1 Dina Helaḡa e ore murinai, daba matana ai, pura dinana gini-gunana ai, Maria, hane Magdala, Maria ta ida, gara itana ela. 2 Una negana ai tano vada e laga bada; badina be Lohiabada ena aneru na guba amo e diho, nadi e kurea oho, bena latanai e halai kau. 3 Ia vairana e diari-diari, kevaru na heto; ena dabua danu kuroka-kuroka, snow na heto. 4 Ia garina e gari dainai hegima taudia na e heude-heude, mase taudia heḡereḡeredia ai ela. 5 A aneru ese hahine e hereva henidia, eto, Asio gari; dibagu umui na Iesu, e hasatauroa tauna, o tahuamu. 6 Ia na dia iniseni ai; vada e tore isi, e hamaoromui heḡereḡerena. Vada aoma; e atoa gabuna mani a itaia. 7 Bena baola haraḡa-haraḡa, ena hahediba ba hamaorodia, ia na mase amo vada e tore isi, bona baine gunalaimui Galilea ai; inuseni ai ba itaia.

8 Bena raruosi ese gara e rakatania haraḡa-haraḡa, mai garidia bona mai moaledia ida, ena hahediba ihadibadia totona e heau ela. 9 A dala ai Iesu na idia ida e hedavari, e hereva henidia, eto, Ba mauri! Bena raruosi e raka kahira, aena ai e rosia tao, e toma henia diho. 10 Bena Iesu eto, Asio gari; vadi aola, varavaragu ba hamaorodia, idia na Galilea baela, unuseni ai bae itagu.

11 Raruosi na e laova ai, hegima taudia haida danu hanua ela, e vara ḡaudia iboudiai na hahelaḡa taudia e hamaorolaidia. 12 Bena idia na hanua tau-badadia ida e henega bou, hegima taudia moni diaḡau e henidia, 13 eto, Baoto “Ena hahediba na hanuaboi ema, mahutamai ai eme henaoa”. 14 A ina sivarai gavana ese baine kamonaia, ai ese lalona baia hamarumarua, bena basine hadikamui. 15 Taunabunai, idia ese moni e abia, bena e hadibadibadia heḡereḡerena e hereva. Ina sivarai be Iuda taudia ese vada e hapiua ema bona harihari danu.

16 Hahediba gwauta-taosi na Galilea ela, Iesu ese e gwauraia guna ororona ai. 17 Unuseni ai e itaia, bena e toma henia diho. To haida na e daradarava. 18 Bena Iesu e raka kahira, e hereva henidia, eto, Siahu idoinai guba ai bona tanobada ai vada eme henigu. 19 Taunabunai baola, bese iboudiai hahediba ai ba halaodia, bona Tamana, Natuna, Lauma Helaḡa ladana ai ba ha bapatisodia. 20 Ba hadibadia danu, na henimui haheḡanidia iboudiai bae badina. Bona ba helalo tao danu, lau na daba daba iboudiai umui ida ta nohomu ela bona tanobada dokona.

<- MATAIO 27