1 Timoteo

1 Pau²lah³lo²na¹xai²na² ũ³wha²li¹le¹nxa²ha¹wa². Je³su² Kris²tu³jah¹la² ĩ³sa²si¹hã³ũ¹sa²jah¹lo²sa¹wa². Je³su² Kris²tu³jah¹lai²na² wãn³txa² ĩ³hen³txi³si¹ha¹jau³su² ĩ³sa²si¹hã³ũ¹sa³na²hẽ³la². Txa²wã¹sũ̱³nu²kxai³lu² txa²wã¹ẽ¹na² sa²hau³ko³tẽ³jah¹la² ĩ³kwa³na³sai¹ni² Je³su² Kris²tu³jah¹la² wah³nxe³ki̱³jah¹la² ĩ³kwa³na³sai¹ni² nxe³sain¹na²hẽ³la². 2 Nxe³na¹jut3su² Ti³mo²jah³lo²si¹nha²kxai³ ain³kxi²sẽ¹la². Txa²wã¹sũ̱³na² wãn³txa² ain³kxi²sa¹nha²kxai³ txa²wẽ³sũ̱³te²si¹lxa². Nxe³ha²kxai³ Txa²wã¹sũ̱³na² Si³yxau³jah¹la² Txa²wã¹wĩ³nu²su² ha²kxai³ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ nxe³ya³sxã³ kãin² thãi³ti³la² a³lxi²nxa²si¹hi² wi¹lhin¹sxã³ thãi³ti³la² sa²hau³ko³txa²si¹hi² wxa²nxũ²kwa̱i³nãu³a² ã³nhãu²no³txa²si¹hi² nxe³nxa²si¹jau³su² ten³sa³nha²wa².

Wãn³txa² ki³han³jau³su² ĩ³tih³nxe³nyhain¹jau³su²

3-4 Nxe³ha²kxai³ Ma³se³to²na²ko³xa² ai³te³lhxã³ nxa¹hĩ¹nai³tã² e³kxi¹nxa²ha¹tai¹ti²tu³wa². Nxe³nxa²ha¹te³nah¹lxi¹:

— E²fe³so³thĩ³na² hãi¹sxã³ yxau³sẽ¹li¹. A²nũ²a² ĩ²li³te²a² wãn³txa² ki³han³jau³xa² ĩ³tih³nxe³nyhai¹nha³tai¹. Nxe³te²a² ha³ya³kxa² o²la³kxain¹si¹hin¹jau³su² ĩ³ye³kxi¹tai¹nhẽ³li¹. Wãn³txa² ki³han³jau³su² jau³xa² ã³na¹i² wxa²wĩ³na²nãu³xu¹tai²na² he¹ta¹hxai²hẽ¹li¹. Nxe³jau³xai²na² ya²la³tu̱³txa³kxai²nãn²tu̱³ ã³na¹i² nxe³ain¹si¹hin¹jau³su² ĩ³ye³kxi¹tai¹nhẽ³li¹. Nxe³jau³xai²li² a²ẽ¹nãu³ai²na² hxi²kan¹txi³ yxo²ĩ²ki̱³jau³sxa³wa². Yxãn¹ta¹ Txa²wã¹sũ̱³na² wãn³txa² so¹lxi³ hxi²kan¹txi³ yxo²ĩ²ki̱³jau³xai²la¹wa². 5 Nxe³sxã³ wain³txi³ ĩ³tih³nxain¹ki̱³kxai²nãn²tu̱³ a²ẽ¹nãu³ai²na² wi¹lhin¹ju³ta² so¹lxi³ yũ³ha²kxai³ wain³ye¹nxa²ju³ta² so¹lxi³ kãi³ha²kxai³ Je³su²jah³la² txa²wã¹ẽ¹nãu³a² sa²hau³ko³tẽ³ju³ta² yxo²ĩ²ha²kxai³ ai¹nhĩ̱³nx2na³la². Ain¹kxai²nãn²tu̱³ a³lxi²waun¹nyhu¹ki̱³ju³ta² ã²la² kãi²nhĩ̱³nx2na³la². Ju¹tai²li² ten³sa³nha²wa². 6 Yxãn¹ta¹ a²nũ²a² ĩ²li³te²a² wãn³txa² toh³lxi³jau³xa² ain³so¹ain¹ka³tu̱³ wãn³txi³khai³xa² sa²kxai³lu² ã³na¹ain¹na²hẽ³la². Kwa²toh³lxi³jau³xa² ĩ³tih³nxain¹te²ju²hẽ³la². 7 Nxe³sxã³:

— Moi³se²ah³lu¹tai²na² wha²li¹txã³nxu¹tai²na² wãn³txa² ĩ³tih³nxe³jah¹lo²sa¹wi¹. Nxain¹na³la². Nxe³yãn¹ta¹ jau¹xai²na² ĩ³tih³nxain¹jau³xai²na² a³la³kxai¹nxa³ha²kxai³ a²si³yxau³tãu³a² a̱in³nha²nxa³ha²kxai³ nxe³ain¹na³la².

