Rom 9

Paulus leleene ipata kat pizin Israel ta tiurla ki Krisi som

1 Sua ta nio buri be aŋso i, pakaamŋana som. Mi iŋgi aŋso raama leleŋ. Pa nio tomtom ki Krisi. Mi Bubuŋana Potomŋana ta ikamam peeze pio i, ni ikam yo ma aŋute kat ta kembei: Sua ti, sua ŋonoono. 2-3 Nio ti, gorgori ta aŋkamam ŋgar pizin wal tio Israel na, leleŋ izanzaana pizin mi leleŋ ipata kat. Pa niam uyam tamen tau. Tana leleŋ ilip be Anutu ikamke zin. Mi iŋgi aŋrru zaala be aŋuulu zin. Mi so parei na, irao aŋyok pa ituŋ be sanaana kizin ka kadoono ise tio ma aŋla leŋ, mi zoŋ imap pa Krisi.[~1~]

Anutu ikam koroŋ boozo pizin Israel

4 Pa kere. Anutu ikam koroŋ boozo pizin Israel. Ni ikam zin ma tiwe lutuunu bizin. Mi muŋgu imbotmbot la mazwan, mi izzwe mburaana mi azuŋka kini pizin. Ziŋan Anutu timbuk sua boozo bekena tiparlup zin ma tiwe tamen. Mi zin ta tikam tutu. Anutu itunu ipaute zin pa zaala mi mbulu ki suŋŋana. Mi Anutu imbuk sua pizin pa koroŋ boozo.[~2~] 5 Abaraam, Isak, mi Yakop popoŋana kizin ta zin i. Mi siŋ kizin, ta imar imar ma Krisi ipet. Krisi, ni Anutu. Mi imborro koroŋ ta boozomen. Tana iti tapakur ni zaana totomen. Ŋonoono.[~3~]

Ta muŋgu mi imar na, Abaraam popoŋana kini pakan na, Israel ŋonoono, mi pakan na som

6 Ŋonoono, koozi zin Israel boozo tiurla ki Krisi som. Mi kokena toso sua mbukŋana ta Anutu ikam pizin na iur ŋonoono som. Na som. Pa kere. Zin Israel timap ma tiwe Anutu wal kini ŋonoono som. Pakan men.[~4~] 7 Mi Abaraam popoŋana kini ta kembena. Zin wal ta tiyooto la kini na, timap ma tiwe popoŋana kini ŋonoono som. Pa Anutu iso pa Abaraam ta kembei:

Popoŋana ku ŋonoono ko tipet la ki Isak men.[~5~]

8 Sua ti ka ŋgar ta kembei. Anutu, ni ikam ŋgar pa siŋ som. Tana zin wal ta tiyooto pa siŋ ki Abaraam na, timap ma tiwe Anutu lutuunu bizin som. Mi zin wal ta sua mbukŋana ki Anutu ipiyooto zin na, zin men ta Anutu ire zin kembei lutuunu bizin.[~6~] 9 Pa sua ta Anutu imbuk la ki Abaraam na, iso ta kembei:

Talala beso ka nol ipet, to aŋmiili ma aŋmar mini. Mi sombe aŋmar, na kusim Sara ko ipeebe lem pikin tomooto kek.[~7~]

Anutu itoto itunu leleene mi muŋaiŋana kini, mi ipeikat zin tomtom

10 Mi tina men som. Muŋgu tumbuyam Isak ziru Rebeka tipeebe boogo ru.[~8~] 11-12 Mi pikin ru tana tisu zen mi, Anutu iso pa Rebeka ma iso:

Kaimer pikin muŋgamuŋga ko iwe mbesooŋo pa pikin ta kaimerŋana na.[~9~]

Kere. Mazwaana tana, pikin ru tana tikam kosa sa zen. Tikam mbulu ambaiŋana sa som, sananŋana sa som. Tamen kan sua imuuŋgu pataaŋa. Mbulu tana iso iti ta kembei: Sombe Anutu ipeikat tomtom sa, na uunu imbot la ki tomtom tana itunu mbulu kini, som uraata kini sa na som. Ina Anutu ito itunu leleene mi ŋgar kini mi ikam mbulu tana pini.[~10~] 13 Mi Anutu sua kini lwoono toro iso ka ŋgar raraate men. Iso:

Yakop na, nio leleŋ pini mi aŋkami. Mi Isau na som.[~11~]

14 Kenako toso parei? Anutu mbulu kini indeeŋe som? Som.[~12~] 15 Pa kere. Muŋgu ni iso pa Mose ma iso:

Nio, sombe leleŋ isaana pa tomtom sa, mi leleŋ be aŋmuŋai i, inako aŋmuŋai i.[~13~]

16 Tana sombe Anutu ikam ti, na uunu imbot la itundu uraata kiti, som mbulu kiti ta lelende pini i na som. Ina ni ikam ti irao itunu muŋaiŋana kini men tau.[~14~] 17 Mi sua lwoono toro iso pa sua ta Anutu ikam pa king kizin Aikuptu na. Iso ta kembei:

