UNGGUTINGA 9

Urana Hau Haruanga Rangua Noa

1 Baing Urana sina guxama na Noa xaung garandi, harua ba, “Axapsaxi asok xumana, saing abaxagi mana titia.[~1~] 2 Maxuwanga sabanga bagula xap asaxa longgalo mana namua ang. Asaxa titiam longgalo, mang sabalunam longgalo, asaxa longgalo dahaxa mua titia xaung song tekkam longgalo bagula dimaxuwang. Ngatadi rimaimia. 3 Axamang walingam longgalo, axamandi dima dila, ding longgalo bagula duwa anginga mang. Bila muga ngasina xauyangadi nang, hatata ngasina axamang longgalo nang.

4 “Ning labu axang asaxa mututungang sibinamgu tai. Siba bing walinga namu. 5 Baing maxuna lipua sibinoa haxuyanganoa nabu tela ung. Bagula ngata asaxua haruangia mana. Xauna, bagula ngata lipua haruangia, nabu ung lipu tela mati.

6 “Lipu gaxarea ung lipu tela mati,

ing sibuna bagula mati lipudi rimadingia,

namua na Urana tongtongia lipudi disok bila ing sibuna.”[~2~]

7 Ne ang ba, axapsaxi asok xumana, abaxagi mana titia saing asok xumana mana.”[~3~]

8 Baing Urana harua na Noa gabu garandi ba, 9 “Alungu to. Hatata nga ngahau haruangua ranguang xaung bakbagindi disok kimuya, 10 xaung axamang walingam longgalo duwa ranguang—mangdi, morudi, asaxa abungindi, xaung adi disok sangua wagua ranguang—axamang walingam longgalo duwa titia. 11 Ngahau haruangua ranguang bila li: Bagula axamang walingam longgalo dimati silingia muli te. Bagula silinga tela muli sok ba hanggalangia titia te.”

12 Baing Urana harua ba, “La li mogunga mana haruangua ngahau liwe makira xaung liwe mana axamang walingam longgalo duwa ranguang. Haruanga li bagula wa rangua lipu longgalo dima kimu mang. 13 Ngata moxa babuna mugabia, saing bagula wa mogunga mana haruangua ngahau liwe manga xaung axamang titiamdi. 14 Bunging bungina ngasina mugapdi dikau titia xaung dibagu moxa babunoa maluxu mugapdi, 15 bagula ngahatumia muli haruangua ngahau liwe manga xaung ang xaung asaxa walingam longgalo. Bagula langadi disi muli bu dahanggalangia axamang walingamdi te. 16 Bunging bungina moxa babuna wa mugabia, bagula ngabagu saing ngahatumia muli haruanga bungingbunginaloama ngahau liwe mana Urana xaung asaxa walingam longgalo duwa titia.”

17 Baing Urana harua na Noa ba, “Alali mogungua mana haruangua ngahau liwe manga xaung asaxa walingam longgalo duwa titia.”

Noa Garandi

18 Noa garang tuwa disok sangua wagua yadingdi bing Siem, Ham xaung Yapet. (Ham Kenan tibuna.) 19 Gara tuwadi ba Noa garandi, saing lipu longgalo etua mana titia li disok mana dingtung.

20 Noa lipu umangam, ina lipu mugamugangam mana xuma wain umanganoa. 21 Bunging tela nung wain tela saing kakahana. Baing kinu mulang maluxu numang mokiamia. 22 Baing Ham, Kenan tibuna, bagu tibung mulanginoa, binabu sok mala saing baxanga na sabangandi. 23 Saking Siem Yapet tang daxap imanga saing doxoxi disui ubudingia mala numa mokiamia, saing daxabubua tibuding mulanginoa. Bungina dilibu bila ba, dibagu halianga bu dibagu tibuding mulanginoa te.

24 Bungina Noa baguti saing hatuminganoa xai muli, saing lungu ba baru kubolunta garang kimuama libu mana, 25 bing harua ba,

“Mauxanganoa bing xap Kenan!

Bagula wa lipu oxata olanggam sibuna mana sabangandi.”

26 Baing harua xauna ba,

“Taiti Toxoratamona yanoa, Siem Urana inia!

Kenan bagula wa lipu oxata olanggam mana Siem.

27 Ngaxusunga Urana ba libu Yapet titinoa tubu,

xaung ba libu bakbagindi dirung xai rangua Siem bakbagindi,

xaung ba Kenan wa lipu oxata olanggam mana.”

28 Kimuya mana silingua Noa wa niani 350. 29 Noa nianindi disok 950, baing mati.

<- UNGGUTINGA 8 UNGGUTINGA 10 ->