8 Ai¹nha²kxai³ Moi³se²ah³lu¹tai²na² wãn³txa² ĩ³tih³nxain¹jau³xu¹tai²na² wain³txi³ sa²yxo²we¹tain¹kxai²nãn²tu̱³ wi¹te²ju²hẽ³la². 9 Yxãn¹ta¹ wi¹lhin¹tũ̱³ka̱³txi³ki̱³nãu¹xai²na² ĩ³tih³nxe³nẽ³jau³sxa³wa². Yxãn¹ta¹ a²nũ²a² ko̱³nxe³ti³ kãi³te²su² te²na² Txa²wã¹sũ̱³na² ĩ³xa̱n³ta³kxain¹te²su² te²na² a²ẽ¹nãu³ai²na² ĩ³ne̱³wã³nũn³ta³kxi²te²su² te²na² Txa²wã¹sũ̱³na² sa²nẽn¹kxi²nxa³te²su² te²na² Txa²wã¹sũ̱³na² ko̱³nxe³ti³ e³kxi²te²su² te²na² a²wĩ³nu²su² ta̱³nxa² a²hã³ka³nũ²su² ta̱³nxa² ĩ³xa̱n³txa³kxain¹te²su² te²na² a²nũ²a² su²lhã³nyhu¹ki³te²su² te²na² nxe³te²a² yxo²ha³kxa¹ Txa²wã¹sũ̱³na² ĩ³kwa³na³nẽ³jau³xai³tã² ĩ³tih³nxe³jau³nũ³ai²la¹wa². 10 Te²yã¹nxe³sxã³ tũ̱¹ka̱³txa² te²yã¹xain¹nũn³na³la². Kuh³lxa³thin¹khaix1te²su² te²na² in³txi³su² ta̱³nxa² txu¹su² ta̱³nxa² kuh³lxa³thin¹sxã³ ũ³whĩn¹ta³kxi²nyhu¹ki³te²su² te²na² a²nũ²a² ã̱³xa² nũ³kxũn³txi³ kãi³so¹sxã³ kwa²wa³kon³kxi²si¹jau³su² kwa³na³te²su² te²na² ĩ³ki³ha¹kxi²te²su² te²na² a²nũ²a² ĩ³ki³ha¹kxi²sxã³ ko̱³nxe³ti³ e³kxi²nyhu¹te²su² te²na² wi¹lhin¹jau³xa² yxo²kwĩn¹kxi²te²su² te²na² nxe³te²a² yxo²ha³kxa¹ Moi³se²ah³lu¹tai²na² wãn³txu¹tai²na² ĩ³tih³nxe³jau³xai²la¹wa². Nxe³jau³xai²na² yxo²ha³kxa¹ a²nũ²a² wi¹lhin¹te²a² ã²la² sa²yxo²we¹tain¹te²ju²hẽ³la². 11 Yxãn¹ta¹ wãn³txa² wxi²kin³ti³ton³khaix1si¹nhẽ³jau³su² yũ³na¹wa². Nxe³jau³xai²na² Txa²wã¹sũ̱³na² Wi¹lhin¹ta² Si³yxau³jah¹la² ũ³hũ¹sa²jau³xai²la¹wa². Txa²wã¹ẽ¹nãu³ai²na² sa²hau³ko³tũ¹nhẽ³jau³xai²la¹wa². Ĩ³tih³nxe³nxa²ha¹jau³xai³ta³lxa²na³la².

Je³su² Kris²tu³jah¹la² sa²nẽn¹kxi²jau³su²

12 Nxa²ha¹te¹ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ sa²nẽn¹kxi²to³ha¹wa². Ĩ³nũ̱³kxũn³txi³sai¹nha²kxai³ ya³nãn³ta³ki²la²sxã³ wi¹kãi³a¹kxe³su² nxe³ye²sa²jau³su² ĩ³kaix1so¹sai¹nha²kxai³ nxe³sain¹na²hẽ³la². Sũ̱³na² wãn³txa² wi¹jau³xa² ĩ³hen³txi³te³lhxã³ ĩ³kaix1so¹sain¹na²hẽ³la². 13 Nxe³na¹hĩ¹nai³kxai³lu² nxe³na¹hẽ³la². Txa²wã¹sũ̱³na² ko̱³nxe³te²lo³txai¹na¹ha²kxai³ Je³su²jah³la² a²sa³wi³ha³lxa² khãuh³lxa³tai¹na¹ha²kxai³ nũ̱³kxũn³txi³ a̱n³txi³ti³hin¹sxã³ o²la³kxi²na¹ha²kxai³ nxe³na¹hẽ³la². Txa²wã¹sũ̱³na² wãn³txa² ko̱³nha²nxa³ha²kxai³:

