Polgo Hasia Pas Deli Korin Dabeba Asęani 3

Godigo po pusubo bidi da te Godigo sę ebo bidi dao

1 Tama tialima, ama dedeo, polobadu eno digi dagebolo mani po te eno dagebolo te Tedali Mobo Bidi elalubo bidi dabebolo mani po tiwai gilama me mabeo. Usubeo. Menio. Eno dagebolo mani po te eno te poloba homu elalubo bidi dabebolo mabo po tiwai mani. Te sogo dage te Kraisgo kolesagade kuna konesiąyu tama te wai bǫų tiwai bidibadi tiwai dao. 2 Eno po digi po begelama obao. Dage te Krais wali pabo kolesagade wai bǫų tiwai bidibaso, te eno po dagebolo ola mobadi, eno te yadala pai po naga dage ola mani, te wai bǫų ame pe mabo tiwai. Eno te dili yai nai dage mabeo. Te sogo dagego te dila pai nai tuabo ąǫ isąwai, dagego Godigo sęgę yai po sabo usube. Megi me dage usu yabo me elalubao. [~1~] 3 Magi baso meni, dage te poloba meda yai homu kolesagade me bididubao. Awe, te ama hasi dali dwai homu eyu tama konila po wabo homu kolesaga te dagede me elalubao. Tama te kolesaga dagego me idubo, te poloba dobo homu kolesaga ebao. Te tama tebo kolesaga te tǫde bidigo ebo kolesaga naga dao. 4 Dage tomode bidi me badu deli deligo te po wabo, “Ena Pol wali pabo dao.” Tama gasa bidi me badu deli deligo te po wabo, “Ena da te Apolos wali pabo bidi dao,” te po wabo. Te tiwai kolesaga ebaso, dago koneani, te dage tǫde bidi tiwai mę bidibao.

5 Dagego bugagia homu kone palao. Apolos wali te de dawe? Ena Pol, ena de dawe? Da si da te sę bidi naga bidibao. Genuai Bidigo gasa gasa sę da sibolo mawai, tama da sigo te yali sęde dagego konealubo po te Kraisde dąų wali. 6 Eno da te nai wai bulali. Te Apolosgo te nai wai bulali madi pageba wę gegeli pali. Tiali goli God agai te nai pua pai holomainu iliduali. 7 Tama te nai wai bulali bidi, agai nogi te meni yaibao. Tama te wę mabo bidi, agai nogi me te elalugobeo. Magigo menio. Godigo te nai holomainu ilidubao, agaduba deligo genuai nogi naga elalubo dao. 8 Tama te nai wai bulubo bidi me, te nai waiba wę mabo bidi, te augwali sigo sę te deli tigi poai naga yali. Tama augwali si deli deligo te augwa si yali sę usu nama, te Godigo augwalibolo mabo dwagi yai nai saibao. 9 Magi baso meni, da si te Godigo deli sę naga ebo sę bidi dao, tama dage te Godigo gi tiwai dao.

Te Godigo we bidibolo po pusubo sę bidi te kamda sę ebo bidi tiwai

Tama dage te Godigo be tiwai, aga te be sędu bidibao. 10 Te God aga olo da tau sali wiegi yai kolesagade ena te Godigo po pusubo sęde te polalubo tobolu bidi te kolesaga koneai kamda bidi tiwai pedalali, tama eno te be pos ni bulalio. Tama gasa bidigo te pos ni daide ugwadu te be sę ebao. Tama tigidali bidi augwali deli deli dua bugagia koneama tama te pos ni daide be sę yao. 11 Dagego koneani, te be pos ni mu bulai elalubao, te Jisas Krais naga dao. Tama niwai bidi me deligo agai te gasa pos ni me bulainu ebo te usu me egobeo. 12 Tama te pos ni daide ugwadu be sę yainu ebo bidi augwali deli deligo haniani naigo te be sę yaibao. Bidi me deligo te wiegi yai kapa nogi gol tego te be sę yaibao. Bidi mego te kapa nogi silvago ma te dila pai masigi mugo, me te nigo, ma te kalago, ma te gasagi yai nosai dili dabego te be sę yaibao. 13 Te magi naigo te be sę yainu homu ebaso da, teda te tigidali bidigo sę yali te nosali po tų ebo sogo te hania haninama pedalaibao. Tama te po tų ebo side te sia dabo posolo ebo tiwai pedalaibao. Tama te sia aga digi te tigidali bidi deli deligo yali sę usu sesa pelama, tama augwaligo yali sę te wiegi yai yaliwe ma meniwe, te augwaligo koneaibao. 14 Te bidi deligo be te pos ni daide sę ebaso, tama agai te be siago disiąbaso da, teda te sę bidibolo Godigo dwagi yai nai mawaibao. 15 Tiali goli te sę bidi me deligo be te tigidali siago dobaso da, teda te bidigo yali tigidali sę te hagawaibao. Tialima te sę bidi aga digi te bugagia bidaibao, tiali goli te bidi siago dabo be buluba wi paligo te sana pali bidi tiwai bidaibao.

Dage te Godigo wiegi yai be dao

16 Dage da te Godigo wiegi yai lotu be tiwai dao, tama te Godigo Tedali Mobo Bidi te dage tomode bidibao, bidi aga bede bidibo tiwai bidibao. Tama te dagego me konebewe? 17 Te bidi deligo Godigo te wiegi yai lotu be elalubo te dolobaso da, teda Godigo te bidi dolaibao. Magi baso meni, te Godigo be te tedali gasagi yai mu elalubo, te Godigo be naga dao. Te dage tama dao.

18 Tiyu te bidi me deli agade digi tibo po ola mayabuo. Te dage tomode bidi deli agai te e tǫde homu kolesaga wali peyu tama te tiwai homu eyu, ‘Eno kolesaga koneai elalubo,’ aga te homu eyu da, teda aga hasia bolo aga te tǫde we bidigo gedude te wabo pabo bidi tiwai pedalao. Tama tiyu aga te Godigo gedude te kolesaga koneai bidi mu pedalaibao. 19 Magi baso meni, te e tǫde koneani kolesaga te Godigo gedude te wabo pabo bidigo kolesaga tiwai ebao. Tede te Godigo po bukude te e tama tiwai po wai:

“God agai tilama tama augwaligo kolesaga koneanigo

te augwa digi tibo haniani kolesaga koneai bidi

dabe sali, te bidigo ba munama te kebi sabo tiwai

gilama ebo dao.” [~2~]

20 Tama tede te bukude te tiwai po me wali:

“Genuai Bidigo koneani, te kolesaga koneai bidi

dabego homu kolesaga te du walisiąbo olo nai

tiwai ebo dao.”[~3~]

21 Tama tibaso, te dage tomode te bidi me deligo te da Godigo po pusubo bidigo nogi ugwaba sabuo. Suao, te tigidali nai duga nai dao. 22 Ena Pol, me Apolos, me Pita, da te dage tau sabo sę ebo bidi dabe da. E tǫde elalubo nai tigidali me, tego dage aiyaba elaluama tonaluabo nai meni, dagego te nai tigidali aiyaba elaluama tonaluabo bage dao. Te tǫde bidibo sogo me, te isibo kolesaga me, te megi elalubo sogo me, te nosali pedalabo sogo me, te tigidali te dagego nai dao. 23 Tama dage te Krais dologode bidiyu dage agai we bidi hani dao. Tama Krais aga digi God dologode bidiyu aga Godigo bidi dao.

<- Polgo Hasia Pas Deli Korin Dabeba Asęani 2 Polgo Hasia Pas Deli Korin Dabeba Asęani 4 ->