Apocalipsis 10

Tá na̱xini Juan ña̱ cáñee in libro loho ini ndáha̱ inga táto̱ Ndióxi̱

1 A̱nda̱ já na̱xini i̱ inga táto̱ Ndióxi̱, ña̱ íin cua̱há ndiva̱ha ndée̱. Na̱nuu a indiví na̱quee a va̱xi a tañu in vi̱co̱ ta cánúu in co̱o̱ yánquí ji̱ni̱ á. Ta yéhe̱ nu̱u̱ á tá quia̱hva yéhe̱ ca̱ndii. Ta sa̱há cúú á tátu̱hun i̱vi̱ ji̱hi̱n cándaha xi̱hi̱n ñúhu̱. 2 Ta ini ndáha̱ mé á na̱xini i̱ cáñee in libro loho ña̱ na̱ti̱vi̱ tátu̱hun yívi̱ joo na̱ndindi̱ca̱ ña̱. Ta na̱chinúu mé á sa̱ha̱ cuáha nu̱ú tañu̱hú ta na̱chinúu a sa̱ha̱ íti a nu̱ ñúhu̱. 3 Ta na̱cayuhú cóhó a̱ tátu̱hun tá ndáhyi̱ león. Ta tá na̱cayuhú a̱ já na̱xini jo̱ho i̱ ña̱ na̱ca̱ha̱n cóhó u̱sa̱ tasa tá na̱cana ña. 4 Tá na̱ndihi na̱ca̱ha̱n ndíhu̱sa̱ tasa cán já na̱nducú u̱ ca̱hyí i̱ ña̱ na̱cachi a joo na̱xini jo̱ho i̱ cáha̱n in a̱ na̱quixi chí indiví ta já cáchí a̱ já xi̱hín i̱:

—A̱ cáhyún ña̱ na̱cachi ndíhu̱sa̱ tasa na̱cana ja̱n. Xíní ñúhú coo je̱hé a̱ —na̱cachi mé a̱ cán xi̱hín i̱.

5 A̱nda̱ já na̱xini i̱ mé táto̱ Ndióxi̱ ña̱ cánúu in sa̱há nu̱ú tañu̱hú ta inga sa̱há nu̱ ñúhu̱ cán, na̱ndiñehe a ndahá cuáha indiví. 6 Ta já na̱ca̱ha̱n mé á qui̱vi̱ Ndióxi̱ ta já na̱sa̱ha̱n tu̱hun a jáchi̱ Ndióxi̱ tácú a̱ a̱nda̱ ama cáa qui̱vi̱, mé á na̱cava̱ha indiví xi̱hi̱n ñuyíví xi̱hín tañu̱hú xi̱hi̱n tócó ndihi ña̱ha íin nu̱u̱ á. Ta já na̱cachi mé táto̱ Ndióxi̱ já:

—A̱ cáyáncá ga̱ 7 jáchi̱ tá ná casáhá tiví táto̱ Ndióxi̱ ña̱ cáhu̱sa̱ cán trompeta já xi̱nu̱ co̱o nu̱ tócó ndihi ña̱ na̱sacu ini Ndióxi̱ coo je̱hé ja̱nda̱ sa̱nahá. Jáchi̱ sa̱ na̱ca̱xi tu̱hun mé á xi̱hín profeta cuéntá mé á ña̱ ná ca̱ha̱n na̱ sa̱há ña̱ yóho nu̱ú ña̱yivi —cáchí táto̱ Ndióxi̱.

8 A̱nda̱ jáví na̱xini jo̱ho i̱ na̱ca̱ha̱n tucu mé táto̱ Ndióxi̱ indiví já na̱cachi a já xi̱hín i̱:

—Cuáhán quehe libro loho núná nu̱u̱ cán. Ndiquehe a ndáha̱ táto̱ Ndióxi̱, mé a̱ cánúu in sa̱ha̱ nu̱ú tañu̱hú ta inga sa̱há nu̱ ñúhu̱ ja̱n —na̱cachi a.

9 Tá na̱sa̱a̱ i̱ nu̱ táto̱ Ndióxi̱ cán já na̱xi̱ca̱ i̱ nu̱ á ña̱ ná quia̱hva libro loho cán nu̱ú i̱. Ta já na̱nducú ñehe táto̱ Ndióxi̱ cán tu̱hun nu̱ú i̱ já na̱cachi a já xi̱hín i̱:

—Yóho íin libro loho joo xíní ñúhú casún ña̱. Va̱tí mé a̱ nda̱a̱ tá ná casún ña̱ cacuu a tátu̱hun tá casún ñu̱ñu̱ jáchi̱ cavi̱ji̱ ndiva̱ha yúhu̱n caja ña. Joo tá na̱ndihi nduu a ña̱ o̱va̱ ini ti̱sún —na̱cachi a xi̱hín i̱.

10 Tá na̱ndihi já na̱tiin i̱ mé libro loho ndáha̱ táto̱ Ndióxi̱ cán ta já na̱saxí i̱ ña̱. Ta na̱cavi̱ji̱ yuhú u̱ xi̱hi̱n á tátu̱hun ñu̱ñu̱. Joo tá sa̱ na̱cocó i̱ ña̱ já na̱caho̱va̱ ña̱ ini ti̱xi i̱. 11 A̱nda̱ já na̱tahnda chuun nu̱ú i̱ já na̱cachi a já xi̱hín i̱:

—Ndítahan nu̱u̱n ca̱xi tu̱hun tucún xi̱hín ña̱yivi ña̱ cáha̱n Ndióxi̱ sa̱há cua̱há ndiva̱ha ñuu xi̱hín cua̱há ndiva̱ha nación nu̱ cáha̱n na̱ ndijáá tu̱hun. Ta xíní ñúhú ca̱xi tu̱hún ña̱ nu̱ú ndijáá na̱ cómí cuéntá sa̱há ñuyíví —na̱cachi a xi̱hín i̱.

<- Apocalipsis 9 Apocalipsis 11 ->