Link to home pageLanguagesLink to all Bible versions on this site
2
Ovoring Tee Boiaꞌ Domantooꞌ Makosi

1 Teeꞌkoo diiꞌke taapoꞌ tontaꞌeriaing teing aing aaꞌning: tooꞌdeng, tositosi, kara narunge navu, mamairo eeꞌnoko amutemuriiꞌ miring orari-anta. 2 Teka diiꞌ aaꞌnaꞌ peera-antarariaing tee-koo kara-koo pituaravaung-koo nerakauꞌnuka noonooꞌkoo narung-koo peeravoromanaꞌ, tee diiꞌ pankaꞌantaruriaing diikaang nerakung domaang-koo makosinaꞌ. 3 Aiꞌ teie domang-antaruriko diiꞌke tee Ovoring tampaꞌ mantomperuꞌnung. 4 Tee-anko pori otomatoaing tee eeꞌnara boiaꞌ domantooꞌanko nantoonge tompimpauꞌnung-anko, teka Kumponing-koo dutakanooꞌka tee miruꞌnisi eeꞌnoko domange daiꞌ. 5 Eeꞌnoko diiꞌ teeꞌke tee-pinaꞌ kapang domantooꞌnuka otoriaininge tanuaang-aapenava pava-koo tee ninka nariꞌ kanirariri meekaꞌnisinuka piristiꞌnavitu deentariri teeꞌ tanuaang-aapenaꞌ boontunantarima Kumponing dotu-antaveriainaꞌ Jiisuuꞌ Karistooꞌkoo kuunge. 6 Aiꞌ Daari Meekunge eeꞌ minkuvui otong,

“Ee aing, Saioni-namono-koo tee boiaꞌ domantooꞌ eꞌmaniang tumanung bempansing, tereꞌ eeꞌnareꞌ kunkuꞌdoiꞌkoo miruꞌnisi-nareꞌ eeꞌnoko makuꞌpaaꞌnareꞌke, eeꞌnoko baa tee naning tee masikaꞌantavuaing tee maiaꞌanta-koong deeaꞌ.” (Aisaiaꞌ 28:16)
7 Diiꞌkoo eeꞌning-koo tee, Jiisuuꞌ Karistooꞌ, masikaꞌantaverimaing-koo tee eeꞌnara domange daiꞌ eeꞌnoko makuꞌpaaꞌ, teka teing-koo tee masikaꞌantavaavaing-koo tee tee maiaꞌanta, teeꞌ Daari Meekunge aaꞌpumanaꞌ,
“Tereꞌ eeꞌnareꞌ kapanareꞌ pava kaninukai pooreꞌaama duaꞌauꞌnareꞌ ookutunava-koo eꞌmanianareꞌ tumanareꞌ deemparioꞌ tasiꞌpauꞌ damaꞌke.” (Kena 118:22)
8 Eeꞌnoko
“Tereꞌ tereꞌ eeꞌnareꞌ nantoong tupang-antavurira duaꞌantavuriainareꞌ teing.” (Aisaiaꞌ 8:14)
Teing tupampariainooꞌ tee teinge kara meumpaavaung-koo teeꞌ, teing teeꞌ oroꞌnuka duaꞌkoo miruꞌuruꞌnaꞌ. 9 Teka diiꞌ teing eeꞌning Dauraronge˜ miruꞌniiꞌnuka piristiꞌkoo, meekavitu, Kumponing baka bakanupoong, diiꞌke kapooꞌ bakaang nko-nkonanka tampeng siraꞌantaevurimatoaining, tee eeꞌnara diiꞌ mutaanang-eta bokururira bakaang araka taꞌnimpaariiꞌaape siꞌduruꞌ. 10 Tero tee diiꞌ nantoong deeaing, teka enang tee diiꞌ teing Kumponing bakaning nantoong deentaririning. Tenang eeꞌnang tee Kumponing bakaang piaa komperiarukoꞌning, teka enang komperi otong tee piaa.
Koomariri Oꞌnoriaing Sirakuraꞌ
(2:11–3:22)
Kumponing Bakaang Botovotonaaꞌnuka Makosinaꞌ Oꞌnoriaing

11 Ee mmaikoriꞌ, diiꞌ teing tavora-nupoong eeꞌnoko damisimainku-pinaꞌ anke kansiꞌkoo otoriko ninge eturampiri aaꞌdampimang: Dontaꞌdariri otoriai mono-aapening piananka-ita teing diiꞌ domang turanturi otorimaing-eta. 12 Mutaanang-nupoong-ankoi tampaꞌ mataurariri otorimaatoai eeꞌnoko orakaꞌ nkonuka tantaariaing deekoꞌ tenang Kumponinge kansiꞌ beeroꞌuainang diikaang nko-nko tampara tasiꞌpaara Kumponing daangampaavaing teinge.

