Link to home pageLanguagesLink to all Bible versions on this site
33
Godɨn ziam fer onger akam
1 Ia gumazamizir aghuiba, ia Ikiavɨra Itir God ia bagha amizir bizir aghuim bagh bar akongegh.
Arazir kam bar dera:
ia an akam baragha an gɨn zui darasi, ia an ziam fɨ.
2 Ia kulele ko gitan stringɨn 10pla itim mɨsogh,
Ikiavɨra Itir God bagh ighiam damu an ziam fɨ.
3 Ia onger akar igiaba osirigh da bangɨ,
egh deragh gita mɨsoghtɨ an ararem deraghtɨ,
ia bar akongegh pamten dɨm mɨkɨm.
 
4 E fo, Ikiavɨra Itir Godɨn akam a guizbangɨra iti.
Ezɨ an akam mɨkemezɨ moghɨra, a zurara guizɨn arazibar gɨn ghua ingangariba bar dagh ami.
5 [~1~]Ikiavɨra Itir God, a en arazir aghuiba ko guizɨn araziba bar dagh ifonge.
An apangkuvir arazim, nguazimɨn itir gumazamiziba bar me ave.
 
6 [~2~]Ikiavɨra Itir God fomɨra mɨkemezɨ, aruem ko iakɨnim ko mɨkoveziba,
ko overiamɨn pɨn itir biziba bar otivigha iti.
7 [~3~]Gumazim dɨpam isa itam guruizɨ moghɨn,
an ongarim isa danganir vamɨran anekufa.
Egha ongarim gamizɨ a bar konegha
nguazimɨn apengan itir danganimɨn vɨn mar iraghu.
8 Ia nguazimɨn itir gumazamiziba,
ia Ikiavɨra Itir Godram atiating an apengan ikɨ.
9 [~4~]A mɨkemezɨ nguazir kam puram oto.
An Akar Gavgavim mɨkemezɨ, biziba bar nguazir kamɨn otifi.
10 [~5~]Kantrin Igharazibar Gumazamiziba damuasava nɨghnɨzir biziba,
Ikiavɨra Itir God dagh amima da ghua puvarɨsi.
Ikɨzir igharaziba damuasa akabav sozir mɨgɨrɨgɨaba,
an adar tuaviba apɨri.
11 [~6~]Ikiavɨra Itir God damuasava amir biziba,
da gavgavigh mangɨvɨra ikiam.
A uan navir averiamɨn aven itir nɨghnɨzim giraghan kogham.
An nɨghnɨzim zurara ikɨvɨra ikiam.
12 [~7~]Kantrin tam God baghavɨra ikɨtɨ,
Ikiavɨra Itir God deravɨra a damutɨ a bar akongegham.
Kantrin kamɨn gumazamiziba
God ua baghavɨra me ginaba.
 
13 [~8~]Ikiavɨra Itir God uan Nguibamɨn ikia,
nguazimɨn itir gumazamiziba bar men gari.
14 [~9~]A uan Nguibamɨn ikia,
egha nguazimɨn bar deragha en gari.
15 [~10~]A uabɨ nɨghnɨziba ko navir averiabar ingarigha da isa gumazamizibagh arɨki,
egha bizir me amiba a bar dagh fo.
16 [~11~]Atrivim mɨdorozir gumazir avɨriba ikɨtɨ,
me an akuragh mɨdorozim damu an apaniba abɨraghan kogham.
Ezɨ kamaghɨra mɨdorozir gumazim uan gavgavimɨn apaniba abɨraghan kogham.
17 [~12~]Mɨdorozir hoziam mɨdorozir gumazimɨn akuraghtɨ, a uan apaniba abɨraghan kogham.
Apaniba mɨdorozir gumaziba abɨraghtɨ, men hoziaba men akuraghan kogham.
18 [~13~]Ia oragh! Gumazamizir Ikiavɨra Itir Godɨn atiatia an apengan itiba, an damazim men iti.
Gumazamizir kaba, me nɨghnɨzir gavgavim an apangkuvir arazimɨn iti.
19 [~14~]A deragh gumazamizir kabar gantɨ me angamɨra ikiam.
Mɨtiriam aghamin dughiam otoghtɨ,
a men akuraghtɨ me daghem bagh ovengan kogham.
 
20 [~15~]E Ikiavɨra Itir God baghvɨra mɨzuamɨva,
nɨghnɨzir gavgavim an ikɨtɨ an e geghuvam.
A en oramɨn mɨn iti,
ezɨ e an aven modima a en akurvasi.
21 E nɨghnɨzir gavgavim an ziar bar zuezimɨn iti.
Kamaghɨn, e uan navir averiabar aven a bagh bar akongegham.
22 O Ikiavɨra Itir God, e nɨghnɨzir gavgavim nɨn ikiavɨra ikia nɨn akurvazim bagha mɨzuai.
Kamaghɨn amizɨ nɨ en apangkuvigh mamaghɨra ikɨ.

<- Onger Akaba 32Onger Akaba 34 ->