Taato Langaah 21

Yendak moos osin ngaanggis moos

1 + o 21:1 2Pi 3:13*Lung atonde sim saahe yendak moos osin ngaanggis moos nando, de yendak munggin osin ngaanggis munggin-ato la mema pin, de lôôy-ame neep laah e. 2 + o 21:2 Ais 52:1; 61:10; Hiblu 11:16; 12:22; Taato 3:12*Tonde yik saahe taaku vaambuung bop, ond manyinju Yelusalem moos, ond saahe Anutu wiing vu baandoni be nalukalaam voon, tombe yite vunakin amengali nambe sen vêêh navunak yi lak yite

vunakin amengali in nambe na jak vu yite moow. 3 + o 21:3 2Kro 6:18; Sek 2:10; 2Ko 6:16*Tonde sim sa hango kôôk ti laam vu lulemak-ate siaa-juuto nambe, “Angge, gêên Anutu-te bayêên sen mando gaving omaahonôôn-ato ond manyinja. Yoo le mando gaving sil-ande sil daatu yite hil, tonde mem yi Anutu yoo le mando gaving sil. 4 + o 21:4 Taato 7:17; Ais 35:10; 65:19*Yoo le jaavu sil amend luk na vêêl, tonde hil-ame le lanjimb jesin naah e, osin londpayo me-le nimeen naah e, de me-le daasu osin sil-ame le gako nivaane jesin naah e, malis. Yik va pin sen vu munggin-ato ond lung la valok-ate.”

5 + o 21:5 Taato 4:2,10; 2Ko 5:17*Tonde sim omaaho sen nando lak sia lulemak-ate nêêl nambe, “Angge, saawiing-ambe va pin tu moos ak.” Tombe nêêl having nambe, “Okaavu, in vakasin-anja keen lôôt-ambe lohvu nambe hil pin lambiing gaving.” 6 + o 21:6 Taato 1:8,17; 22:17; Jon 7:37; Saam 36:9; Jer 2:13*Tonde yik nêêl vu sa yesin laah nambe, “Va pin nôôn ak lung laa-jo. Sak sa omaaho nalu munggin osin ahus keen, soo aatu va pin danggakook osin to. Om naambe omaahonôôn alo bambôôv in bel, ond yik sale aambu bel dangga dosin metumin-ate vu yi nyemalis amu be naanum. 7 + o 21:7 2Sml 7:14*Om naambe omaaho ti nyiis ngaamong-ambe daanggôôl va nipaya pin, ond sale aambu nôôn metumin-atêênjo vu yi, de mem sa naatu yite Anutu, de naatu sa noongg. 8 + o 21:8 Hiblu 10:38-39; Mat 25:41; Taato 19:20; 21:27; 22:15*Tonde vêêh kôôh-aso sen dapak-ato, de hil sen me-lawiihaving-ato, osin hil sen dawiing va nipaya nimumin-ate vaha vahaa-to, osin hil sen dayiis omaahonôôn dayimb-ato, de hil sen dawiing baayamb, de hil sen dawiing yaavak, tonde hil sen dalohak vu anutu tatuhin vahaa-to, osin hil pin sen mondanêêl

vakasin tatuhin-ato, ond sil landukana silate taaku sen kin mala bopaata monatum ak tatuuh-ambe neep bopaata nambe betum-ato. Ond manyinju silate yimbin sen tu balon yuuh-ato.”

Yelusalem moos

9 + o 21:9 Taato 15:1*De angela namaavaalu be vindak yuuh sen lako Anutu-te ahekalin bopaata hôôk kaambum namaavaalu be vindak yuuh in basap hil ak-ato, ond angela-sôônju ti laam-ambe nêêl vu sa nambe, “Ganaam in wana be sa taato vêêh sen Sipsip Noow navu gakôô-to vu hong e.” 10 + o 21:10 Esi 40:2; Taato 21:2*Om Vavi Vaambuung hôôvu sa niwêêk lôôt, tombe angela hako sa be haay alakala kandu bopaata ti dinaandiin lôôt, be mem taato taaku vaambuung Yelusalem sen Anutu wiing vu baandoni be nalukalaam voon-ato vu sa. 11 + o 21:11 Ais 60:1-2,19*Anutu-te nikaapulis natêêlang ak taaku bop-anju, tombe yoo natêêlang nambe tatuuh sen daanggo lak mone bopaata lôôt-ato. Keen, yik yoo lohvu tatuuh jaspa be melangaah lôôt nambe dundum-ato. 12 + o 21:12 Esi 48:30-35*Taaku bop-anju ond lahaav kaatum anyevaahis bopaata be

yoo dinaandiin lôôt, tombe kaatum-anju yite

vinavi nomaayuuh-ambe laam yuuh, tombe yik angela nomaayuuh-ambe laam yuuh ond sil ti ti daale lohvu vinavi ti ti pin. Tonde hil Islel-ate danggakook-aso nomaayuuh-ambe laam yuuh-ato haalend neep ak vinavi pin. 13 Kaatum vahaan laah osin sen taaku me lak valup-ato ond vinavi yaal neep, tonde vahaan laah osin vaavu ond vinavi yaal neep, tonde vahaan hoow ond vinavi yaal neep, tonde kaatum vahaan laah osin sen taaku mekaalus navu maaluk laa-to ond yik vinavi yaal neep. 14 De kaatum sen taaku bop-anju ond lahaav tatuuh nomaayuuh-ambe laam yuuh naale hôôk dangga, tombe sil kaavu Sipsip Noow-ate sinaale nomaayuuh-ambe laam yuuh-ato haalend neep ak tatuuh-asôônju.

