Link to home pageLanguagesLink to all Bible versions on this site

1 Etu nimite amikhan tai logote mili kene kaam kora khan pora apuni khan ke bhi utsah kori ase Isor laga anugraha ke misa-misi nalobi. 2 Kilekoile Tai koise,

“Ami apnikhan ke ekta homoi te huni loise,
Aru poritran laga dinte ami apuni khan ke modot korise[a].”
Sabi, etiya bhal homoi ase. Sabi, etiya poritran laga din ase. 3 Amikhan kunke bhi girai dibole kaam kora nai, amikhan sewa kora bodnam nahobo nimite. 4 Hoilebi, sob te amikhan nije ke Isor laga kaam kora manu khan ase koi kene dikhai thakibo; nijorke rukhabole parikena, dukh te, dorkar te, digdar te, 5 mari kha-a te, bondhi ghor te, gondugol te, tan kaam te, ghuma bole napara rati khan te, bhuka thaka homoi te; 6 sapha pora, gyaan pora, nijorke rukhabole para, Pobitro Atma pora, hosa laga morom pora, 7 Hosa laga kotha pora, Isor laga takot pora; dyna hathte aru baya hathte dhormikta laga hathiar khan pora, 8 Sonman aru sorom pora, bhal khobor aru biya khobor pora: thoga-baji nisena, aru hoilebi hosa te; 9 Najana nisena, hoile bhi bhal pora jani thaka; mori juwa nisena, hoilebi sabi, jinda ase; mar kha-a nisena, kintu morai diya nai[b]; 10 Mon dukh kora nisena, kintu hodai khushi pora thaka; dukhia nisena, kintu bisi khan ke dhuni bonaise; eku bhi nathaka nisena, kintu sob paikene ase.

11 Oh Corinth laga manu khan, apnikhan usorte amikhan laga mukh khuli kene ase, amikhan laga mon bhi dangor khuli kene ase. 12 Amikhan pora apnikhan ke dhuri bandhikena rakha nohoi, kintu apnikhan nijor laga morom bhabona pora he apnikhan bandhi kene ase. 13 Etiya etu laga ekta bhal bodli kori bole nimite to- ami bacha khan ke kowa nisena- apnikhan bhi mon dangor khuli bhi.

Jivit Isor Laga Mondoli

14 Apuni khan biswas nakora khan logote eke hoi kene namilibi. Kilekoile dhormikta te thaka khan aru niyom nathaka khan logot ki mili bole ase? Aru puhor to andhar logot ki mili bole paribo? 15 Aru Khrista to Belial[c] logote ki kotha milai kene rakhibo? Nohoile biswas kora jon pora abiswasi logote ki bhag ase? 16 Aru Isor laga mondoli to murti khan logote ki kotha milai kene rakhise? Kilekoile amikhan jinda Isor laga mondoli ase jineka Isor pora koi dise;

“Ami taikhan bhitor te thakibo, aru taikhan bhitor te berabo;
Aru ami taikhan laga Isor hobo,
Aru taikhan ami laga manu khan hobo[d].”
17 Etu nimite,
“Taikhan majot pora ulaikena Ahibi,
Aru apnikhan alag hobi,” Probhu koi ase,
“Aru niyom pora moila thaka saman na chubi,”
“Aru ami apnikhan ke mani lobo[e].”
18 “Aru apnikhan laga Baba hobo,
Aru apnikhan ami laga chokra khan aru chukri khan hobo[f],”
Sob pora Mohan Probhu pora koi ase.

<- 2 Corinthians 52 Corinthians 7 ->