenzi emikhulu: ngazakhela izindlu ngahlanyela amavini. 5 Ngasungula izivande lezigcawu zokubukwa ngahlanyela kuzo yonke imihlobo yezihlahla lezithelo. 6 Ngenza iziziba zamanzi okuthelela izihlahla ezazikhula kuhle. 7 Ngathenga izigqili zesilisa lezesifazane, ngilezinye futhi izigqili ezazalelwa emzini wami. Ngaba lemihlambihlambi yenkomo lezimvu okwedlula bonke abake babakhona eJerusalema ngaphambi kwami. 8 Ngabuthelela isiliva legolide, kanye lempahla yamakhosi eligugu ivela ezigodini. Ngazidingela abahlabeleli besilisa labesifazane, lesithembo esikhulu, khona okujabulisa inhliziyo yendoda. 9 Ngaba mkhulu ngokwedluleyo kulaloba ngubani owaba seJerusalema ngaphambi kwami. Phakathi kwayo yonke inyakanyaka le ukuhlakanipha kwami kwahlala kukhona.

10 Angizincitshanga lutho olwalufiswa ngamehlo ami;

inhliziyo yami angiyalelanga layiphi intokozo.

Inhliziyo yami yathokoza ngawo wonke umsebenzi wami,

lokhu kwaba ngumvuzo wezithukuthuku zami.

11 Kanti lanxa ngahlolisisa konke okwenziwa yizandla zami

lalokho engangibhensela ukukuzuza,

konke kwakuyize, yikuxotshana lomoya;

kwakungela nzuzo ngaphansi kwelanga.

Ukuhlakanipha Lobuwula Kuyize

12 Ngasengigxilisa imicabango yami ekuhlolisiseni ukuhlakanipha,

njalo lobuhlanya kanye lobuwula.

Kambe angenzani othatha isikhundla senkosi

ngaphandle kwalokho obekuvele sekwenziwe?

13 Ngabona ukuhlakanipha kungcono kulobuwula,

njengokukhanya kungcono kulomnyama.

14 Umuntu ohlakaniphileyo ulamehlo ekhanda,

ikanti isiwula sihamba ebumnyameni;

kodwa ngacina sengibona

ukuthi isiphetho sabo bonke sinye.

15 Ngasengicabanga enhliziyweni yami ngathi,

“Isiphetho sesiwula sizangehlela lami.

Pho, ngizuzani ngokuhlakanipha?”

Ngathi ngenhliziyo yami,

“Lokhu lakho kuyize.”

16 Ngoba umuntu ohlakaniphileyo, njengesiwula,

akazukukhunjulwa kokuphela;

ngezinsuku ezizayo bobabili bazakhohlakala.

Njengesiwula, umuntu ohlakaniphileyo laye uzakufa!

Ukusebenza Nzima Kuyize

17 Yikho-ke ngasengikuzonda ukuphila, ngoba umsebenzi owenziwayo ngaphansi kwelanga wawubuhlungu kimi. Wonke uyize, yikuxotshana lomoya. 18 Ngazizonda zonke izinto engangiziginqele ngaphansi kwelanga, ngoba ngimele ngitshiyele lowo oza ngemva kwami. 19 Njalo ngubani owaziyo ingabe uzakuba ngumuntu ohlakaniphileyo loba isiwula? Kodwa nguye ozalawula wonke umsebenzi wamaginqo ami lobungcitshi bami. Lokhu lakho kuyize. 20 Ngalokho inhliziyo yami yaqalisa ukuphela amandla ngikhumbula konke lokho engakuginqelayo ngaphansi kwelanga. 21 Ngoba umuntu angenza umsebenzi wakhe ngokuhlakanipha, ngolwazi langamasu, kodwa utshiyela konke alakho komunye ongazange akusebenzele. Lokhu lakho kuyize, kungumnyama. 22 Umuntu uzuzani ngakho konke ukusebenza nzima langokutshikatshika kabuhlungu lapha emhlabeni? 23 Ubuhlungu umsebenzi wakhe awenzayo kuzozonke insuku zokuphila kwakhe; kwala kanye lebusuku umkhumbulo wakhe kawuphumuli. Lokhu lakho kuyize.

24 Akukho okungcono emuntwini ngaphandle kokuthi adle, anathe njalo azuze ukusuthiseka ngomsebenzi wakhe. Lokhu lakho ngiyakubona ukuthi kuvela kuNkulunkulu, 25 ngoba ngaphandle kwakhe ngubani ongadla kumbe azuze intokozo? 26 Kulowo omthokozisayo uNkulunkulu umupha ukuhlakanipha, ulwazi lokuthaba, kodwa koyisoni umupha umsebenzi wokuqoqa lokulonda inotho ukuze ayiphe lowo othokozisa uNkulunkulu. Lokhu lakho kuyize, yikuxotshana lomoya.

<- UMtshumayeli 1 UMtshumayeli 3 ->