Ebreus 3

Je³su²jah³la² Moi³se²ah³la² nxe³nyhu¹kxi³jau³su²

1 Nxe³nxa²ha¹te¹ Je³su²jah³lai²na² wãn³txa² yxo²ĩ²ki̱³sa²kxai³ a²lon³sa²nyhu¹ki̱³tã³la². Txa²wã¹sũ̱³nu²kxai³lu² ĩ³kaix1so¹nẽ³na³la². Oh³xai²nãn¹jau³xa² sa²yxo²wet1sxã³ yxau²xai³nẽ³si¹ja³kxa³nũ³su² ĩ³kaix1so¹nẽ³na³la². Nxe³nẽ³ju³tan¹te²kxa³ya̱³lhu² Je³su²jah³lo²kxai³lu² ĩ²yxau²xai³la³sah¹lxi³hẽ¹la². A²nxe³te²a² Txa²wã¹sũ̱³na² hxi²ki³kxai³lu² ĩ³sa²si¹ha³ũ¹nhẽ³kxah³lai²la¹wa². Txa²wã¹ẽ¹nãu³ai²na² yxo²ĩ²ki̱³sa²kxai³ Txa²wã¹wã³nxĩn¹te²a² a²si³yxau³jah¹lo²lot3sxã³ ĩ³ye³ũ¹nhẽ³kxah³lai²la¹wa², Txa²wã¹sũ̱³na² yen³nãu³a²sa³. 2 Kxã³nhxĩ¹nu¹tai²na² Txa²wã¹sũ̱³na² a²yxo²wãn³txa² Moi³se²ah³lu¹ta²kxai³ kwa³na³ta¹hxai²ti³ai¹ti²tu³wa². Txa²wã¹sũ̱³na² sa³wi³ha³lxa² wain³txi³ sa²hau³kot3si¹jau³su² kwa³na³ta¹hxai²ti³ai¹ti²tu³wa². Kwa³na³ha²kxai³ Moi³se²ah³lo²nu¹tai²nãn²tu̱³ wain³txi³ sa²yxo²we¹ta¹hxai²ti³ai¹ti²tu³wa². Te²yã¹nxe³kxe³hũ̱³nxe² Je³su²jah³lo²nu¹ta²kxai³ Sũ̱³na² hxi²ka² sa²si¹hã³ũ¹nhẽ³kxah³lai²na² Sũ̱³na² wãn³txai²na² wain³txi³ sa²yxo²wet1sxã³ yxau²xai³ta¹hxai²ti³ai¹ti²tu³wa². 3 Nxe³sxã³ Moi³se²ah³lo²kxai³lu² a²wxi²kin³ti³ton³ju³ta² kãin²na³la². Yxãn¹ta¹ Je³su²jah³la² sa²kxai³lu² wxi²kin³ti³ton³khai¹nxe³sxã³ ã³sen³sai²na³la². Nxe³sxã³ sxi²su² a²wi¹ju³ta² ĩ²ki̱³te²ju²hẽ³la². Yxãn¹ta¹ sxi²ha² ton³jah¹la² sa²nẽn¹kxi²khaix1nxe³ki̱³te²ju²hẽ³la². Te²yã¹nxe³kxe³hũ̱³sxã³ Moi³se²ah³lu¹tai²na² sa²kxai³lu² sxi²khai³xa² yã¹nxe³ha²kxai³ Je³su²jah³la² sa²kxai³lu² sxi²ha² txon³jah¹la² yã¹nxe³ha²kxai³ nxe³hĩ̱³nx2na³la². Nxe³kxe³su² ha²kxai³ Je³su²jah³lai²na² a²wxi²kin³ti³ton³ju³ta² ã³sen³sai²na³la². 4 Jã¹nxe³sxã³ sxi²ha² ĩ²li³thĩ³na² txon³jah¹la² yũ³na³la². Te²yã¹nxe³sxã³ Txa²wã¹sũ̱³na² hi²sen³kxai³lu² yen³kxa² a²yxo²ha³kxa¹ wet1jah¹lai²la¹wa². 5 Jã¹nxe³sxã³ Moi³se²ah³lo²kxai³lu² Txa²wã¹sũ̱³na² a²sa³wit3su² ha²kxai³ Txa²wã¹sũ̱³na² a²yen³kxi³su² te²kxai³lu² wi¹lhit1sxã³ sa²hau³kot3sa²tẽ³ta¹hxai²ti³ai¹ti²tu³wa². Nxe³sxã³ Txa²wã¹sũ̱³na² wãn³txa² tah²yau³nũ³a² yan¹na² e³kxi²jau³nũ³a² ĩ³ye³nũn¹ta¹hxai²ti³ai¹ti²tu³wa². 6 Nxe³nxa²ha¹te¹ Kris²tu³jah¹lo²kxai³lu² Txa²wã¹sũ̱³na² ta²hai²la¹wa². Txa²wã¹sũ̱³na² sa³wi³ha³lxai²na² A²hxi²kan¹jah³lai²la¹wa². Txa²wã¹ki̱³na¹xai²na² Txa²wã¹sũ̱³na² wãn³txa² yxo²ĩ²ki̱³tũ̱³ka̱³txi³ki̱³na¹xai²na² Txa²wã¹sũ̱³na² wẽ³ha³lxi³su² ki̱³tã³la². Ya³nãn³ta³ki²la²sxã³ yxo²ĩ²sa²tẽ³ki̱³kxe³su² ha²kxai³ wah³nxe³kxi²sa²tẽ³ki̱³kxi³ju³ta³nũ³su² kan²txi³ i³ki̱³kxe³su² ha²kxai³ nxe³ki̱³kxai²nãn²tu̱³ Txa²wã¹sũ̱³na² wẽ³ha³lxi³su² ki̱³tã³la².

