Aleebo̱kaapo̱tɔ 18

Ane̱ŋ ne̱ Babilɔŋ maŋ a kpuri‑o

1 Amo̱‑ɔ kamɛɛ‑ɔ, ne̱ mo̱ a be̱e̱ ŋu Wuribware̱ kabɔɔ ko̱, na ɔɔ le̱e̱ so̱so̱ ɔ ba. O de ke̱yaale̱ŋ bwe̱e̱tɔ ke̱tɔ ke̱maa se̱. Ne̱ ane̱ŋ ne̱ ɔ to̱re̱ se̱ bwe̱e̱tɔ bwe̱e̱tɔ‑ɔ se̱‑ɔ, ɔɔ sa ne̱ swe̱e̱re̱ se̱ pɛɛɛ a laŋŋe̱‑rɔ. 2 Ne̱ ɔɔ faa‑rɔ keŋkeŋ fe̱yɛ,

“Oo kpuri. Babilɔŋ maŋ dabe̱ a kpuri ooo.

Mbe̱yɔmɔ fe̱raa, oo kii ke̱taakpaŋ

ne̱ ibrisi na ntimani naa‑rɔ‑ɔ,

mfe̱ŋ ne̱ mbo̱gyii ne̱ ba kisi bamo̱ ko̱wo̱‑ɔ bo̱.[a]

3 A le̱e̱ fe̱yɛ kaye̱‑rɔ nde̱ se̱ awuye pɛɛɛ

a nuu opurimakye̱e̱ a nta‑ɔ.

Mò̱ nta amo̱ a sa ne̱ kaye̱‑rɔ awure pɛɛɛ

a kpa mò̱ bwe̱e̱tɔ.

Ne̱ bamo̱ aa mò̱ a di,

ne̱ baa waa kakye̱e̱kpa.

Ne̱ mò̱ tɔkpa ne̱ ɔ mo̱ŋ de kɛɛ‑ɔ

a sa ne̱ kaye̱‑rɔ ayawo̱gyipo̱ a nya bamo̱ e̱ye̱e̱.”

4 Ne̱ mo̱ a be̱e̱ nu bo̱re̱ ko̱ a le̱e̱ so̱so̱ fe̱yɛ,

“Mo̱ ase̱sɛ eee, mo̱nꞌ le̱e̱ ba ooo, mo̱nꞌ le̱e̱ mò̱ ase̱ ba,

na mo̱ne̱ ma nya waa mò̱ e̱bɔye̱‑ɔ e̱ko̱.[b]

Mo̱ne̱ e̱ mo̱ŋ le̱e̱ mò̱ ase̱, ke̱se̱bɔgyiiri

ne̱ Wuribware̱ e̱ sa mò̱‑ɔ e̱ kyaŋŋaa mo̱ne̱ eee.

5 A le̱e̱ fe̱yɛ mò̱ e̱bɔye̱ da e̱ dɔŋ abɛɛ se̱,

fe̱yɛ le̱e̱ mfe̱e̱ ya bo̱ fo̱ so̱so̱‑ɔ.

Ne̱ Wuribware̱ be̱e̱ o nyiŋŋi mò̱ e̱kpa bɔye̱

ne̱ ɔɔ gya se̱‑ɔ se̱.

6 Mo̱nꞌ waa mò̱ fe̱yɛ ane̱ŋ ne̱ ɔɔ waa mo̱ne̱‑ɔ dɛɛ.

Mo̱nꞌ waa iluwi e̱nyɔ bo̱ teere ane̱ŋ ne̱ ɔɔ waa mo̱ne̱‑ɔ.

Mo̱nꞌ taa nta ne̱ n du preepree

iluwi e̱nyɔ n kyo̱ŋ mmo̱

ne̱ ɔɔ sa mo̱ne̱ ne̱ mo̱ne̱ a nuu‑o.

Mo̱nꞌ sa mò̱ na o nuu.