Nio aŋuru ma we king bekena we zaala pio mi aŋswe mburoŋ ma ipet mat. Naso kaimer tiwit nio zoŋ, mi tisoyaara uruŋ ma irao toono ta boozomen.[~15~]

18 Tana iti tuute: Sombe Anutu leleene be imuŋai tomtom sa, na imuŋai i. Mi sombe leleene be ikam ta kembei som, na izem tomtom tana ma ila ito itunu leleene sananŋana.[~16~]

19 Mi tomtom tiom sa ko imaŋga mi iso: “Wai, sombe Anutu ikamam ta kembena, na uunu parei ta keteene malmal pa sanaana kiti? Asiŋ irao izooro ŋgar kini?”[~17~] 20 Mi pekelŋana tio ta kembei: Nu so tomtom i ta sombe we biibi pa Anutu, mi peleeli pa mbulu kini? Nu sa musmuuzu mi koroŋ sorok ki toono na! Parei, ko kuuru iso pa tomtom ta imbuuzi na ma iso: “Uunu parei ta nu urpe yo ta kembei?” Som.[~18~] 21 Tomtom ta imbusmbuuzu toono ma iwe kuuru na, ni itoto itunu leleene mi iurpewe zin kuuru. Tana ni irao ikam toono ndouŋana ta, mi iurpe pakaana ma iwe kuuru ambaiŋana kat be imbot pa uraata biibi sa. Mi pakaana na, ikam ma iwe kuuru ta sorok i.[~19~]

22-23 Mi Anutu, ni ikam mbulu raraate men. Pa ni leleene be iswe muŋaiŋana kini, ramaki mburaana mi mbulu kini tau keteene malmal pa sanaana mi iurur kadoono pa. Mi zin kuuru ta kete malmalŋana kini imbotmbot se kizin i, na ni ipasansaana zin karau som. Iyaramraama kete malmalŋana kini, mi inamnaama zin. Paso, ni mataana iŋgalŋgal zin kuuru ta ni leleene iur pizin be imuŋai zin na. Kuuru tana, ni isombe ipaute zin pa mbulu kini ndabokŋan matakiŋa ta boozomen, mi ikam zin ma timbot raami lela azuŋka kini leleene.[~20~] 24 Mi kuuru tana na ziŋoi? Ina wal boozomen ta ni iboobo zin ma tiwe lene na. Zin Yuda men som. Zin wal ta Yuda somŋan i tomini. 25 Kembei ta Anutu kwoono Hosea iso:

Zin wal ta nio wal tio som na, nio ko aŋpaata zin be “wal tio.”

Mi ni ta muŋgu leleŋ pini som, nako aŋso pini ta kembei: “Nio leleŋ pu.”[~21~]

26 Mi lele ta muŋgu tomtom timbot pa, mi Anutu iso pizin ma iso: “Niom wal tio som.”

Na lele tamen ta tina ta zin ko timbot pa, mi Anutu mata yaryaaraŋana iso pizin ma iso: “Nio lutuŋ bizin ta niom na.”[~22~]

27 Mi Yesaya, ni ipaŋarai kalŋaana pizin Israel ma iso:

Ŋonoono, zin Israel boozo kat ma kembei ta magargaara tai kana. Tamen zin tomtom kizin tabe aŋkamke zin ma timbot ambai na, zin rimen ŋonoono.[~23~]

28 Pa kadoono ta Merere isombe iur pizin tomtom toono kan na, ni ko ikam pizin karau men. 29 Mi ina kembei sua lwoono toro ta muŋgu Yesaya iso na.

Malanto Merere mbura keskeezeŋana ipotom tomtom tiam pakan ma timbot be tipepeebe. Pepe, so amap ma amla leyam kembei ta zin Sodom ma Gomora.[~24~]

Zin Israel lelen be tito zaala ki urlaŋana som

30 Tana ko toso parei? Zin wal ta Yuda somŋan i, ta muŋgu tikamam kinkiini be tiwe ndeeŋeŋan pa Anutu mataana som, ta koozi tiurla mi tiwe ndeeŋeŋan kek.[~25~] 31 Mi zin Israel na som. Ŋonoono, tikamam kinkiini kat pa tutu. Pa tiso ko iwe zaala pizin be tiwe ndeeŋeŋan pa Anutu mataana. Tamen tikam ma som.[~26~] 32 Paso, lelen be tito zaala ki urlaŋana som, mi tipase pa zitun mbulu kizin ambaimbaiŋan. Tabe ikam ma zin kembei titutkat kumbun la pat mi tisursur ma tila.[~27~] 33 Kembei ta sua ki Merere iso:

Re. Nio aŋur pat ta isu abal Sion.

Pat tana, tomtom pakan ko titutkat kumbun la, mi sursur ma tila.

Mi pakan na, pat tana ko ikam zin ma timelmel.

Tamen zin tomtom ta so tipase pini mi tiurla kini, na tasa ko ka miaŋ som. Zin ta boozomen ko nin se. Pa zin kola tire urlaŋana kizin ka ŋonoono.[~28~]

<- Rom 8 Rom 10 ->