Txa²wã¹sũ̱³na² sa³wi³ha³lxa² ĩ³ye¹nxi²kxi³jau³su²

7-8 Jã¹nxe³ha²kxai³lu¹ Txa²wã¹sũ̱³na² Yãu³ka³jxah¹lai²na² a²wãn³txi³su² nxe³te³nah¹lxi¹:

— Hĩ¹na²su² Txa²wã¹sũ̱³na² wãn³txa² ĩ³ye³kxi¹nx2ti³jau³xa² ain³kxah¹lxin¹kxai²nãn²tu̱³ wxa²ẽ¹nãu³ai²na² sa²yxo²ã³sa²tẽ³ah³lxi³txa³hẽ¹li¹. Nxe³sxã³ a²kxã³nhxĩ¹nu¹tai²na² wxa²wĩ³na²nãu³xu¹tai²na² sa²kxai³lu² txa²wãn³txa² sa²yxo²ã³sain¹na²hẽ³li¹. Ha³lo²ai²na² a²nũ²a² yxau³ai¹nxa³ko³xu¹ta²kxai³lu² ai³lha²thet3tai¹nhĩ¹nu¹tai²na² hxi²ye¹ta³lxi³nha²si¹sain¹na²hẽ³li¹. Nxe³sxã³ a²ẽ¹na² e³kxi²nyhain¹te³nah¹lxi¹: “Sũ̱³na² wãn³txa² sa²yxo²ã³ki̱³kxan²ti³ ko̱³nxe³ti³ kãi³ki̱³kxa²yo³ha² ũ³hũ¹sain¹sĩ¹nxa³lho³na¹.” Nxe³nyhain¹na²hẽ³li¹. Jã¹xah³lxi³txa³hẽ¹li¹.

9 A²nxe³hĩ¹nu¹tai²kxai³lu² wxa²wĩ³na²nãu³xu¹tai²kxai³lu² txa²wã³nxĩ¹nũ¹hai¹na¹ju³ta² ĩ²sain¹to³kxan²ti³ kwẽ³kxa² ka³lxa¹txi³ 40 nxe² kwẽ³kon³sxã³ ĩ²sain¹to³kxan²ti³ txa²wãn³txa² sa²yxo²ã³sain¹to³sxã³ hxi²ye¹ta³lxi³sain¹to³hẽ¹li¹.

