ROOMAꞌ 15

Niiꞌka Pakumeerima Tapoꞌmeeriaing Karistooꞌkoo Kuunge.

1 Niiꞌ eeꞌning masikaꞌanta-koo purimariri oꞌnorininge tee teing aruaruꞌnanka pakuarampiaing, niikaang pia siompampiaꞌ. 2 Niiꞌke narunaꞌ narunaꞌ oovuning dotu-antavarampimaatoaing tampaꞌ purimpariri otoroainaꞌ. 3 Aiꞌ Karistooꞌ teie, baka dotu-antavaravarukoꞌ Kumponing noruꞌui, Daari Meekung-koo aaꞌpuuꞌnaꞌkoo,

“Orakaꞌ minkuraamainge minkumaako toraꞌpantuꞌ.” (Kena 69:9)

4 Ninge tenaare-koo noruꞌantarampimang, aiꞌ ookara kara Daari Meekung-koo otoing teing niiꞌ nau-anta-koo, tee Daari Meekung-koo pinkaꞌmariri domang kuaaꞌ ninka miiꞌkampiri tee barenku nempampiainaꞌ. 5 Enang tee, Kumponinge domang kuaaꞌantamuri miiꞌkampiri oꞌnoriiꞌnaang pakumurimaunge navu-antaruriaing Jiisuuꞌ Karistooꞌ bakaang aarumo siomperi otoriko. 6 Teeꞌ biraankeruriko nariꞌ karerima Kumponing daangamperiainaꞌ, tee niikaang Ovoring Jiisuuꞌ Karistooꞌ Bauma. 7 Teeꞌkoo onkeonkeꞌdeerimaatoaing Karistooꞌke diiꞌ tero onkeonkeꞌduruꞌnaꞌ, Kumponing meenaꞌpoainaꞌ. 8 Noruꞌeriai tee Jiisuuꞌ Karistooꞌ pouꞌ siraꞌantavuma Kumponing tee masikaꞌpari otomaung bakaang maraka-anta-koo Juꞌnupoong paku-koo teing tutunaꞌnupoong tero nauvuruꞌnaꞌ. 9 Eeꞌnoko napoꞌ noruꞌeriai tee pouꞌ Juꞌdeeaing napoꞌ mooꞌuriko teinge Kumponing miring pankaing-antavaavaꞌnaang bakaang piaa-koo teing-koo. Teeꞌ Deevitaꞌke daarivuma minkuvuuꞌnaꞌ,

“Ninge daangantampaing Daꞌ Juꞌdeeaing-koo meuꞌke, eeꞌnoko dakaang miring kenavampainge.” (Kena 18:49)

10 Niiꞌnooꞌke napoꞌ eeꞌ daariari otong,

“Doturariaing diiꞌ Juꞌdeeaing teing ninka bakaning Juꞌnupoong ninka nariꞌ.” (Boto 32:43)

11 Napoꞌ niiꞌnooꞌke Daari Meekung-koo aaꞌpui otong,

“Daangamperiaing Ovoring diiꞌke Juꞌdeeainge. Ookarai daangamperiaing tee.” (Kena 117:1)

12 Napoꞌ Aisaiaꞌ bakanooꞌke aaꞌpui otong,

“Jeeseꞌ bakanaving-koo narung naning daaꞌaraaꞌnaang tarevuriaing teing Juꞌdeeaing, eeꞌnoko tee narung-koo teinge biikaang noruꞌ sipaavai.” (Aisaiaꞌ 11:10)

13 Aiꞌ teie Kumponing maraka-antamurioꞌ nempampimaunge maantoꞌantaruriaing doturotue eeꞌnoko mooai masikaꞌantaveriko. Eeꞌnoko teie purintoꞌke Tanuaang Meekung bakaange aaꞌnaꞌ tasiꞌantaruriaing tee barenku mmeꞌ oroꞌparavaung.

Asiꞌnaare Kara Paulaꞌke Baꞌmaikoriꞌ Minkuvuruꞌnaare

(15:14–16:27)