15 + o 21:15 Taato 11:1*Ke, angela sen nakaas vu saa-jo ond hako paatôôn gool in nambe taahu vu taaku bop-anju de taahu vu vinavi osin kaatum-anju. 16 Taaku bop-anju ond yik ahelasu yumbeyuuh oo loh ti pin, de daka me-pasiv me bop savok la le. Ke, angela taahu yite paatôôn vu taaku bop-anju tombe lohvu 2,400 kilomita, diin sen neep voon-ambe laa-to, osin bayêên bop-anju naale diin-ambe la baandoni lôôt-ato, ond yik yoo loh ti pin. 17 Taahu yite paatôôn vu kaatum-anju having tombe kaatum sen naale kasiiy-ato ond lohvu 65 mita. Yik haah sen hil davu taahu va yuuh ame lak-ato ond yik angela taahu paatôôn-anju vu kaatum. 18 Kaatum sen taaku bop-anju ond Anutu yoo samu lak tatuuh jaspa. Tonde bayêên bop-anju ond samu lak gool sen nivasa nôôn-ato ondeey yoo melangaah lôôt nambe dundum-ato. 19 + o 21:19 Ais 54:11-12*De tatuuh nomaayuuh-ambe laam yuuh sen naale hôôk kaatum danggaa-to ond Anutu yoo vunak ak tatuuh amengali-ngali pin sen daanggo lak mone bop-ato. Ke, tatuuh ti sen mengali lôôt-ambe nando hôôk kaatum danggaa-to ond haale nambe jaspa, tonde tatuuh amembu ango sen nayesakin-ato ond haale nambe sapaia. Tonde tatuuh valôôy ti tu yaal-ato ond haale nambe

aget, tonde tatuuh aniluuh ti sen tu yumbeyuuh-ato ond haale nambe emelal. 20 Tonde tatuuh ti sen tu namaavaalu be nihees osin nivalôôy-ato ond tatuuh sadonikis, tonde tatuuh ti sen tu namaavaalu be vindak tii-to ond nihees-ambe haale nambe konilian. Tonde tatuuh anisang ti sen tu vindak yuuh-ato ond haale nambe klisolait, tonde tatuuh aniluuh vaha ango sen tu vindak yaal-ato ond haale nambe belil. Tonde tatuuh anisang vaha ango sen tu vindak yumbeyuuh-ato ond haale nambe topas, tonde tatuuh aniluuh having nisang ti sen tu nomaayuuh-ato ond haale nambe klisoples. Tonde tatuuh amembu vaha ango sen tu nomaayuuh-ambe laam tii-to ond haale nambe haiasin, tonde tatuuh amembu vaha ti sen tu nomaayuuh-ambe laam yuuh-ato ond haale nambe ametis. 21 Tonde vinavi nomaayuuh-ambe laam yuuh-anju ond sil samu lak kukum valôôy sen daanggo lak mone bop-ato, ti ti yoo lohvu vinavi ti ti pin. Tonde mopaatôôv talind sen taaku bop-anjuuto ond yoo gool anivasa nôôn malis-ambe melangaah nambe sen dundum-ato.

22 + o 21:22 Taato 15:3*Same aahe nambe dumb vaambuung ti naale taaku bop-anju le, malis. Yik Omaaho Bop Anutu sen niwêêk pin danggakook yii-to yuuh Sipsip Noow amu yoo latu dumb vaambuung-ambe yuuh dando. 23 + o 21:23 Ais 60:19-20; Taato 22:5*Tombe taaku bop-anju ond taaku mekaalus ayuuh kwaav-ame natum e, malis, yik Anutu-te nikaapulis amu yoo navu melangaah vu taakuu-ju, tonde Sipsip Noow ond yoo tu taakuu-jute kin tumin. 24 + o 21:24 Ais 60:3,5*Om omaahonôôn vu taaku pin e mando dôôk taaku bop-anju yite melangaah, tonde silate lulemak-aso le daasupin silate vunakin dukana taakuu-ju. 25 + o 21:25 Ais 60:11; Sek 14:7; Taato 22:5*Tonde langaah ond vinavi me-le baayiiy daka le, tonde taaku bop-anju ond mekanu ma valok. 26 Tonde vunakin pin osin hil pin-ate va nivasa vasa sen Anutu nayi nivasaa-to, ond le daasupin dukana taakuu-ju. 27 + o 21:27 Ais 52:1; 1Ko 6:9-10; Taato 13:8; 21:8*Lemu va vaalu sen Anutu nayi payaa-to, osin hil sen dawiing va nipaya vaha vahaa-to, tonde tatuhin ambu-so, ond vaa-ju me-le landukana taaku bop-anju le, malis lôôt. Yik hil vaalu sen Sipsip Noow kaavu sil haalend lukala yite kaapiya metumin-atêêto, ond yik hil-anju ond mem yoo le landukana taaku bop-anju lopayo.

<- Taato Langaah 20 Taato Langaah 22 ->