10 Nxe³sain¹to³ju³tan¹te²kxa³ya̱³lhu² ĩ³a̱n³ta³kxai¹na¹hẽ³li¹. Ĩ³a̱n³ta³kxai¹na¹te³nah¹lxi¹: “Tũ̱¹ka̱³txai²na² a²ẽ¹nãn¹jau³xai²li² ko̱³nxe³ti³ a̱i³nhain¹na²hẽ³na¹. Hai³txi³ tĩh³na² ĩ³yau¹ũ³hai¹na¹tĩh³na² ã³nxai³ain¹nxa³hẽ³na¹.” Nxe³sain¹na²hẽ³li¹.

11 Nxe³sai¹nha²kxai³lu¹ ĩ³a̱n³ta³kxi²nha²sxã³ ĩ³ye³kxai¹na¹te³nah¹lxi¹: “Txa²ha³lo²a² ã³wih¹sxã³ ĩ³ye¹nxi²sa²tẽ³ya³sai¹nxa³lho³li¹.” Nxe³ai¹na¹hẽ³li¹.

Txa²wã¹sũ̱³na² Yãu³ka³jxah¹la² nxe³ta¹hxai²ti³ai¹ti²tu³wa².

12 Jã¹nxe³ju³kxai³lu² txa²wã³tã̱³sa²yah³lxi¹lxa². Wxa²ẽ¹nãu³ai²na² ĩ²khai¹nxe³nha¹jah³lxi³hẽ¹la². Wxa²ẽ¹nãu³ai²li² ko̱³nxe³ti³hin¹nha²sxã³ yxo²ĩ²yah²lxan³kxai²nãn²tu̱³ Txa²wã¹sũ̱³na² Ka³te̱n³yah³lo²kxai³lu² ã³nxu²lot3jah³lxin¹nha³ta²wa². 13 Txa²wã¹sũ̱³nai²na² ũ³wha²li¹txã³nxa² ĩ³yau¹ũ³nhẽ³jau³xa² yũ³ki̱³tã³la². Txa²wã¹ẽ¹nãu³ai²na² e³kxi²nũ¹nhẽ³na³la². Nxe³nẽ³tãu³a² txa²wã¹nũ̱³ka̱³txai²na² ĩ³nxũ²kwa̱i³lxũ¹waun¹nha¹jah¹lxi³hẽ¹la². Nxe³yãn¹ta¹ a²hĩ¹nai²na² ĩ²li³te² ĩ³nxai²na² ko̱³nxe³ti³ a̱in³yah³lxin¹ju³ta² ĩ³ki³ha¹kxi¹sa²kex3so¹nx2ti³sxã³ Txa²wã¹sũ̱³na² wãn³txa²kxai³lu² ã³na¹yah³lxin¹kxa²ya̱n³txi³su² nxe³nx2ta¹wa². 14 Jã¹xah³lxin¹jut3su² yxo²ĩ²yah³lxin¹ju³tai³tã² ya³lo³txi²yah³lxi¹nha²kxai³ hai³txi³ ã³na¹yah²lxa³nha²kxai³ nxe³yah³lxin¹ta¹ti³ai¹ti²tu³wa². Jã¹yxah³lxi¹nha²kxai³ Kris²tu³jah¹la² sa²yxo²wet1sxã³ yxau²xai³lah³lxi¹lxa².

15 A²nxe³ju³tu¹tai²na² Txa²wã¹sũ̱³na² ũ³wha²li¹txã³nxu¹tai²na² e³ta¹hxai²hẽ¹la². E³te³nah¹lxi¹:

— Hĩ¹na²su² Txa²wã¹sũ̱³na² wãn³txa² ĩ³ye³kxi¹nx2ti³jau³xa² ain³kxah¹lxin¹kxai²nãn²tu̱³ wxa²ẽ¹nãu³ai²na² sa²yxo²ã³sa²tẽ³yah¹lxi³txa³hẽ¹li¹. Nxe³sxã³ a²kxã³nhxĩ¹nu¹tai²na² wxa²wĩ³na²nãu³xu¹tai²na² sa²kxai³lu² txa²wãn³txa² sa²yxo²ã³sain¹na²hẽ³li¹. Nxe³sxã³ a²ẽ¹na² e³kxi²nyhain¹te³nah¹lxi¹: “Sũ̱³na² wãn³txa² sa²yxo²ã³ki̱³kxan²ti³ ko̱³nxe³ti³ kãi³ki̱³kxa² yo³ha² ũ³hũ¹sain¹sĩ¹nxa³lho³na¹.” Nxe³nyhain¹na²hẽ³li¹. Jã¹xah³lxi³txa³hẽ¹li¹.

