Profet Esekielgo Po Asęai Buku 9

Godigo Jerusalemba dwai dene mawai

1 Godigo ena dali wali po silama da, agai bomonama i weyu, te tama wali, “Te taunde bidaluali we bidi dabe elibo sę yabo bidi dabe, dage asiąo. Te bainat hwą dabe dali sesao,” po wai. 2 Te polo mu tama, te not badu te Godigo be obo bagulali badu te bidi nogo a naga, me deli te tomoba asalio. Tigidaligo te bainat hwą, me te bidi elabo gasa nai dabe sela asali. Te gasa bidi me augwali dali asali. Aga te wiegi yai ugwa bea selama, tama aga dwasianu gamugi dage te kukulude kęą salio. Te asęabo doado bage te gamugi dage tomode elaluali. Te tigidali bidi aselama, augwaligo te brasgo nigali alta sai pąba dolagasalio.

3 Tialima, te Israelgo Godigo genuai ulago te bidi tiwai me si me si nai tagalama, te ula hogodasa pelama, te Godigo be sunumi pąba palio. Tama Genuai Bidigo te wiegi yai ugwa elalubo bidi i olama, 4 tama agabolo te tama i walio, “Nage te Jerusalem taun pedai tigidaliba pelama, te augwa abagi dabego te taun tomode dwai kolesaga ebaso, te dwai haliga eyu, te moni homu ebo we bidi tigidalide nago te augwali gesabidide te dąį muna muna pao,” po walio. [~1~]

5 Tialima, eno odali, Godigo te bainat hwą tolalubo bidi a naga, me deli bageba te tama po wabo odali, “Dagego aga wali pelama, te tigidali we bidi ela muao. Dagego te me delide te olo tau mabo wiegi yai kolesaga eyu, me sula tagalama me bidimainu elamu dao. 6 Tigidali monu dabe ela muao, te tigidali gesi ogwa bidi me, gesi wegi ogwa we me ela mubadi yao, te ida dabe, te wai puluba me, tigidali mu elao. Tiali goli, dagego te eno augwali gesabidide dąį ilali bidi ma we me deli, te munu me elamuo. Te eno bede bidibo bidi dabe augwali bolo hasia ela muao,” wali. Tama tialima, augwaligo te sę gagalama, hasia augwaligo te Godigo be pąde bidibo tobolu bidi dabe ela muai dao. 7 Tama Godigo te nogo a naga me deli te bidi dabebolo te tama po wali, “Te eno be bagulali obo tomode bidibo bidi tigidali ela muao,” po wali. “Te tama tibaso da, eno be ena gedude meda yai mu pedelaibao. Te sę silama da, teda dage te taunde bilaluama, te tigidali we bidi ela muao. Ae, dagego sę iyąo,” te po wali.

Tialima, augwali pelawalio. 8 Tama augwaligo te we bidi elala pali sogo, ena deli naga te Godigo be pąde bidai. Te eno kidu sugunama, te eno gesabidi tǫba pogulama, te eno i te tiwai wali, “God Genuai Bidio, nago te Jerusalem we bidi augwaliba wado po genuai mu ebao, bidigo wę gelebo tiwai ebao. Te tiwai homu ebaso, tama te Israelde bidalubo we bidi tigidali silaiba homu eyu eba, agawe?” 9 Tama Godigo te tiwai po wei ponani, “Te Israel me Juda we bidi dabe augwaligo dwai sę hauwa mu elama, te augwaligo yali sę page genuai mu elalubao. Augwaligo tǫ kantri te eno augwali tagalali da homu elama, te eno augwali homu kone munu ma ebe homu eyu, te augwali eno sube homu yali. Tama tiyu, augwa te dwai kolesaga hauwa mu ebaso, te Jerusalem we bidi ela mubadi, te gasa tǫ kantri pedai bage me tigidali ela muai dao. 10 Tama tibaso, eno augwalide te homu dene elama tau sabo kolesaga eyu, te eno augwali me deli gogola sula me tagalogobeo. Menio. Te augwaligo gasa bidi dabe augwaliba yali dwai kolesaga tiwai te eno augwaliba me yaibao,” te po wai dao. 11 Genuai Bidigo po ola silibo si da, teda eno suali, te wiegi yai nami ugwa elalubo bidi ma aselama, te Genuai Bidiba te tiwai po wali, “Eno te nago enabolo mani sę siminani dao,” te po wai dao.

<- Profet Esekielgo Po Asęai Buku 8 Profet Esekielgo Po Asęai Buku 10 ->