1 Damanina ba Bada, Moses kurina i sisiya, 2 “Niko bodu nawaravina ba yebo kaona dagudagunai Tabernacle ke bowai. 3 Ba au kairuwana asi 10 akimisi kiuwana ku Bidamanina Maragasina Dedewagina kamona ba gawara kaobaisiyena kana tupapapara ke wosei kata Dedewagina ina sowoi. 4 Pesapesa ke botuwei kuna terei ba kana sawara si wose wai ereonowasi ke taura kabitam, ba yebo kibe kana aba bimsimsiri ki totori ba kibesi ku tepana ke taura. 5 Pugu gairena kana kapukapuna, raunabonabona gold yai ko wosei wai, Bidamanina Maragasina Dedewagina naonai ko terei, ba kana tupapapara matam ketanai ko terei. 6 Suwara kapukapuna raunabonabona God ana Tabernacle naonai ko terei. 7 Tabernacle ba raunabonabo basusi yai, kaboma kaikapona ere okowina ko terei. 8 Tabernacle ba raunabonabo ke gara bibiri ba matam ketana tupapapara ki rorokei.

9 Ba wairoro ke yauni ba yove ba sawara ereonowana kamonai ki boroi ba ke bobaisiyei, kata kona kaobaisiyena ina mana. 10 Ba yebo suwara kapukapuna raunabonabona ba sawarina ereonowana ki boroi, ba ke bobisiyei kata kosi wai kaobaisiyesi. 11 Bosuwana kabomina ba kana aba bimsiri yebo yabata ki boroisi ba ke bobaisiyeisi.

12 Aaron natunatuna yabata ke botuvisi ku Tabernacle matam ketina ba okowai ki yekaisi. 13 Ba Aaron gara kaobaisiyenai ki garai, ki boroi ba ke bosairei kata priest rutainina yauku ina bosaibiriku. 14 Natunatuna ke botuvisi ba kasi garai ki garaisi. 15 Damanina ba tamasi rutainina ki boroisi kata kosi au priest ba sina bosabiriku. Kata kuni biboroisi wai kosi priest saibirina kamosi yai ini garubonebonei.”

16 Moses Bada mekabage i kaotunetunei wai ereonowana nanakasike i wosei. 17 Damanina ba, bodu bairuwaina ba nawaravi dagudaguna, kaonai Tabernacle si bobimsiri. 18 Moses Tabernacle i bokabari maranai tukeke kasibimsimsiri i totorana ba tupabona i taura ba i sogai ba ariri i totorana. 19 Kata Bada i kaotunei wai, yove korarina i yabara potai ba Tabernacle tepanai aba payapayaya kwapirinai i sowoi.

20 Kata Moses kairuwana akimisi petapetasi ruwamo ku Bidamanina Maragasina Dedewagina kamona i uwana, ba kana pawo ku kapi i tupasusurana ba piragagoyo pupuna taveyina gawarina i kasitawani. 21 Damanina ba Bidamanina maragasina dedewagina ku Tabernacle kamonai i terei ba i tupapapari. Bada i kaotunei wai, nanakasike Dedewagina i kasipapari.

22 Pesapesa yebo Tabernacle kamonai ku yabarata mena gawara kaobaisiyena parinai i terei, tupapapara garana kupunai, 23 ba bread tepanai i terei, suwara Bada kurina, i kaotunetunei wai nanakasike.

24 Kibe kana bimsimsiri Tabernacle kamonai i terei ku yawara mena pesapesa sepinai, 25 damanina yebo kibe i kapuna Bada naonai, Bada i kaotunei wai nanakasike.

26 Ba yebo runabonabo gold yai si wosei wai Tabernacle kamonai tupapapara naonai i terei, 27 ba bane i kapuni Bada i kaotunei wai nanakasike.

28 Ba Tabernacle matam ketanai tupapapara garana i rorokei. 29 Suwara kapukapuna raunabonabona Tabernacle matam ketana parinai i terei kata tepanai suwara kapukapunisi ba grain suwara kapukapunisi berena kairavina, Bada i kaotunei wai nanakasike.

30 Bosuwana kabomina wai Tabernacle ba raunabonabo basusi yai i terei ba kamonai okowa i sewai. 31 Moses ba Aaron, natunatuna yabata namai yarosi ba kaesi si bosuwana. 32 Maranai si riuriu ku Tabernacle kona ku raunabonabo wai, yarosi ba kaesi si bosuwana, Bada Moses i kaotunetunei wai nanakasike.

33 Ba yebo Moses Tabernacle ba raunabonabo i gara bibiri ba matamketana i tupapapari kata i gudui. Damanina ba Moses saibira i kakabi.

34 Ba guba Tabernacle i sowoi ba Bada ana kadara i bonuvi.[~1~] 35 Moses kega rubana ita riu ku Tabernacle kamona kairavina guba i sowo potai ba Bada ana kadara i bonuvi. 36 Maranai guba Tabernacle tepanai ina bokabari wai Israel biyisi wagawaga sina dagui, 37 ba abisiri yai guba kega ina gae wai, sina mamana yepo guba ina gae wai sina tauya. 38 Mamanina asi wagawagana kamonai Bada ana guba kaoai wai Tabernacle tepanai si kitakitai ba pomai wai keyama kaikarakarasina guba kamonai si kitakitai.