Txa²wã¹sũ̱³nu²kxai³lu² nxe³ta¹hxai²hẽ¹la².

16 Jã¹nxe³ju³kxai³lu² ĩh¹te²ta̱³ kxã³nhxĩ¹nu¹tai²kxai³lu² Txa²wã¹sũ̱³na² wãn³txa² ain³kxain¹sãn²sxã³ sa²yxo²ã³ain¹ta¹hxai²te²sẽ¹na²? Kwa²hãi¹nxe³sxã³ tũ̱³ka̱³txai²na² sa²kxai³lu² Moi³se²ah³lu¹tai²na² hxi²ka² sa²hau³ko³tũ̱³ka̱³txai²la¹wa². E³ji²ta²ko³xa² sa²sai¹si¹hain¹tũ̱³ka̱³txa² sa²kxai³lu² Sũ̱³na² wãn³txu¹tai²na² sa²yxo²ã³ain¹ta¹hxai²hẽ¹la². 17 Te²yã¹nxe³sxã³ kwẽ³kon³ka³lxa¹txi³ 40 nxe² kwẽ³kon³tãu³a² Txa²wã¹sũ̱³nu²kxai³lu² ĩh¹te²ta̱³ ĩ³a̱n³ta³kxi²ta¹hxai²te²sẽ¹na²? Kwa²hãi¹nxe³sxã³, ha³lo²a² a²nũ²a² yxau³ai¹nxa³ko³xai²na² ai³lhxã³ yxau²xai³tãu³a² ko̱³nxe³ti³ kãi³tũ̱³ka̱³txa² yan¹nãu³a¹ ya³lu²ain¹ta¹hxai²hẽ¹la². Nxe³tũ̱³ka̱³txai²na² sa²kxai³lu² Txa²wã¹sũ̱³na² hi²sen³kxai³lu² ĩ³a̱n³ta³kxi²ta¹hxai²hẽ¹la². 18 Te²yã¹nxũn³sxã³ Txa²wã¹sũ̱³nai²li² a²kxã³nxa² e³kxi²jau³xai²na² nxe³te³nah¹lxi¹:

— Txa²ha³lo²a² ã³wih¹sxã³ ĩ³ye¹nxi²sa²tẽ³ya³sai¹nxa³lho³li¹. Nxe³jau³jau¹xu¹tai²li² ĩh¹te²ta̱³ ain³kxi²tũ̱³ka̱³txi³su² hĩ̱³te²la¹xã³? Txa²wã¹sũ̱³na² ha³lo²a² ã³wih¹xa³kxi³nũ³su² ĩh¹te²ta̱³ ã³wih¹si¹hai¹nxa³te²la¹xã³? Kwa²hãi¹nxe³sxã³ tũ̱¹ka̱³txu¹tai²kxai³lu² wãn³txai³tã² sa²yxo²ã³tũ̱³ka̱³txu¹tai²na² e³kxi²ta¹hxai²ti³ai¹ti²tu³wa². 19 Nxe³jut3su² hĩ¹na² ĩ²ki̱³tã³la². Txa²wã¹sũ̱³na² wãn³txa² yxo²ĩ²ai¹nxa³ha²kxai³ Txa²wã¹sũ̱³na² ha³lo²a² ã³wi¹hain¹ju³ta³nũ³su² hxi²ka¹nai¹nxa³lho³la². Ju¹tai²li² txa²wã¹ẽ¹nãu³a² ĩ²nha²ki̱³tã³la².

<- Ebreus 2 Ebreus 4 ->