13 Ookara-koo teing-koo nantoong-koo pankenanka-koo boong otorimaatoai Kumponing dotu-antaveriiꞌnaang, aaꞌnoko tee daurarong, eeꞌnoko teing ovoꞌmaꞌnuka, 14 aiꞌ teing teing Kumponinge botovuruꞌning oreng meroꞌaarima eeꞌnoko tampeng daangampaariiꞌnaang. 15 Aiꞌ Kumponing bakaang pia tee eeꞌ otongꞌ: Diiꞌke tampaꞌnkoi dooroong-antavereriaing teing mutaanang-nupoong kara tamunsiꞌnung minkuaamaing. 16 Masikaꞌ diiꞌ Moosesi bakaang botoi daiꞌdariaꞌ otong, teka ninge aaꞌdampimang diiꞌke kapooꞌ orara nkoveriaukaꞌ dakarakaꞌperi aaꞌperima, “Karistooꞌke Moosesi bakaang boto-ita unaa-antamuioꞌ ning tauraꞌmari oꞌnong.” A, teeꞌ deeaꞌ. Karistooꞌke unaa-antamuruꞌnung niiꞌke kapooꞌ tampeng naing nkoampiiꞌnaang. Kumponing bakaning botovotonaaꞌnuka makosinaꞌ otorimaatoaing. 17 Nantoong ookara makosinaꞌ deto basi-antavererimaatoai. Teing Karistooꞌkoo diiꞌmarang piaaverererimaatoai. Kumponing-koo aaꞌnaꞌ amaiaaꞌdori otoriai, eeꞌnoko kansiꞌkoong daurarong deto basi-antaverimatoai.

Sisikeera Toraꞌkoo Tauraꞌmariaing Karistooꞌ Bakaang Aarumo Siompampiri

18 Diiꞌ bautaranuka diikaning pankeng tanataraarimaing-ankoi boong-koo otorimaatoai teing pankaing-antaverereri, tampaꞌ nkoraarimaing naing-koo deeaꞌ, teka teing orakaꞌ nkoraarimaing-koo nariꞌ. 19 Naning tamung sisikeera-antavaako tauraꞌparavaing deekoꞌ Kumponing dotu-anta-koo noruꞌui, Kumponinge tee biraankevuaing tee. 20 Mooꞌ aming nkaveriaing kapooꞌ orara nkoveriko muraꞌdaariko tauraꞌdariaing deekoꞌ? Teka kapooꞌ tampara nkoverima baike kuneꞌeriiꞌnaang dooroontariri otoriaing deekoꞌ Kumponinge biraankeruriaing tee-koo. 21 Aiꞌ diiꞌ teing teeꞌkoo Kumponinge bokururuꞌning. Karistooꞌ tee diiꞌkoo baike kuneꞌuuꞌnung diiꞌ teeꞌ nariꞌ tee siomperi nkorariiꞌnaang nau-antarurima. 22 Teie tee orakaꞌnko nkovuaꞌ, bakaang beꞌduuꞌkoo tosi minkuvuko taaravaavaꞌ. 23 Tenang teinge tee pooreꞌaako teie tee teing pooreꞌuriaꞌ makuꞌkoo. Sisikeera napoꞌ toraꞌpura mauꞌuriaꞌ teing, teka tee Kumponing-koo baka arooꞌaruꞌ koontoꞌnaꞌ simpeꞌnko˜ noruꞌui. 24 Teie tee baka bakaang monoi ookara orakaꞌ nkonanka nkavuuꞌ teka aaꞌbarataꞌkoo, niiꞌ tee-koo orakaꞌ nko-koo moompira tee-koo aarumo koontoꞌ narung-koo domamariri oꞌnoriiꞌnaang. Diiꞌ teing teie datoꞌnankai tee-koonge unaa-antarurining. 25 Aiꞌ diiꞌ teing poorariruꞌning sipisipiꞌpinaꞌ, teka enang tororaririning tee-anko diikaang tanuaang sipisipiꞌpinaꞌ tanatarurimaung-anko.

<- 1 PIITA 11 PIITA 3 ->