LIIPA ORA SIRIM 5

5:1-5 Jon-ni Buk Te Wakaye Monjuku Tambu Siringele Kanurum Temanele

1 Penga na kanurundu kene yi nuim kingeliinga poluna mulurum yili yunga ki-bokundu buk kumú-tuli te lirim kanurundu, akiliinga olakundu maniakundu wasie bi mare molupa, wale angere yupuku-guli wakaye monjuku tambu siring. 2 Kanurundu kene angkella tondulu puli te mulurum kanili-ni tondulu nangale topa kene nimba mele: “Yambu nae molupa konjulimále-ni buk kumú-tuli wakaye monjuku tambu siringma manda wendu liimbaye?” nirim. 3 Akiliinga-pe mulú-koleana kepe ma-koleana kepe mana sukundu kepe yambu te-ni kapula wendu liipa, sukundu bi mulurumuma kapula kanomba yambu te molupa aima konjulimú yambu te naa mulurum. 4 Kanu-kene yambu te molupa konjupa kene manda buk kumú-tuliele wendu liipa kanomba yambu te naa mulurumeliinga kanupu kene na kola pulele tirindu. 5 Kanu-kene yi-nuim tokapu-tilu muluringmanga te-ni nandu nimba mele: “Kola naa ti! Pília! Juda-Talapeliinga Lopa-Pus LLayon, yi nuim king Depit-ni kalupa liirim yili, yu-ni tondulu mundupa ele-túli ⸤kamu⸥ topa mania mundurum. Yi akili molupa aima konjulimále-ni bukele wakaye munjuli angere yupuku-guli manda wendu liipa sukundu kanomba.” nirim.

5:6-10 Jon-ni Kung-Sipsip Walále Kanurum Temanele

6 Kanu-kene na kanurundu kene Kung-Sipsip Walú te ⸤angiliirim⸥ kanurundu. Yu kung-sipsip toku konjuku nosulimele mele yu aku-sipa molupa, yu yi nuim king polaliinga ai-suku-singina angiliirim. Méle kona mululi angere kene yi-nuim tokapu-tilu kene yu liiku sukundu munduku enini molku liiku poku tiring. Yunga pengína ola kung-kao gu mele angere yupuku-guli wendu omba angiliipa, ⸤yambumanga⸥ mong ⸤mele⸥ angere yupuku-guli angiliirim, mong kanuma Pulu Yili yunga mini angere yupuku-guli yu-ni ma-koleamanga pali liipa mundurum akuma. 7 Kung-Sipsip Walú kanili yu omba yi nuim king poluna mulurum yilinga ki-bokundu lirim buk kumú-tuliele liirim. 8 Liirim kene méle kona mululi angere kene yi-nuim tokapu-tilu kene yunga kumbi-kerina mania molku tamalu piring. Enini lupa-lupa gita mele mare ambolku, pllet ku-gollu-ni tili, akuna paura kaluring kene mura aima turum paurale peka lipili ambuluring. Paura akuma Pulu Yili-nga yambumanga pali Pulu Yili popu toku mawa telemele ungma. 9 Enini konana kona te niku kene niku mele:

“Nu toku kunjuring kene

yambu ung lupa-lupa lílima kene,

kangi lupa-lupa kulúlima kene,

talape lupa-lupama kene,

kolea lupa-lupa molemelema kene,

nunga memale-ni

Pulu Yili-kene tapú-toku mulungí kupulanumele

akisinjurunu akiliinga,

nu-ni buk kumú-tuliele kapula liikunu

wakaye munjulima wendu liini.

10 Nu-ni ‘Yambu kanuma oliunga Pulu Yili-nga

kongunale tenjangi.’ nikunu

‘Pulu Yili-nga popu tunjuli yambu

Pulu Yili eninga yi nuim kingele molupa

enini nokumba yambu-talapele molangi.’

niku tirinu, akiliinga

enini yi nuim kingima molku

ma-koleana mélema nokuku mulungí.”

niring.

5:11-14 Kung-Sipsip Walále-nga Bili Paka Tonjuku Kape Niring Temanele

11 Penga kelepu kanurundu kene angkella aima pulele ung niringma piliirindu. Angkellama kambu tolkumulanje tausen kelepu olandupa tausen nimbu, million kelepu olandupa million nilkumula. Akuma yi nuim king polale kene méle kona mululi angere kene yi-nuim tokapu-tilu kene akuma liiku poku teku sukundu munduku muluring.

12 Angkella akuma-ni tondulu munduku kene niku mele:

“Kung-Sipsip Walú ui toku kunjuringelendu

yambuma-ni pali niku mele:

“Yu yambuma nokumba tondulale kene

yu kamako molumba méle lupa-lupa kaíma kene

piliipa kungnjuliele kene tondulale kene

yu-kene pepa kapula tepa,

yunga bili aima ola pepa,

tondulu talang puliele yu-kene pelemú.” niku

yu ‘angke’ niku kape ningí kene papu.”

niring.

13 Kanu-kene mulú-koleana molemele mélema kepe,

ma-koleana molemele mélema kepe,

mana sukundu molemele mélema kepe,

numú-kusana molemele mélema kepe,

koleamanga pali molemele mélema-ni niring mele piliirindu. Enini niku mele:

“Yi nuim king poluna molemú yili kene

Sipsip-Walále kene elselendu

“ ‘Molku kunjangli!’ nimbu taki-taki kape nimbu

bili aima olandupa pepa,

tondulu talang puliele kene

yambuma nokumba tondulale kene

kam-kamu elsele-kene pepa mindi pulimú pumba.”

nimbu molamili!”

niring. 14 Aku niring kene méle kona mululi angere-ni niku mele: “Aima aku-sipa wendu upili!” niring. Yi-nuim tokapu-tilu-ni mania molku tamalu peku kape niku elsengla bili paka tunjuring.

<- LIIPA ORA SIRIM 4 LIIPA ORA SIRIM 6 ->