1 Nehn arai koaroanlahng Jerusalem in kahnihmw en Bethphage apel Bethany, irai lel Dolin Olip. Jesus kadarla Nah sohnpadahk roahmen, 2 pwehng ara, “Kamwa alwe nehn koujapw oauwen mijen kamwa. Nehn amwa pirin dilda wijahu, kamwa pirin pispis kapangda ejel pwulopwul men ma pirpirapir ma kahjikkoar armaj men dakoa. Kamwa lapwadda ukdo me. 3 A ma emen idoak ipamwa, da kamwa wihwiahng mahnnen a kamwa japoang, ‘Koaunno ioar anahne,’ a Ih pirin pispisin kajpahlihdo.”

4 Ara ken inla kapangda ejel pwulopwul men a pirapir in wanihmw in umw oau nehn allo. Nehn ara lapwadda, 5 armaj pwi mine wijahu idoak ipara, “Da kamwa wihwia? Mihnda kamwa lapwadda ejel siksik menen?”

6 Ara japoang irai doahr ma Jesus pwehng ara. Armajjok ken mweidoahng ara. 7 Ara wahdohng ejel siksikko ipen Jesus. Arai piroakihdihoang likkoau puwoa, Jesus ken doauda pohn ejello. 8 Pokonno piroakihdi ahr likkoauwok nehn allo. A epwi poaloahdi rahn suhkoa pwi pel inapoahkihda nehn allo. 9 Irai ohroj ma alu mijoa apel iraihok ma kaujdo pokonno rahrahuki koaul in kaping pase: “Kisai kapnga Koahs! Koahs en kapaiahda Ih ma indoa in oadoan Koaunno. 10 Koahs en kapaiahda wein jamasai David ma pirin indoa. Kaping oang Koahs.”

11 Jesus dilda nehn Jerusalem, inlahng nehn Umw Joarwiho, kapkapangjili meohroj loaloa. A pwa ne joausikpene, Ih ken inlahng Bethany pwilihki sohnpadahk eijek roahmenno.

12 Rehnwa mwerin, nehn arai allaluhla jang Bethany, Jesus ken mwakohkohda. 13 Ih kapangda suhkoa fig pas jang wija doh ma dir soah; Ih inla pwa en kapang ma joh wah Ih nen kapangda. Nehn Ah lel wijahu Ih johpwa kapangda wah, pwa soahr doari; pwa jaudi anjoau in roak. 14 Ih ken pwehng suhkoahu, “Joh armaj men pirin pwuroahng kang wehn fig jang ipoamw.”

15 Nehn irai lel Jerusalem, Jesus inla nehn Umw Joarwiho, sapda kajroahjang loaloa irai ohroj ma noaski apel dupdupuk koapwoa wijahu. Ih ukuddi en sohnkawiliali mwanihok ahr sehpillok apel en jounnoaski mwureiok ahr mihn mwindi kan. 16 Ih pel johla mweidoahng armaj en wahjili mehkij nehn Umw Joarwiho. 17 Ih ken pwehng armajjok, “Ne insingdi nehn Puk Joarwi, Koahs pwa, ‘Umwoaie pirin adanki umwen kapkap oang sohn wei ohroj.’ A kamwai wiahkihla dohn jounpirap kan.”

18 Jamwrou laplappok apel jounpadahk in Kojonneddok rongda me; irai sapda lemleme doahr ahr pirin kojukdi Jesus; pwa irai perki koalik, pwa armaj ohroj kajampwalki dauluhl Ah padahk.

19 Injoausik in rehnno, Jesus apel Nah sohnpadahkkok diljang nehn kahnihmmwo.

20 Pwohrdahng injohrehnin rehnno, nehn irai allaluhla nehn allo, irai kapangda suhkoa fig‑o ne mengla jang in sapin lel in koadkoa. 21 Peter samanda da me ne wiawihlahu, ih ken pwehng Jesus, “Maing, kanah kapang suhkoa fig‑e ma koawoa kariahla, ne mengla.”

22 Jesus japoang irai, “Kamwai pwojon Koahs! 23 Ngoahi pwehng kamwai in mehlel, ma emen ma pirin pwehng dol oauwe, ‘Sohjang me kasoahdihla pein koawoa nehn jeddo,’ a johpwa peikajal kij mine nehn kapehdin, a pwojon da ih pwa, doari, dahioau ih pwahla pirin pwoaida. 24 Ioar me Ngoahi nimen kamwai en kidal pwa me ohroj ma kamwai pirin poaki nehn amwai kapkap kan, kamwai pwojon pwa kamwai nen oaloa, ih ken pwoaida oang kamwai. 25 Doari, nehn amwai pirin uhda kapkap, kamwai mahkoahng japwung ohroj ma armaj men wiahng kamwai pwa jamamwaiho nehnloannge en pel mahkoahng kamwai dipamwaihok. 26 [Pwa ma kamwai johpwa mahkoahng emen, Jamamwaiho ma mine nehnloannge johpwa pirin mahkoahng kamwai dipamwaihok.]”

27 Irai pwurlahng Jerusalem. Nehn en Jesus allaluhjili nehn Umw Joarwiho, jamwrou laplap apel jounpadahk in Kojonneddo pwi apel koaun pwi indoa, 28 pwehng Ih, “Manmanin inje koawoa wihwiahki joang pwiai? Inje kioang koawoa manman oauwe?”

29 Jesus japoang irai, “Ngoahi pirin wiahng kamwai peidek oau. Doari, ma kamwai japoang Ngoahi, Ngoahi pirin wud pwehng kamwai manman en inje ma Ngoahi wihwiahki mehpwiai. 30 Kamwai pwehng Ngoahi, en John ah manman in poapdaij, sapjang ipen Koahs ke jang ipen armaj?”

31 Irai sapda akmaipene nehn pwungarai, pwahpwahpwa, “Ma kisai pwa, ‘sapjang ipen Koahs,’ Ih pirin pwa, ‘A da kamwai joah kamehlelehki John?’ 32 A ma kisai pwa sapjang armaj…” (Irai mijik armaj kan, pwa ohroj kin wiahki John joukohp mehlel men.) 33 Irai ken japoang Jesus, pwehng, “Kamai jehjoa.”