1 Adshun isquien Nuquin Papan abiucshun ambi chiaid dada uaid sanampec. Abiuc daëdi dada uaid bidicabanquin: —Istemaidën isnushe —queshun 7ted icnuc bitaccatempin bitaccabanaid neposh. 2 Adnubien Nuquin Papan abi yacnoshon uaid mayan bëda chuiquid dapa comapenec onqueposh. —¿Tsuntsin nëid dada uaid bedshun bitaccaid chicbanquin chuibampatsiash? —quedo-quedoposh. —¿Tsuntsin Nuquin Papan chiaid bedshun isquin ambi chiacpadomboen naquin naimepatsiashba? —quequin tantiec adposh. 3 Adoaquien ëcbedanenquio icposh abitedimbo. Nëidic Nuquin Papabëd tabadquidotedi. Nëidic nidaidën tabadquidotedi. Nëidic unësaidotedi. Aidtedi dada uaid bedshun bitaccaid chicbanquin istequid nibëdposh. 4 Adsho isashini unësquio icnuc shubipoc: —Aid dada uaid bedshun chicbanquin chuibanquid nibëdec —quiash. 5 Adshobini anocquid tsusion: —Otac. Shubienda. Ënëd. Is. Dada uaid bedshun chicbanquin chuibanquid abi iqueque. Nuquin Papan matsesmequin chomiondaidquio neque. Aton tsusedpa Uda yampid icnuc aton tsusedpa utsi Dabidbimboecquid chuiquid dapambo nec. Utsibon dëniacadtiapimbo icquid nec. Aidëmbi chieshtoenquio icquin Nuquin Papan chiacpadomboenuidi naquidquio icquin aid dada uaid bedshun namendac —caposhi.
6 Adoac isquien isadaidbon Nuquin Papa cuidmenquio icnuen abided unës uaid obeca bacuëbimboecquid Nuquin Papabëd abi tsadacnombo isadtsec. —Matses icsaid bedshunuec abided cuidadec unësaid Esusquio nec —camenuec adec isadposh. Utsibo dacuenadec tabadnuc nënantanquio Nuquin Papabëdquio icposh. Anoentsëqui dadanobi ëshëcquido dacuenadec tabadnuc abi uquëctsëc tsusiobouidquio dacuenadec tabadposh. Padnuc obecabimboecquid yec aton pais 7tedi icnuc aton ëshëmbo aidtedquiobidi icposh. —Abitedishun Icbombo yec utsin dëniacadtiapimbo icquid Esusquio nec —camenuen aden pais ismeposhi. Adembidi: —Aton Mayambidi Nuquin Papan Mayan yec nidaid utsi-utsiec yacno matses abitedi yacno nidmiaid icnuc ompodëmëdtiapimbo icquid Esus nec —camenuen ëshë 7tedi ismeposhi ushquin isacbimboecnuc. 7 Adshumbic obecabimboec isadboedën Esusën Nuquin Papan abiucshunquio sananaid dada uaid bedposh. 8 Bedsho istanequien dadanobi ëshëcquidobëd tsusiobo 24ted icquido Esus ismec danëshën tinquebudcuededposh. —Bëdamboshë icquidquio mibi nec —quiash adcuededposh. Tsusiobon icbo-icboen ten-tencate sananquimbi utsiucshun shocoshëmpi bëdambo nuadnuc tauitempi sanamposh. —Ëmbi ten-tencamequin Nuquin Papa cuishoncamiacbimboec Esus tantiaquido cuëdënaid iquec —quequin aden ten-tencate sananquin ismeposhi. Adembidi: —Nëshun tauiac nëid pushudquid Nuquin Papa yacno nidacbimboec Esus tantiaquidon chianiaid iquec —quequin bëdambo nuadnuc tauitempi sananquin ismeposhi. 9 Adashic cuëdënte chucan Esus chiec cuëdëncuededposh tsusiobo.
11 Adnubien abi yacnoshon Nuquin Papan uaido mayan bëdabotsen cuëdëncuededposh dadpenquioshë. 10,000 X 10,000tedi udimbo dëniacash cuëte podotedi tambantiapimbo yactedimbo comapenec cuëdëncuededposh. Nuquin Papa Esusbëdi nënantanquio icnuc anoentsëqui dadanobi ëshëcquidouidquio dacuenadec tabadposh. Abi uquëctsëc dacuenadec tsusiobouidquio tabadposh. Aid uquëctsëc dacuenadequic mayan bëdabouidquio tabadposh. 12 Adec tabadec mayan bëdabo abitedimbo cuëdëncuededposh naden chiec.
13 Adnubien Nuquin Papan uaido abitedimbo cuëdëndocuededposh. Abi yacnocquidotedi yec nidaidën icquidotedi yec unësaid uincuemiaidotedi yec acten icquidotedi yec quec cuëdëncuededposh naden chiec.
14 Adsho tantiash dadanobi ëshëcquido: —Ai, abimbo caic —quenubi tsusiobo 24ted icquido: —Nuquin Icbo bëdamboshë iqueque. Ismenu —quetanec Nuquin Papabëdta Esus ismec danëshën tinquebudcuededposh.
<- Esusën Uan Ismiaid 4Esusën Uan Ismiaid 6 ->