2 Tesalonisẽnses 3

Txa²wã¹sũ̱³na² a²ne³nxẽ³na² ĩ³ye³kxi²ah³lxin¹jau³su²

1 Txa²wã³tã̱³nãu³xãi³. Txa²wã¹sũ̱³na² e³kxah¹lxin¹tãu³a¹ ne³wã²na³sah¹lxi³sĩn¹txa³hẽ¹la². Nxe³sxã³ ã³nxai³nha¹tãu³a² Sũ̱³na² wãn³txa² wi¹jau³xan²tu̱³ wa³su³txi³ ha³ta̱³nxe³hi² a²nũ²a² yxo²ha³kxa¹ sa²yxo²we¹txi² wxãi²yã¹nxe³kxe³ju³ta² ten³sa²sĩn¹nha²wa². 2 Jã¹nxe³sxã³ a²nũ²a² kuh³lxa³thin¹te²su² te²a² ko̱³nxe³ti³ kãi³te²su² te²a² nxe³sxã³ Txa²wã¹sũ̱³na² ã³non²ta³kxi²sa²si¹hain¹sĩ¹na¹jau³su² ten³sa²sĩn¹nha²wa², yxo²ĩ²xa³te²a² kãin² yũ³ha²kxai³la².

3 Nxe³sa²sĩn¹ju³ta² Je³su² Kris²tu³jah¹la² nũ̱³kxũn³khai¹nxe²na³la². Sa³ta³na²jah¹la² hxi²ka² wxa²wxai³nxa²lxi³kxa²ya̱n³txi³su² ã³non²ta³kxi¹nx2ti³tu¹wa². A²nxũ²kwa̱i³lxũ¹nxa²lxi³tu¹wa². Hai³txi³ sa²yxo²ã³ti³hex1nxe³nx2ti³xa³lho³la². 4 Nxe³ha²kxai³ Txa²wã¹sũ̱³na² wãn³txa² kwa³na³nx2ti³nha¹jau³xa² a²yxo²ha³kxa¹ we¹jah³lxin¹tai¹ti²tu³wa². Yah³lxi¹nha²kxai³ yan¹nãu³a² ã³na¹yah²lxan³tho³la². Txa²wã¹sũ̱³na² hi²sen³su² ĩ³hxi²ka¹ta²lxi³jah¹lai²la¹wa².

5 Jã¹nxe³jut3su² Txa²wã¹sũ̱³na² a³lxi²nẽ³ju³ta² jũ¹nxe² ã³ne³wxe³ki̱³sa²kxai³ Kris²tu³jah¹la² nũ̱³kxũn³txi³ ã³si³tẽ³kxi²ki̱³ju³ta² jũ¹nxe² ã³ne³wxe³ki̱³sa²kxai³ nxe³ki̱³tã³la². Nxe³ki̱³kxan²ti³ ju¹tai²li² ã²la² kãi²non³sxã³ ã³ne³wxe³nx2ti³si¹ha¹jau³su² Txa²wã¹sũ̱³na² e³kxi²to³ha¹wa².

U̱³txi³ wa³kon³te²su² kãi³ũ¹hah³lxin¹jau³su²

6 Txa²wã³tã̱³nãu³xãi³. Wxa²nũ̱³ka̱³txa² ha³tih³ ĩ³nxai²na² u̱³txi³ wa³ko³nain¹te²su² ta¹hẽ¹la². Te²yã¹xah³lxi³txa³hẽ¹la². A²nxe³jah¹lai²li² txa²wã³tã̱³su² kxan²ti³ te²yã¹nxe² kãi³yah³lxi³txa³hẽ¹la². Nxe³jah¹lai²li² ã³sxã³ u²lxi³ ã³si³tu³lxi²sxã³ yxau³jah¹lxi³hẽ¹la². Te²yã¹nxe³jau³xa² e³kxi¹nx2ti³to³nha¹tai¹ti²tu³wa². Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²kxai³lu² jau³jau¹xai²na² ĩ³kwa³na³sain¹jau³jau¹xain²txi³ ĩ³kwa³na³nx2ti³nha¹wa². 7 Te²yã¹nxe³ kãi³sĩn¹te²txã³jai¹ti²tu³wa². Nxe³nha¹ha²kxai³ o²la³kxi²nha¹kxa² yã¹nxe³jah³lxi³hẽ¹la². 8 Wxa²yain³txa² so¹kxi¹nx2ti³nha¹kai³tã² ũ³yho³hi¹nx2ti³nha¹tai¹ti²tu³wa². Na¹ha²kxai³ hãi¹sxã³ wa³ko³na³la²ni²na¹kxan²ti³ yen³kxa² kwa² ũ³hũ¹sah¹lxin¹ju³ta² ten³sĩn¹te²txã³wa². Kwa² hxi²tha³txa²lxa¹kxa²ya̱n³txi³sa². 9 Wxa²yain³txi³nũ³xa² ai³nxũ̱³nxa²lxi³nha¹ju³ta² hxi²kan¹txi³ kwa³na³nx2ti³sĩ¹nhĩ̱³na¹wa². Yxãn¹ta¹ wain³txi³ ĩ³tih³nxe³nx2ti³te³lhxã³ ye¹nx2ti³nha¹hẽ³la². 10 Nxe³ki̱³sĩ¹nai³tã² kwa³na³nx2ti³nha¹te³nah¹lxi¹:

