John 4

Jesus apel Lihn Samaria

1 Doari, Pharisee‑ok ken rongda pwa Jesus ne poapdaijihla apel naihnkihla sohnpadahk dirjang John. 2 A in mehlel, pein Jesus johpwa poapdaijihla emen, a Nah sohnpadahkkok ioar. 3 Nehn anjoauwo ma Jesus kidalda sikesik pase, Ih ken inla jang Judea pel pwurlahng Galilee. 4 Doari, nehn ah allaluhla, Ih uhdahn pirin wudla Samaria.

5 Doari, nen a lellahng nehn koaujoan in Samaria oau, ma adanki Sychar, ma joah dohjang jappwo ma Jacob kioang nah jermwein Joseph. 6 Ioar wijahu ma pwarer in Jacob mine. Doari, Jesus ken koakoahkkihla Ah japjapal inla, Ih ken koammoaldi pohn pwarerro. Me ne koaroannoang in jauwaj.

7 A lihn Samaria men aludohng idpil. Jesus ken pwehnglahng liho, “Kihdoa — nimoai ekij pillen.” 8 Nah sohnpadahkkok inlahng nehn koaujoanno, pwa irai en dupukda kanarai mwinge.

9 Lihn Samaria‑o japoang, pwa, “Imdoahr, koawoa mihn Jew men, a ngoahi mihn Samaria men, a koawoa ken kak poaki pil ipoai?” Pwa mihn Jew kan johkin doadoahkki mwoak ke pwohl kan ma mihn Samaria kan kin doadoahkki.

10 Jesus japoang, “Ma koawoa kidal doahroar kalahngan en Koahs, apel inje Ih ma poaki pil ipoamw, a koawoa nen poaki pil ipoa, apel Ih nen kioang koawoa pil mour.”

11 Liho pel pwehnglahng, “Maing, joh Oamw poakis, a pwarer oauwe loal; a ia wija Koawoa pirin idipjang pillen? 12 Imdoahr, Koawoa en laplapjang jamasai Jacob ma kihdoahng kisai pwarer oauwe? Ma ih, apel nah jermweinnok, pwilihkihla nah mahn kan, arai ohroj kin nimpil jang pwarer oauwe.”

13 Jesus ken japoang, “Armaj ohroj ma kin nimpil jang nehn pil oauwe pirin pwuroahng nimen nimpilda; 14 a ma emen ma nimpil jang nehn pil oauwe ma Ngoahi pirin kioang nen johla pirin pwuroahng nimen nimpilda allaluhla. Pillo ma Ngoahi pirin kioang, nen poad loaloa apel wiahla pil koarkoar oau ma pirin kioang ih mour joahsuk.”

15 Liho pwehnglahng Ih, “Maing, Koawoa kihdoahng ngoahi pillen, pwa Ngoahi en joah pwuroahng nimen nimpilda, apel Ngoahi en joah pwurdohng idpil wija kije.”

16 Jesus ken pel pwehng liho, “Alwe, ukdo pahioammwo apel pwurdo wija kije.”

17 Liho pwehng Ih, “Joh pahioai.”

Jesus pwehng ih, “Men pwung oamw sikesik en, ‘Joh pahioai’; 18 pwa koawoa painkihla woal limmen, a woallo ma koawoa painki anjoau kije, jaudi uhdahn pahioamw. Me mehlel oau men koawoa pwehng Ngoahi.”

19 Liho pel pwehng Ih, “Maing, Ngoahi ne kidal pwa Koawoa joukohp men. 20 Jamamaihok kin pwongi pohn dol oauwe, a kamwai mihn Jew kin pwa, Jerusalem‑oar, ioar wija ma armaj en pwongi Koahs.”

21 Jesus pwa, “Li, kamehlele Ngoahi, anjoau nen leldo ma armaj johla pirin joarwihoang Jahmmo pohn dol oauwe, ke pel nehn Jerusalem. 22 Kamwai mihn Samaria kan johpwa kidal inje ma kamwai kin pwongi; a kamai mihn Jew kan, kamai kidal inje Ih ma kamai kin pwongi; pwa koamoaurro kin indoa jang mihn Jew kan. 23 A anjoau pirin leldo, apel ne lel, ma sohn joarwi mehlel kan pirin pwongi Jahmmo in ngen apel mehlel, pwa ioar joangoan sohn joarwi kan ma Jahmmo kin perenki en pwongi Ih. 24 Ngen oau Koahs, a emen ma kin joarwihoang Ih en joarwihki ngen apel mehlel.”

25 Liho ken pwehng Ih, “Ngoahi kidal pwa Messiah, ma adanki Christ, pirin indoa. A ma Ih leldo, Ih pirin pwehng kisai meohroj.”

26 Jesus japoang, “Ioar ngoahi Ih, ma siksikesik oang koawoa.”

27 Doari, nehn anjoauwohr Nah sohnpadahkkok pwurdo pwuriamweikihla Ah siksikesik oang lihmen. A joh emen jang nehn pwungarai ma pwehng liho, “Dahkij koawoa anahne?” ke pel idoak oang Jesus, “Dahkij kahrehda Koawoa sikesikkihoang lihen?”

