1 Damanina ba God sapama ba dobu kamonai awaika ereonowana bubausi yai i wose roboisi. 2 God ana saibira i wosewosei wai i wose roboi. Ba kao nima masiyana ba ruwamo kamonai i yakam.[~1~]3 Ba kao kana bi nima masiyana ba ruwamo God i gaireni ba, kona wai kao kaobaisiyena basuna kona maranai ana saibira ereonowana i kakabi ba i yakam. 4 Nikona wai Bada God mekabage sapama ba dobu i wosisi wai, rurutuwina.
Adam ba Eve
Kona maranai Bada dobu ba sapama i wosei, wai keyama ba sinamona, 5 kega si rutiti. Basuna Bada God kusana kega i porai ku dobu. Ba kega kotoi i mamana ba tano ita bagibagiyei. 6 Ba okowa dobu ai si rubusira si gae ba tano tepana ereonowana i piyapiyai.
7 Ba Bada God sebare tano momokarinai i wosei, ba yasibe yawayawasina niu niponinai i baini, ba sebare i pipiya.[~2~]
8 Ba Bada God Eden ku maramatana mena masawa i terei, ba sebare i wosei wai namai i terei. 9 Ba Bada God keyama bibisaka ereonowasi i wosisi tano ai si rutiti si gae, keyamisi uwasi wai, mata kirokirorosi ba gairesi. Ba yawasa keyamina[~3~] ba kuira gairena ba goyona keyamina wai masawa basunai si bimsiri.
10 Ba okowa Eden kamonai i kasibau masawa binubanubaina kairavina, saba namai i ruragei wai kawana asi bata. 11 Okowa kawana kesana wai Pishon, Havila kupurina i verabauni, gold e mamana wai kupurina. 12 Ba kona kupurina kana gold wai i gaire saki ba bane puguna maragasina bedilin ba akima kaimasavina onyx wai yebo namai. 13 Ba okowa bairuwaina kana waba wai Gihon. Cush kupurina i verabauni. 14 Okowa bitonuina wai Tigris, ba i vera barabara ku maramatana mena ku Asshur. Ba okowa kawana kana bi bata wai, Euphrates.
15 Ba Bada God sebare i yauni ba Eden masawina kamonai i terei, bagibagina ba potaina kairavina. 16 Ba Bada God sebare i kaotunetunei i wona, “Nikosi keyama masawa kamonai kuna kam kwatakwatama, 17 Saba kuira gairena ba goyona keyamina uwana wata, kega kuna kani. Kuna kani wai, kuna rabobo.”
18 Ba Bada God i wona, “Kega i gaire ba, sebare ikesina ina mana, kana bibaita ana wosei kata, ina rupotai.” 19 Ba Bada God tano ai aba payapaya ereonowasi ba manu ereonowasi i wosisi wai i botuvisi Adam kurina, ba kesakesasike kasi waba ita bineisi. Ba aba payapayaya ereonowasi meo waba i berebereisi wai, damanina, nanakasike kasi waba. 20 Ba sebare aba payapayaya ereonowasi kasi waba i bine, aba payapayaya manamisi, manu kaidamonai ba garagara aba payapayayisi yabata. Saba Adam wai kega kana bibaita kabitam i panani.
21 Damanina Bada God sebare i wosei i kenouwapa i dauwa i rabobo ba i dudauwa maranai, gabagabanai sirikena i botaveyei, ba biyo ai gawarina i gudu potai. 22 Ba Bada God sebare sirikenai wasike i wosei ba i botuwei sebare kurina.
23 Damanina ba sebare i wona,
“Niko sirike wai yauku mom sirikeku,
ba biyo wai yauku mom biyoku,
ana yorei wasike
basuna kona sebare karinai i botu.”
24 Kona kairavina sebare tamana ba sinana ini sumarisi, ba kaowana yabata sini kapuisi ba sini biyo kesana.[~4~]
25 Sebare kaowana yabata ere nimanimasi si mamana, saba kega si sinimaya.
