Yona Xailongina

Yona
Namua Yona Bung Xailonginoa
Bungina Yona Asiriadi duwa Isreldi bixuadingdi. Long sabangga Ninibe wa numanuma Ninibe long mugamugangam. Xailongga li baxanga naxuyanga mana Toxoratamona tabina Yona ba ila Ninibe saing baxanga na lipuadi ba duxugia hatumingadinga namua na Urana xauxau ba hanggalangiadi mana kuboluding diandi. Ning, duwa Isreldi bixuadingdi, binabu Yona yamu Toxoratamona haruanganoa. Hauxana ba baxanga na Ninibedi saing sina gananga nadi bu duxugia hatumingadingdi. Xabia ba nabu baxanga, bagula duxugia, baing bagula Toxoratamona usingadi saing xapdi muli.
Lipu Buningama
Yona Urana lipuxing suxungungam tela, yabanoa Gat Heper. Amitai garanoa, bakbaginoa Sebulan (2 Xaitamoxi 14:25). Wa bungina Yeroboam 2 wa Isreldi xaitamoxidinga.
Haruanga Tuandi
• Toxoratamona bala Yona ba xap haruanganoa mala rangua Ninibedi, ne yamu haruanganoa (1:1-17)
• Yona harua xai sibuna na Toxoratamona mana xap muli (2:1-10)
• Toxoratamona bala Yona muli ba ila Ninibe, baing su mana haruanganoa (3:1-10)
• Toxoratamona hatanga usinganoa na Yona (4:1-11)

Yona Yamu Toxoratamona

1 Toxoratamona sina haruangua na Yona, Amitai garanoa. 2 Harua ba, “Umesa ula mana long sabangga Ninibe, bu usina haruanga haringina na lipuadi ba namua na ngabagu dilibu kubolu diang xumana.”

3 Ne Yona tuba ba luki mala sangua Toxoratamona saing ila bila Tasis. Ri mala Yopa, baing bagu waga tela bo ba ila bila ba. Gim wagua masup, baing haing mana, saing diluki mala Tasis, bu giti mala sangua Toxoratamona.

4 Baing ina naga, Toxoratamona sina yang haringina masok tegia, libu malasu sabanga sok sangaʼm wagua bo ba xuruti. 5 Lipu wagamdi dimaxuwa sibuna, saing taining tainina wagi mana urana dingiadi. Baing diting xalaxaladi mari tegia ba waga maxana monga.

Dilibulibu ne Yona kinu hadali waga lunia. 6 Binabu waga yanaminoa ila rangua saing harua ba, “Ai! Ukinu baru? Umesa uwagi mana urana ungia! Bola usinga kira bu tamati te.”

7 Baing lipu wagamdi dahangixaya ba, “Tauna, tatuba tuak tela bu tasok mana lipu baruamta mauxangang namuxinoa.” Dituba tuaga, baing ina naga, tuaga mogu Yona. 8 Binabu duxusunga ba, “Ubaxanga nam ba gaxarea namua mana mauxangana li xap kira! Oxatama baru? Yabama baru? Numanumama baru? Bakbagima baru?”

9 Yona haxuya ba, “Nga Hibru tela, saing nga ngasabu mana Toxoratamona, Urana long xaiyama, ina tongtongia tek xaung titi.”

10 Baladi ba luki mala sangua Toxoratamona. Binabu dimaxuwa buk, saing duxusunga ba, “Uraxata ulibu bila ba?”

11 Tega mesa mesa laing doa sibuna. Binabu duxusunga ba, “Am gariaung baru bu tega manilu mam?” 12 Baing haxuya ba, “Axap nga ating nga mari tegia, baing tega bagula manilu. Ngaxabiau, nga namua mana malasu sabangga li xapkang.”

13 Baing tegu, lipu wagamdi dituba ba dui wagua mala singia. Ditubatuba sus. Tega mesa sabanga buk. 14 Baing ina naga, duwagi mana Toxoratamona ba, “O Toxoratamona, am gaxusungaung haringina ba unggam mati te mana namua am galibu lipua li mati. Nabu am gaung lipu kubolu diang teguama, bing utam haruangia te. Namua na ung, O Toxoratamona, ung gulibu ung murungama.” 15 Baing daxap Yona saing diting mari tegia, saing tega manilu. 16 Baing ina naga, alali libu lipuadi dimaxuwa sibuna mana Toxoratamona, baing disina hananiangua mala rangua Toxoratamona saing dahau haruanguadi rangua.

17 Dilibu bila ba, baing Toxoratamona soxi song sabanga tela ba ngaru Yona. Baing Yona wa song gamonia xaidap tuwa yambong tuwa.

YONA 2 ->