7 Mo̱nꞌ sa a o ŋu ase̱ŋ ne̱ a kyɔ ke̱dabe̱

fe̱yɛ ane̱ŋ ne̱ ɔɔ dɛɛ bu mò̱ e̱ye̱e̱ ke̱dabe̱‑ɔ.

Na mo̱nꞌ waa mò̱ bo̱ro̱kɔɔne̱ ne̱ ɔ ta fe̱yɛ

kɔne̱ ne̱ ɔɔ dɛɛ gyi‑o.

A le̱e̱ fe̱yɛ ɔɔ tɔwe̱ gywii mò̱ e̱ye̱e̱ saŋ amo̱ fe̱yɛ,

‘Mo̱nꞌ ke̱e̱ mo̱ mfe̱e̱, mo̱, wurekye̱e̱.

Ma kii kpenlekye̱e̱, na n su kale daa.

Mo̱ bo̱re̱‑rɔ maa duŋwi mo̱ kake ko̱ se̱ daa.’

8 Amo̱se̱‑ɔ kake ko̱ŋko̱ ne̱ ase̱ŋ e̱ to̱ mò̱.

Ase̱sɛ bwe̱e̱tɔ i wu, na bamo̱ ne̱ ba saŋ‑ɔ su kale,

na ako̱ŋ mɔɔ bamo̱, na de̱e̱kpa kywɛɛ mò̱ e̱lɔŋ,

a le̱e̱ fe̱yɛ Nyaŋpe̱ Wuribware̱

ɔse̱ŋgyipo̱‑ɔ de e̱le̱ŋ bwe̱e̱tɔ.”

9 Awure ne̱ bamo̱ aa mò̱ a di, ne̱ baa waa kakye̱e̱kpa, ne̱ baa gyi mò̱ kɔne̱‑ɔ ya ŋu de̱e̱kpa ne̱ ɔ kywɛɛ mò̱ maŋ‑ɔ e̱bɔɔre̱e̱, ba su a bo̱ sa mò̱. 10 Ba ye̱re̱ ke̱fɔ ke̱fɔ, a le̱e̱ fe̱yɛ bo̱ maa kpa a bo̱ gyi awo̱re̱fɔɔ‑ɔ ako̱. Na bo̱ tɔwe̱ fe̱yɛ,

“Daane̱ke̱na! Daane̱ke̱na!

Babilɔŋ maŋ dabe̱ mumwii mɔ,

dɔŋhwe̱re̱e̱ ko̱ŋko̱‑rɔ kpeŋ ne̱ fo̱ a kpuri!”

11 Na swe̱e̱re̱ se̱ a ayawo̱gyipo̱‑ɔ mɔ su mò̱ kale, a le̱e̱ fe̱yɛ ɔko̱ mo̱ŋ lɛɛ ɔ bo̱ maŋ amo̱‑rɔ, na ɔ sɔɔ bamo̱ atɔ. 12 Ɔko̱ mo̱ŋ lɛɛ ɔ bo̱‑rɔ ne̱ ɔ sɔɔ bamo̱ atanne̱ pipee na afufuri na abu yawo̱ le̱ŋsɛ na akukye‑ro ataŋgyi dame̱naŋsɛ na kyefuri ŋkpaŋ na awaagya ne̱ a du fe̱yɛ lɔŋkɔnkyuronkyu‑o, na amo̱ ne̱ aa pee kpɛye̱ kpɛye̱ kpɛye̱‑ɔ, na atɔ dame̱naŋsɛ yawo̱ le̱ŋsɛ ne̱ baa ba ayii ko̱ na kayo̱waa na agye̱re̱tɔ na ko̱nne̱ e̱be̱re̱ na afo̱re̱ fufuri gyorigyorisɛ bo̱ waa‑ɔ. 13 Na e̱fo̱nɔ na nyoŋku na kakyanne̱ na ndwii na ko̱raa e̱wo̱re̱se̱ e̱wo̱re̱se̱ na nta na mfɔ na mpu na yaabraa na e̱naate̱ na e̱sanne̱ na e̱kpaŋa na itireelaa na anya pɛɛɛ i sii, na a ma nya asɔɔpo̱.

