Lebelesen 4

Nakaia unangai abilim ut blibi Gode niniino dobtouleb bliba yatemibiobe.

1 Weng olo onebo blimanoa omito ne temia abilimo amisalo betelanoa eka weng mako sino bigul weng dikine obabiba wentibuo baanoa Kobo ute asal ele tleba ne inamin namino mitdanoa tam tlamabo alebkenano gesoa wentena bia 2 hebmamsab Hobe nemeb utnea abilim ut dasea temia komokwali biino dimo naka make toumbia atemie 3 e kibio makob tomo moni sumo yasba esa eka tom ilemo konilian osa o undim inamin dat genebua kwese komokwali biino ge omfakanebua watemibe. Kwese ele itanasitobe. Makob tome niniino emelale undim inaminobe. 4 Biino 24 o komoke biino kwese ge omfakabio haleb wat danoa watenoa tib ele geka binoa ge dofakabua komokwali biin olo dimo toula blibi youmo namabe. Eka i gabamono komokwali has golo otabbaibbiobe. 5 Komoke biin toumbie wato timine balala genea ame ngambianea ayalo 7 o komoke biin olo kibi kaba sin ye bomat ge tububua watemio ayalo 7 olo Gode Hobe titilo 7 o bibabu etabe. 6 Komoke biino kibi kaba sin dao aamuk beselibe mousia inamin naminao blim makob aakikit inamine bining genebiotabe. Eka inamin namin maki asuke asuke na ele blib eli afen smiksabe.

I komoke biin olo ge omfakanibbua yatemi eli kino homonobe. Kibi kaba sin da osa abuk da osa alukum kino unabuau benobiotabe. 7 Mak ele makob til laione ulabobe. Eka mak ele makob eil blumakau imake ulabobe. Eka mak ele makob nakai kibisabe. Eka mak ele makob wan fifil dlobumin sume ei unang genea belo tebetalonabe ulabobe. 8 Elekiem elekiem i belo 6 obe. Eka i bel osa kinsabe. I belo dang da osa ablan da osa kino unabuau benobiobe. I tab dim osa kwinomo dim osa amitie anso ngambianiba

God Sume inamin namino titilsabo, elekiem eleta kiningobo, elekiem eleta kiningobo, elekiem eleta kiningobo, sino binabebua eka memalosa biebo, sinanomosa biamabebo ge ngambianiba

9 Gode biin dimo toumbie niniino dobtouleb bianiba obianiba Ayamobo, e naka sbalobo, e amit ninobo ge ohabiba 10 eka komokwali 24 i e biin dimo toumbio kikib ele aala unaniba kintalin nakae biin dimo toumbi ele niniino dobtouleb bianiba i has golo gabam otabbumino deloniba komoke biino kikib ye olasiba yatemnia tekein kenia I titil olo God esu data tlobo geibiobe. I inaniba anso ngambianiba

11 Kobo God ni Sumobo, keb kukubo ayamobo, ni keb niniino kemtouleb nob mole ayamobe. Ni oke bianoba Kobo naka sbalobo ge okemob osa ayamobe. Eka ni oke bianoba Kobo Sumobo ge okemob osa ayamobe. Niminbabe, kobo inamin namino abilim uto bu osa eka dabalim olo bu osa klanebbiobe. Kleb bobol tem funin ye funaneba Ne inamin namin olo klanano geneb kesoa inaneba klanebbiobo ge ngambibta yatemibe.

<- Lebelesen 3 Lebelesen 5 ->