— U̱³txi³ wa³kon³te²a² wxa²yain³txa² wã²nhũ¹ain¹yah³lxi³txa³hẽ¹li¹. Nxe³nx2ti³sĩ¹na¹tai¹ti²tu³wa².

11 Jã¹nxe³sxã³ wxa²nũ̱³ka̱³txa² ha³tih³ ĩ³nxai²na² u̱³te²a² yũ³ta¹hẽ¹la². Nxe³kxa²yu³su² kwa²he¹ye²nyhain¹to³ta¹hẽ¹la². Nxe³nyhai¹nhxai²na²hẽ³la². 12 Nxe³tũ̱³ka̱³txai²na² sa²kxai³lu² ĩ³ye³kxi²sxã³ ĩ³kwa³na³ain¹sĩ¹na¹te³nah¹lxi¹, Je³su² Kris²tu³jah¹la² Txa²wã¹hxi²kan¹ta² Si³yxau³jah¹la² nxe³sai¹nha²kxai³ ĩ³kwa³na³ain¹sĩ¹na¹te³nah¹lxi¹:

— U̱³lah³lxi³txa̱³lxi¹. Hãi¹sxã³ ka³nahx2sxã³ wa³kon³yah³lxin¹kxa² yo³ha² yain³sxã³ yxau²xai³jah¹lxi³hẽ¹li¹. Nxe³ain¹to³ha¹wa². 13 Txa²wã³tã̱³nãu³xãi³. Wi¹lo²la³kxah¹lxin¹ju³ta² hxi²tha³yah³lxi³txa³hẽ¹la². Ĩ³nxũ²kwa̱i³lxũ¹jah¹lxi³hẽ¹la². 14 Yah³lxin¹ju³ta² a²nũ²a² ĩ²li³te²a² ta²nxã¹nxai²na² wãn³txa² sa²yxo²wet1sah¹lxi³sĩ¹nxãn³kxai²nãn²tu̱³ ĩ²khai¹nxe³tai¹yah³lxi³hẽ¹la². Sa²ye³ya̱¹not3sxã³ ã³jxah¹lxi³hẽ¹la². Ain¹yah³lxin¹kxai²nãn²tu̱³ ãu²li²to³nha²hĩ̱³nx2na³la². 15 Ain¹yah³lxin¹kxan²ti³ ko̱¹ko̱¹sai¹nxa³wa². Wxa²wã³tã̱³khai³xai²la¹wa². Nxe³ha²kxai³ ĩ³xa̱n³ta³kxai¹yah³lxi³txa³hẽ¹la².

Pau²lah³lai²na² a²ne³ki³san¹jau³su²

16 Nxe³jut3su² nxe³kxan²ti³ Txa²wã¹sũ̱³na² ã³nhãu²no³tẽ³ju³ta² wxa²ẽ¹nãu³ai²na² kxan²ti³ ĩ³hãu²no³tẽ³lhi¹nha¹jau³su² ĩ³ye³kxain¹sĩ¹na¹wa², Txa²wã¹sũ̱³na²sa³. A²nxe³jah¹la² hi²sen³su² wxa²nũ̱³ka̱³txa² yxo²ha³kxa¹ ã³si³tẽ³kxi¹nx2ti³tu¹wa².

17 Jã¹nxe³jut3su² Pau²lah³lo²na¹xai²na² wãn³txa² yxo²ha³kxa¹ txa²hxi²ka² ũ³wha²li¹lhxã³ ũ³hũ¹nx2ta¹wa². Ũ³wha²li¹lhxai²na¹hẽ³ jã¹nxe³sxã³ ũ³wha²li¹le¹nx2ta¹wa².

18 Nxe³na¹jut3su² Je³su² Kris²tu³jah¹lai²na² Txa²wã¹hxi²kan¹ta² Si³yxau³jah¹lo²su² ha²kxai³ thãi³ti³la² a³lxi¹nx2ti³ju³ta² ten³sa³nha²wa². Txai²li² Pau²lah³lo²na¹xai²na² ta³lu²na¹wa².