14 Ayawo̱gyipo̱ e̱ tɔwe̱ a bo̱ gywii mò̱ fe̱yɛ,

“Atɔ timaa ne̱ fo̱ e̱ kpa‑ɔ pɛɛɛ a fo̱ fo̱ se̱.

Fo̱ kapo̱tɛɛ na atɔ dame̱naŋsɛ pɛɛɛ a fo̱ fo̱ se̱.

Fo̱ maa lɛɛ ŋu amo̱, daa.”

15 Ayawo̱gyipo̱ ne̱ baa gyi yawo̱ maŋ amo̱‑rɔ nya atanne̱ bwe̱e̱tɔ‑ɔ e̱ ye̱re̱ ke̱fɔ ke̱fɔ, a le̱e̱ fe̱yɛ kufu de bamo̱ fe̱yɛ ba gyi mò̱ awo̱re̱fɔɔ‑ɔ ako̱. Na bo̱ su kale. 16 Na bo̱ tɔwe̱ fe̱yɛ,

“Daane̱ke̱na! Daane̱ke̱na!

Ke̱e̱ ane̱ŋ ne̱ ase̱ŋ a to̱ maŋ dabe̱ amo̱‑ɔ!

Fo̱ ne̱ fo̱ ase̱sɛ a dɛɛ buŋ kyefuri

na awaagya ne̱ a du fe̱yɛ lɔŋkɔnkyuronkyu‑o,

na amo̱ ne̱ aa pee kpɛye̱ kpɛye̱ kpɛye̱‑ɔ,

ne̱ baa ba atanne̱ pipee na abu dame̱naŋsɛ yawo̱ le̱ŋsɛ

na akukye‑ro ataŋgyi dame̱naŋsɛ bo̱ buŋ bamo̱ e̱ye̱e̱ se̱‑ɔ.

17 Ne̱ dɔŋhwe̱re̱e̱ ko̱ŋko̱‑rɔ kpeŋ

fo̱ kapo̱tɛɛ dabe̱ mɔ a fo̱ fo̱ se̱ pɛɛɛ!”

Na ntɛɛrɛɛ pɛɛɛ ne̱ bamo̱ kusuŋ e̱ gye̱ fe̱yɛ bo̱ so̱rɔ ayawo̱gyipo̱ e̱tɔso̱rɔ e̱ko̱re̱e̱‑rɔ le̱e̱ maŋ ko̱ se̱ yaa ɔko̱ se̱‑ɔ ye̱re̱ ke̱fɔ ke̱fɔ. 18 Bamo̱ ya ŋu e̱bɔɔre̱e̱ a le̱e̱ de̱e̱kpa ne̱ ɔ kywɛɛ maŋ‑ɔ‑rɔ, na bo̱ tɔwe̱ fe̱yɛ, “Maŋ ko̱ mo̱ŋ bo̱‑rɔ, na o du fe̱yɛ ane̱ŋ a maŋ dabe̱ mɔ.” 19 Na bo̱ ba asare̱e̱ bo̱ gya aŋu, na bo̱ tɔwe̱ fe̱yɛ,

“Daane̱ke̱na! Daane̱ke̱na!

Ke̱e̱ ane̱ŋ ne̱ ase̱ŋ dabe̱ a to̱ maŋ dabe̱ mɔ‑ɔ.

Mò̱ kapo̱tɛɛ ne̱ ka kyɔ ke̱baŋse̱‑ɔ se̱,

bamo̱ ne̱ bo̱ naa bo̱ de e̱ko̱re̱e̱

ba ba ba fe atɔ‑ɔ a kii atɔ awuye!

