Iburu 2

Tipizil ndemende pa Krisi pepe. Pa ni ikam uraata biibi piti

1 Tana, sua ki Anutu ta teleŋ kek na, matanda iŋgalŋgal be tikis ma tuŋtuŋ pataaŋa. Kokena tezem, to tewe kembei wooŋgo ta timbit kat som, mi isur ma ila lene.[~1~] 2 Kere. Anutu tutu kini ta muŋgu zin Israel tileŋ la zin aŋela kwon na, mbolŋana kat. Wal ta timolo tutu tana mi tikam zooroŋana pa na, Anutu ileleele zin som. Timap tire kadoono pa ma ikot mbulu kizin.[~2~] 3 Mi uraata ta Yesu ikam bekena ikamke iti na, biibi ma ilip kat pa uraata ta muŋgu Anutu ikam pizin Israel na. Tana sombe terepiili uraata kini tana kembei koroŋ sorok mi tipizil ndemende pa, ko tombot? Som kat![~3~]

Uraata tana na, mataana mi Merere itunu isoyaara ka sua. To zin ta tileŋi mi tire i na, tisoyaara sua tana piti mi tipombol, tabe tikam ma iti tomini tuurla.[~4~] 4 Mi Anutu igabgaaba zin pa uraata kizin mi ipombolmbol sua kizin. Pa irairai mbulu pakan ta ki Bubuŋana Potomŋana i pizin wal urlaŋan irao itunu leleene, mi ipombolmbol zin ma titortooro mos bibip mi uraata mburanŋan matakiŋa.[~5~]

Yesu, ni zaana biibi. Tamen Anutu ikoto i ma zaana isu ri pizin aŋela pa mazwaana ri

5 Saamba mi toono popoŋan tabe tipet pa kaimer ma amzzo sua pa i, na Anutu iur zin aŋela be timboro na som. 6 Pa tomtom ta, ni iso kat ka sua ta kembei:

O Merere, niam tomtom pareiŋoyam ta nu kamam ŋgar biibi piam?

Mi Tomtom Lutuunu na, parei ta nu motom pini?[~6~]

7 Nu koto zaana ma isu ri pizin aŋela pa mazwaana rimen.

To pakuri mini ma zaana iwe biibi ma ilip kat,

8 mi uri ma imboro koroŋ boozomen ta itum nomom iur zin na.

Tana koroŋ ta munŋaana men, ta timap timbot la ni kopo mbarmaana.

Indeeŋe Anutu iur koroŋ ta munŋaana men ma timbot la Tomtom Lutuunu kopo mbarmaana na, izem tasa som. Tamen koozi tere koroŋ ta boozomen timap ma tito peeze kini zen.[~7~] 9 Mi Yesu itunu na, tere i. Anutu isombe ikampe iti mi ikamke iti pa meeteŋana, tanata ikoto Yesu zaana ma isu ri pizin aŋela pa mazwaana rimen. Mi ni ikam murindi, mi ire yoyouŋana ma imeete piti tomtom ta boozomen. Uunu tina ta Anutu ipakuri ma zaana iwe biibi kat.[~8~]

Yesu iwe tomtom kembei iti

10 Anutu, ni iur koroŋ ta munŋaana men, mi ikiskis koroŋ ta boozomen ma timbot la murinmurin. Mi ni leleene be iyaaru lutuunu bizin ta boozomen ma tila mi ziŋan timbot lela azuŋka kini leleene. Tanata ikam Lutuunu Yesu ma ire yoyouŋana biibi. Mi ina indeeŋe men. Pa ikam ma Yesu irao kat be imuuŋgu pa Anutu lutuunu bizin, mi iporou pizin, mi ikamke zin ma timbot ambai.[~9~] 11 Ziŋan wal kini ta ni ikam zin ma tiwe potomŋan na, un tamen tau. Tanata niini ise pizin mi leleene pizin, mi ipaata zin be toŋmatiziŋ kini.[~10~] 12 Pa ni iso sua ta kembei:

Nio ko aŋsoyaara urum pizin toŋmatiziŋ tio.

Mi sombe wal ku tilup zin pa suŋŋana, na nio ko aŋgaaba zin mi aŋbo mboe be aŋpakur zom pa.[~11~]

13 Mi iso mini ta kembei. Isombe:

Nio, nako aŋpase pa Anutu.[~12~]

Mi iso sua toro ta kembei:

Nio ta ituŋ ti. Niamŋan tiziŋ bizin ta Anutu iroogo zin pio, ta ambotmbot i.[~13~]

14 Wal kini tana na, zin tomtom toono kan. Tanata Yesu tomini iwe tomtom kembei ta zin, mi iyamaana pataŋana ki toono ti, mi imeete bekena ipunmeete Tomtom Sanaana mburaana ma imap. Pa ni ta ipasansaana zin tomtom mi iwe uunu pa meeteŋana.[~14~] 15 Iti tomtom, gorgori tomototo meeteŋana, mi motoŋana tana ikiskis ti ma lende zaala sa som. Tamen meeteŋana ki Yesu itatke iti pa pataŋana tana.[~15~] 16 Mi kere. Uraata tana, ni ikamam pizin aŋela som. Ikamam piti tomtom ta popoŋana ki Abaraam na.[~16~] 17 Uunu tina ta ni isu toono ma iwe tomtom raraate kembei iti ta toŋmatiziŋ kini na. Pepe, so irao ikam kat uraata kini som. Pa ni ta patoronŋana ka tomtom biibi ŋonoono. Tana imbot be ireege sanaana kiti mi ipunmeete Anutu kete malmalŋana kini, mibe ilup ti raama Anutu ma tewe tamen. Mi uraata kini tana, ni mataana izze pa, mi ikamam raama muŋaiŋana biibi.[~17~] 18 Pa itunu iyamaana toomboŋana mi pataŋana ki toono ti kek. Tana ni irao kat be ilae kizin wal ta toomboŋana iwedet pizin i, mi iuulu zin.[~18~]

<- Iburu 1 Iburu 3 ->