Paulaꞌ Dotuaruꞌnaꞌ Tee-koo Bakaang Mintoong-koo

14 Ninge tee ninka tampaꞌ noruꞌdampimaung diiꞌ mmaikoriꞌ tampara aarumoi maantoꞌantararirioꞌ eeꞌnoko norunoruꞌke, eeꞌnoko makosirariri diiꞌ diiꞌka nau-anta-koo. 15 Nka tee amanampaꞌ niiꞌning kapooꞌ napoꞌ noruꞌantarampimang, mmaikoriꞌ, noruꞌansi diiꞌ tampaꞌ otoritaaꞌ tamung napoꞌ minkuanko meenaꞌpoaing, aiꞌ ning tee Kumponinge mintoong maneenung amuuꞌnung. 16 Ning tee pokaꞌmari kara-okovui-nka-koong tee doorenang Jiisuuꞌ Karistooꞌketa Juꞌdeeaing-aape. Ning tee pareka-nko makosi, piristiꞌpinaꞌ diiꞌ parekarampiko diiꞌ boontunang tampara deentariruꞌning Kumponing-koo Tanuaang Meekunge makosi-antarurioꞌ Kumponing dotu-anta-koo. 17 Nka tee makosi ning dangaꞌdaangamaravaing tee-koo ookara kapooꞌnanka-koo Jiisuuꞌ Karistooꞌke nkovuing-koo ning-koo kuunge. 18 Kapooꞌkoo ninka nkoansing-koo daangamaravarupeuꞌ, nka tee-koo Karistooꞌke narunge nkovuing-koo ning-koo kuunge daangamaravaing Juꞌdeeaing pia-antavarantuꞌnung-koo aaꞌninge: kara, tampaꞌnko, iirakuta-koong taaꞌniꞌanta oroꞌpariko eeꞌnoko Tanuaang Meekunge purimpari daaꞌuriko; 19 Teeꞌ nariꞌ daankiarantuꞌ Karistooꞌkoong doorenang ookara teketa Jerusalemaꞌ kato Ilirikung-navuntuꞌ. 20 Teeꞌ nkomarama eeꞌ toꞌbii-antamaramaung: Tee doorenang nauaramaꞌnaang tenairu Karistooꞌkoong miring niiꞌninge mmeꞌ siraꞌpaavaꞌnairu nanama, aaꞌpama: Niiꞌnunge natuku keempuuꞌnooꞌ kaniamiꞌneenga. 21 Daari Meekunge minkuvumanaꞌ nariꞌ nkoaraaꞌnaang eeꞌpinaꞌ,

“Teinge tero ooaavaruuꞌninge nauaariaruko tee ooaavaing, eeꞌnoko teinge tero taaravaavarukoꞌninge tee tasiꞌpaavaing.” (Aisaiaꞌ 52:15)

Paulaꞌke Bakaang Miruꞌ Roomaꞌ Eeꞌnoko Sipeini Beeroꞌkoo

22 Teeꞌ nkomarama diiꞌ tero taaraveruꞌning-anko meaung tamung maromarama poꞌkoo. 23 Nka enang opansing ookara nkaang nko-nko ameensiꞌkoo. Teka makotuko deekoꞌ enang Sipeini-nameensiꞌaape nanamaꞌnaang, eeꞌnoko teꞌ nanama beeroꞌdampiaing pa, mmauꞌ mareꞌkoo diiꞌ oo-koo piamonanooꞌkoo. 24 Eeꞌnoko okiꞌnooꞌ navumariritaaꞌ oꞌnooꞌnorira pakumerioꞌ napoꞌ tampaꞌ nanampaing nkanavunge. 25 Nka enanooꞌ Jerusalemaꞌaape nanamaꞌnaang avuavuꞌ ninka Kumponing bakaning meekupoong-koo. 26 Teing Masedoniaꞌ eeꞌnoko Akaiaꞌnameensiꞌkooninge dotuariri avuavuꞌ nkoauꞌ teing meekupoong-koo ataꞌoiꞌnuka-koo Jerusalemaꞌka. 27 Tamung dotuariri avaaruꞌ, nka tee tampara doorenang-koong komaaru makuꞌ makosi. Aiꞌ Juꞌnupoong-eta tee tanuaang-aapenung biraanke nkavaara teinge napoꞌ pakuaariai Juꞌnupoong mono-aapenung pakupaku-koo. 28 Teka tenang tee aung avuavuꞌ opansi avoromira oosievorompiruꞌnung tenang tankinampaing Sipeini-aape eeꞌnoko tankinama beeroꞌdampiai. 29 Eeꞌnoko noruꞌansi otong ning tenang diiꞌanko basimaravainang tee Karistooꞌke biraanke pankaing amuaing diiꞌ paku-koo.

30-31 Enang naurampimang diiꞌ mmaikoriꞌ kuunge Jiisuuꞌ Karistooꞌ niikaang Ovoring-koo eeꞌnoko tee ninka piaa Tanuaang Meekung bakaang, niꞌninka nariꞌ mintoomariaing kunsi-koo pakumeriko Kumponinge tontaꞌantamuainaꞌ teing-eta nantoong masikaꞌanta otoroaing-eta Judiaꞌnavetei otoroining-eta, eeꞌnoko nkaang nko-nko Jerusalemaꞌke tampaꞌ arooꞌaavai Kumponing bakaninge meekupoonge. 32 Teeꞌ nariꞌ Kumponinge piavomanaꞌ ning diiꞌanko meaing dotumarama diiꞌ ninka tampaꞌ deeꞌmoi oꞌnooꞌnaang. 33 Tee eeꞌnara Kumponing mooa-poꞌnung teeꞌ diiꞌ ookara ninka nariꞌ otomatoaing. Teeꞌ eeꞌnaꞌ.

<- ROOMAꞌ 14 ROOMAꞌ 16 ->