Exodus 32

Cow Natuna Gold yai si Wosei

1 Maranai si kinana kabakaba kata Moses koyai i bi metewa wai, si botu Aaron kurina si kesanisi ba si wona, “Ke botu ama god kuna wosei kata, kona ini naovikai. Ba niko sebare Moses Egypt kamonai i urabaikai ka botu nina, ba i tere bigaruikai wai kega ka kuiri awaika i tupuwa kurina.”[~1~]

2 Ba Aaron i kaobeyisi i wona, “Kaokaowami bibaine ba natunatumi sebasebare ba bibaine kasi taina komakoma gold yai si wose wai ko bo tavetaveyana ba ko yauna ko botu kuriku.” 3 Kata pipiya ereonowasi kasi taina komakoma gold yai si wose wai si bo tavetaveyana ba si botu Aaron si berei. 4 Ba Aaron taina komakomasi i yauna ba i kapuna si nubanuba ba tarabibisaka cow natuna rutainina i wosei.[~2~]

Ba maranai si kinani wai si yogoi ba si wona, “O Israel, niko god Egypt kamonai i uraba kasibauvita!”[~3~]

5 Maranai Aaron nikona i kinani wai bull natuna naonai raunabonabo i bowai ba i yonayona, “Maram wai Bada kurina tana poraga.” 6 Maratom didibarinai pipiya asi suwara kapukapunisi ba nuwanuba suwarisi aba payapayayisi si kapuna. Ba si makira si kam yogoyogo ba si tomatoma neganega, ba sibi kakaiwaka wose.[~4~]

7 Ba Bada Moses i wonei, “Ke gakira yagiyagina, kairavina am pipiya Egypt yai ku uraba kasibauvisi wai kosi te boneganega tebi kakaiwaka wose. 8 Kosi au kaotunetune a wonisi siti sununuri wai ketana si siwani, ba gold yai bull natuna si wosei ba kona te bopepetei. Ba te wonawona, ‘Israel biyimi, nikona wai ami god kona Egypt kamonai i naovimi ko kasibau.’ 9 Nikosi pipiya a kinanisi i kakaba.” Bada Moses kurina i wona, “Ba kosi asi bi kawakasekase wai, a kuiri. 10 Kona kairavina ke boteriku. Au yagisi damina sina yauni. Yauku ana reso bigarugaruisi ba ana kasibigoyonisi. Ba kosi wasasi wai, muri yai kom kamomi yai dam kaikapona ana wosei.”

11 Saba Moses Bada ana God kurina i baba kuwakuwayei i wona, “Bada, awaika kairavina am pipiya kurisi ke biyagisi, kom am maragatai am pipiya Egypt kamonai ku urabaisi si kasibau. Kona kairavina kega kuni yagisi ba kuna kasibigoyoisi! 12 Memena bage Egypt biyisi sina kayo wona, ‘Ana nota goyona wai, Israel biyisi i uraba kasibauvisi ku koya mena, kata niko dobu ai iti kakabisi.’ Am yagisi ke boterei, ba ki nuwanuwanisi, ba kega goyona am pipiya kurisi ke wosei. 13 Am saibisaibirisi Abraham, Isaac ba Jacob ke nosisi, kom ikesim mom ku wona, ‘Am rakaraka ana wosisi sina rakata saki, bage gwamegwame sapamai, ba niko dobu wai iti karisi yai asi buderi yepo mara ku damona.’ ”[~5~] 14 Kata Bada i nuwabirabira ba Israel biyisi i nuwanuwanisi ba kega i kasibigoyonisi.

15 Ba God ana kairuwana akimisi ruwamo naonai ba murinai i kiruma ba Moses i berei ba koyai i kabara i gaikira. 16 Nikosi akima petapetasi wai God i wose wai, ikesina mom i kiruma.

17 Maranai Joshua pipiya si rasarasa ba sibi kwaributu wai Moses i wonei, “Nonorina bage abiya kwanatu kamonai i tupuwa.”

18 Ba Moses i kaobeyei i wona, “Kega bimaragata rasana kona getawana rasana saba nuwagaire taborina a nonori.”

19 Maranai Moses i botu ku basekwa parina, ba bull wotuna si wosei, ba si rikuriku i kinanisi wai, i yagisi saburere. Ba akima petapetasi koya gaburinai i garugaru ku tano ba si kasigaoworana. 20 Ba bull wotuna si wosei wai i yauni ba keyamai i kapuni, ba i kasigudagudai i isara ba i garu kirei ku okowa ba Israel biyisi i kaomainimainisi si tomani.

21 Ba Aaron kurina i wona, “Nikosi pipiya mekabage si wosim wai, kui naovisi niko piragagoyo kaikapo sakina ko wosei?”

22 Ba Aaron i kaobeyei, “Au bada, kega ki yagisi kuriku, nikosi pipiya ku kuirisi kata piragagoyo wai asi nuwaonowana. 23 Kona kairavina kosi si woniku, ‘Ama god ke wosei kata kona ini naovikai. Ba niko pipiya Moses, Egypt kamonai i urabaikai ka kasibau wai kega ka kuiri awaika kurina i tupuwa.’ 24 Kata a wonisi, ‘Kotoi wata gold karimi yai wai ke botaveyei kuna beriku.’ Ba si beriku wai ku keyama karakarasina ai garu gegeyana ba kosi kamosi yai bull wotuna i tupuwa.”

25 Moses i kitai kata Aaron pipiya i kita bigaruisi si veravera kwatakwatama ba kasi abiya matasi yai si bigigima meyisi. 26 Kata Moses basekwa matam ketanai i msiri ba i parara, “Kotoi wata Bada kairavina wai, ke botu kuriku!” Ba Levi biyisi ereonowasi si notuwa kurina.

27 Damanina ba Moses kurisi i wona, “Bada Israel asi God nikasike e wonawona, ‘Ereonowami ami seri ko yauna ba niko basekwa kona riu roboi, niko mutunai kona dagui ba kona nae no ku mutuna, warewaresimi, turaturami ba maturaturami ereonowasi koni kasibunuwana.’ ” 28 Kata Levi biyisi Moses i kaotunetuneyisi wai si wosei, kata kona kaonai, wai pipiya 3,000 rubana si rabobo. 29 Damanina ba Moses i wona, “Komi karaku Bada i bosairimi kairavina natunatumi ba warewaresimi kega ko gegenuvisi wai niko kaonai i gairenimi.”

30 Kata mara i tom wai Moses pipiya kurisi i wona, “Komi piragagoyo i rakata saki ko wosei, wai karaku yauku ana gae Bada kurina, ba ani babai ami piragagoyo meimei bage ina notataveyei.”

31 Damanina Moses i veramaga i gae Bada kurina ba i wona, “Bada, nikosi pipiya piragagoyo i rakata saki si wosei. Kosi yebo gold yai asi god si wosei. 32 Ba karaku a bibaba kuwakuwaim asi piragagoyo ke notataveyei, ba kega wai yauku sarobina ana kabari.”

33 Saba Bada Moses i kaobeyei i wona, “Kega, iyabosi wata piragagoyo si wosei kuriku wai, kosi wata kasi waba au buka kamonai ana kasipupuna.[~6~] 34 Ba karaku ke nae, ba au pipiya ki naovisi ba a wonim wai kona ku kupurina. Au aneya ini naovimi. Ba saba saroba kana mara ina botu wai, kona maranai piragagoyo kairavina saroba ana berisi.”

35 Kata Bada gubaga goyona mom i porai, pipiya kurisi kairavina kosi bull natuna Aaron i wosei wai, si bopepetei.

<- Exodus 31 Exodus 33 ->