Ne̱ dɔŋhwe̱re̱e̱ ko̱ŋko̱‑rɔ kpeŋ

mò̱ kapo̱tɛɛ‑ɔ pɛɛɛ a fo̱ mò̱ se̱!”

20 Ne̱ mo̱ a nu bo̱re̱ ko̱ a tɔwe̱ fe̱yɛ,

“Mo̱nꞌ sa a mo̱ne̱ akatɔ gyi

bo̱ le̱e̱ ane̱ŋ ne̱ baa kpuri mò̱‑ɔ se̱.

Mo̱ne̱ ne̱ mo̱ne̱ bo̱ so̱so̱‑ɔ, Wuribware̱ a mbɔɔ‑ɔ

na mò̱ ase̱sɛ‑ɔ na Yeesuu a ayaa‑rɔ aye̱re̱po̱‑ɔ

na Wuribware̱ a akyaamɛɛ‑ɔ,

ŋ yɛ ɛɛɛ, mo̱nꞌ sa a mo̱ne̱ akatɔ gyi,

a le̱e̱ fe̱yɛ ke̱tɔ ne̱ maŋ amo̱ ase̱sɛ a waa mo̱ne̱‑ɔ se̱,

ne̱ Wuribware̱ a gyiiri bamo̱ ke̱se̱bɔ.”

21 Ne̱ Wuribware̱ kabɔɔ dabe̱ ko̱ a yase̱ kibu ko̱ ne̱ ke̱mo̱ ke̱dabe̱ ta fe̱yɛ ke̱bwe̱e̱ dabe̱ dabe̱‑ɔ, ne̱ ɔɔ twe̱e̱ waa ɔpo̱o̱‑rɔ tukum tɔwe̱ fe̱yɛ,

“Mo̱nꞌ ke̱e̱ ane̱ŋ ne̱ ba twe̱e̱ Babilɔŋ,

maŋ dabe̱ amo̱, a bo̱ bo̱ kyo̱ŋwe̱‑ɔ,

na bo̱ ma lɛɛ ŋu mò̱ pɛɛɛ‑ɔ.

22 Bamo̱ ne̱ ba da ikwaŋgyi‑o

na bamo̱ ne̱ ba fo̱re̱ mbe̱re̱‑ɔ mɔ

mo̱ŋ lɛɛ bo̱ bo̱ mfe̱ŋ,

hare̱e̱ ba waa iliŋ.

Alo̱po̱ na aseripo̱ na apwɛɛpo̱ na abwaye̱po̱

na atɔ alɔŋŋɔpo̱ mo̱ŋ lɛɛ bo̱ bo̱ mfe̱ŋ,

hare̱e̱ ba waa kusuŋ.

Bo̱ maa lɛɛ kwɛɛ abwaye mfe̱ŋ.

23 Bo̱ maa lɛɛ kyaŋŋe̱ fetiri mfe̱ŋ.

Bo̱ maa lɛɛ taa ko̱ko̱fɔ ko̱ mfe̱ŋ.

Fo̱ ayawo̱gyipo̱‑ɔ mo̱ŋ lɛɛ bo̱ gye̱

ase̱sɛ dabe̱ kaye̱ mɔ‑rɔ.

Fo̱ maa lɛɛ nya a fo̱ ba asibeŋ na aye̱ba na kanɔrɔkɔne̱

bo̱ pe̱nna kaye̱‑rɔ ase̱sɛ pɛɛɛ.

24 Ke̱tɔ se̱ ne̱ Wuribware̱ a gyiiri fo̱ ke̱se̱bɔ‑ɔ

e̱ gye̱ fe̱yɛ fo̱ e̱ gye̱ ne̱ fo̱ a baa mò̱ akyaamɛɛ

na mò̱ ase̱sɛ ne̱ bo̱ bo̱ kaye̱ mɔ‑rɔ‑ɔ pɛɛɛ lowi.”

<- Aleebo̱kaapo̱tɔ 17 Aleebo̱kaapo̱tɔ 19 ->