28 Liho ken kihdi ah rumehn pillo, ken japahllahng nehn koaujoanno apel pwehng armajjok, 29 “Kamwai indoa kapang Woal men ma sikoa oang ngoahi meohroj ma ngoahi ne wiahda. Imdoahr, jaudi Ih Christ?” 30 Irai inla jang nehn koaujoanno, indoa ipen Jesus.

31 Nehn anjoauwohr Nah sohnpadahkkok pwehng Ih, “Maing Jounpadahk, ken mwinge.”

32 Ih japoang irai, “Mine koanoai mwinge, ma kamwai jehjoa.”

33 Sohnpadahkkok ken sapda peipeidekpene nehn pwungarai, “Mine armaj ne wahdo kanah mwinge?”

34 Jesus pwehng irai, “Oai peikkoang Ih ma ne kadardo ngoahi, apel wiahda Ah doadoahk, ioar koanoai mwinge. 35 Mine oau sikesik ma kamwai kin pwa: ‘Johnpwongoar pahu luhwoa, doari, ioar anjoau in doli.’ A Ngoahi pwehng kamwai: kamwai jarda apel jipwoalwehng mwoaswel kan, wahrai kan ne mah apel ne mwehuwin doddol. 36 Ih ma kin doli, ih kin oaloa dupukoan ah doadoahk, apel ih kin doli oang mour joahsuk; pwa ih ma kin poadokdi apel ih ma kin doli ara pirin perperenpene. 37 Pwa mehlel sikesik pase: ‘Emen kin poadokdi, emen sohrohr kin dolihdi.’ 38 Doari, Ngoahi kadarwe kamwai pwa kamwai en dolihdi roakko nehn mwoaswel kan ma jaudi kamwai koadoahkoahda. Epwi ma koadoahkoahda, a kamwai pirin paiki arai doadoahk.”

39 Mihn Samaria dihrdir ma pwojonla Jesus jang nehn koaujoanno, pwa jang nehn en liho ah pwa, “Ih sikoahng ngoahi meohroj ma ngoahi wiahda.” 40 Doari, nehn anjoauwo ma mihn Samaria‑k indoa Ipoa, irai engdehn poaki pwa en minminehr iparai. Jesus ken minmine iparai oaroain rehn riau.

41 Armaj dir pwojonkihla Ah padahk. 42 Irai pwehng liho, “Apkas kamai pwojon, jaudi pwa jang in oamw sikesik, a pwa pwen amai pein rong; ioar ma kamai ne kidalki pwa Ih ma uhdahn Jounkoamoaurin jampah.”

Jesus Kemwehuwihla Nihn Koaun men Jermwein

43 Mwerin ah ne koaujoanki wijahu oaroain rehn riau, Jesus injang wijahu inlahng Galilee. 44 Pwa pein Jesus pwahla pwa, “Joukohp men joh kin woaun nehn uhdahn ah wija.” 45 Doari, nehn ah ne lel Galilee, armaj kan in wijahu kajamwo, pwa irai ne kapang joang ohroj ma Ih ne wiahda nehn anjoau in Joarwihn Passover nehn Jerusalem; pwa pein irai pwili sowoahda kamdippwo.

46 Doari, Jesus pwurlahng Cana nehn Galilee, wijahu ma Ih kawikla pil oang wain. Doari, laplap in wei men mine Capernaum, ma nah jermwein men johmwehuda. 47 Nehn woallo ah rongda pwa Jesus ne indoahng Galilee jang nehn Judea, ih inla ipoa — poaki pwa en indihdohng Capernaum apel kemwehuwihla nah jermweinno ma enkennoar mehdi. 48 Jesus ken pwa, “Joh emen nehn pwungamwai kan kak kamehlele ma kamwai joah kapang manman koalik apel kapwuriamwei kan.”

49 Min laplappo japoang, “Maing, koawoa en pwilihla ngoahi mwohn noai jermweinno ah pirin mehdi.”

50 Jesus pwa, “Alwe, nihmw jermweinno pirin mour.”

Woallo ken pwojon da Jesus pwa, ih ken allaluhla. 51 Nehn anjoauwo woallo japahldohng umwahu, nah liduhwok suhkioang ih ronngo pwa nah jermweinno pirin mour.

52 Woallo kalelpoak iparai nehn anjoau da ma Ih sapda mwehula. Irai pwa, “Aio, kiloak oau mwerin jauwaj, johla ah karkar.” 53 Jahmmo ken lemehda pwa ioar anjoauwa ma Jesus pwehng ih “Nihmw jermweinno pirin mour.” Doari ih apel ah peneinei ohroj ken pwojonla.

54 Me ioar kariauin kilel manman ma Jesus ne wiahda mwerin ah indoahng Galilee jang Judea.

<- John 3 John 5 ->