8
Iti tomtom pareiŋanda ta Anutu ikam ŋgar biibi piti?
Mboe ki Dabit
1 O Yooba, Merere tiam, zom biibi ta swe ma irao toono kek.
Mi mburom ma mbulu ku ndabokŋana ramaki azuŋka ku, ta ilol saamba ma imap.
2 Nu ur zin naŋgaŋ munmun mi pikin siŋsiŋŋan be tiwit urum mi tiswe mburom.
Naso pumun kom koi bizin kwon,
mi kam zin wal zorzooroŋan ma tiur nin. [~1~]
3 Nio sombe motoŋ sala pa saamba mi aŋre la pa nomom muriini—
puulu ma pitik ta munŋaana men ta ur zin ma tirao murinmurin, [~2~]
4 na aŋso ta kembei: “Wai! Niam tomtom toono koyam na, koroŋ sorok.
Parei ta nu kamam ŋgar biibi piam?
Mi motom iŋgalŋgal yam paso?” [~3~]
5 Mi nu ur yam irao itum ruŋgum, mi kam yam ma ambot la nu itum tamen kopom mbarmaana.
Mi pakur yam mi wit zoyam ma isala kor. [~4~]
6 Pa koroŋ boozomen ta ur zin na, nu ur mar nomoyam be amboro.
Koroŋ ta munŋaana men imap imbot la niam tomtom kopoyam mbarmaana. [~5~]
7 Zin sipsip ma makau,
mi buzur kar kan mi su kan ta boozomen.
8 Mi man ta tirie sala maŋaanaŋana na,
mi ye ramaki koroŋ boozomen ta tiwwa pa tai leleene na.
Koroŋ ta munŋaana men tana timap timbot la niam tomtom kopoyam mbarmaana.