— Wain³txi³ kãi³a¹xã¹. Nxa¹jau³tu̱³ ko̱³nxe³ti³ kãi³a¹hẽ³la². Nxe³na¹kxan²ti³ wi¹lhin¹sxã³ thãi³ti³la² sa²hau³kot3sa³na²hẽ³la². 14 Nxe³sa³nũ²la² Je³su² Kris²tu³jah¹lo²kxai³lu² thãi³ti³la² a³lxi² wa³to²hi²ha²kxai³ wi¹lhin¹khai¹nxe³ha²kxai³ yxo²ĩ²si¹sain¹jau³su² ĩ³yau¹ũ³sai¹ni² a³lxai¹na¹ju³ta³nũ³a² ũ³hũ¹sai¹ni² Je³su² Kris²tu³jah¹la² nxe³sa³na²hẽ³la². Ã³nũ²nxi²sxã³ yxau³a³sa³ha²kxai³ nxe³sa³na²hẽ³la². 15 Nxe³na¹jut3su² Je³su² Kris²tu³jah¹lo²su² te²kxai³lu² a²nũ²a² yxo²ha³kxa¹ a²ẽ¹nãu³ai²na² sa²hau³ko³txi² ko̱³nxe³ju³ta² wã³ko³txa³te²tu̱³ sa²wa²su¹txi² nxe³te³lhxã³ wxã³na²hẽ³la². Nxe³te²jai¹ti²tu³wa². Txai²li² kxã³nxa² ko̱³nxe³ti³ kãi³ wa³to²hi² jah¹lo²su² na¹hẽ³la². Ki³han³nxa³wa². Wãn³txi³tu̱³ e³a¹wa². 16 Jã¹nxe³na¹ju³kxai³lu² nxe³na¹kxan²ti³nũ¹ Txa²wã¹sũ̱³na² wi¹lhin¹sxã³ thãi³ti³la² sa²hau³kot3sa³na²hẽ³la². Sa²ju³tan¹te²kxa³ya̱³lhu² Je³su² Kris²tu³jah¹lo²kxai³lu² ya³nãn³ta³ki²la²ha²kxai³la¹ txa²ẽ¹nãu³ai²na² sa²hau³kot3sa³na²hẽ³la². Nxe³ha²kxai³ nxe³hĩ¹nãn¹te²tu̱³ a²nũ²a² ĩ²li³te²a² yxo²ĩ²kxai²nãn²tu̱³ ka³te̱³na² wi¹tãu³a² nxe³ti³hi¹tain¹nũn³tu¹wa². 17 Nxe³jut3su² Txa²wã¹sũ̱³na² so¹lxi³ Txa²wã¹si³yxau³jah¹lai²la¹wa². A²wi¹lhĩ¹nu¹tai²na² yen³kxa² yũ²nxa³hĩ¹nũ¹tai²nãn¹te²tu̱³ Txa²wã¹sũ̱³na² yxau²sa²tẽ³jah¹lai²la¹wa². Hai³txi³ ya³lu²ju³ta² yũ³jah¹lo²sxa³wa². Ĩ²ki̱³sxa³hĩ¹nu¹tai²nãn¹jah¹lo²su² na³la². Hãi¹nxe² sa²nẽn¹kxi²yxau²xai³ki̱³jah¹lo²su² na³la².

18 Nxa²ha¹te¹ Ti³mo²jah³lãi³. Txa²wẽt3si¹lxa². Wãn³txa² e³kxi¹nxa²ha¹jau³xai²na² a̱in³so¹sẽ¹la². Sa²yxo²wet1sẽ¹la². Kxã³nxai³tã² Txa²wã¹sũ̱³na² wãn³txa² e³kxi²tũ̱³ka̱³txai²na² e³kxi²nẽ³lain¹jau³xai³tã² ne³wã²na³txa³hẽ¹la². Ne³wã²na³xan³kxai²nãn²tu̱³ ĩ³nxũ²kwa̱i³lxũ¹txi³nxa²tu¹wa². Nxe³nxa²ha²kxai³ Txa²wã¹sũ̱³na² wa³ka³li³yu³ta² wain³txi³ o²la³kxin¹tu¹wa². 19 Ã³na¹sxã³ yxo²ĩ²nxã²nxa³lho³la². Wxa²ẽ¹nãu³ai²na² wain³txi³ ĩ³ye³kxi²nha¹tu¹wa². Nxe³to³ta¹ a²nũ²a² ĩ²li³te²a² Sũ̱³na² wãn³txai²li² nxe³wã²na³ai¹nha²kxai³ yxo²ĩ²ain¹ju³ta² ne³wã²na³ain¹na²hẽ³la². 20 I³me³ne²u²jah¹la² A³le³syãn²trah¹la³ nxe³ya³sxã³ te²yã¹nxe² kãi³ain¹na²hẽ³la². Ai¹nha²kxai³ Sa³ta³na²jah¹la² hxi²ka² ũ³hũ¹ai¹na¹hẽ³la². Nxai¹na¹ha²kxai³ Txa²wã¹sũ̱³na² a²ĩ³lxa² ko̱³nxe³ti³ e³kxain¹jau³xa² ã³na¹si¹hai¹na¹jau³sa².

1 Timoteo 2 ->