Hebreo 3

Labi pa melangkaw si Jesus diyà ki Moises

1 Menge kedowa ko tinawal aw sinakop te Timanem, peg-aneng-aneng kaw den tepad ki Jesus pinemenalan tadon. Sikandin se insogò te Timanem dini te tanà, aw sikandin se egkagon kenitadon doton te Timanem. 2 Egkeseligan sikandin so gayed timolò te Timanem simogò kandin. Yan iling sikandin ki Moises gebii gayed timolò te Timanem te pegpengibing din te menge kemonaan tadon Judiyo ipolingun ko iling te balay te Timanem. 3 Pengkey melangkaw si Moises, meneng labi pa melangkaw si Jesus. Pengkey iduyun se balay, meneng labi pa iduyun se otaw mig-inang te balay. 4 Aw doen balay, doen heman otaw mig-inang te balay. Timanem se mig-inang te kedita. 5 Olò sineligan te Timanem si Moises. Insalig te Timanem kandin se pegpengibing te kedita te menge doma din Judiyo. Pineokit te pegtoman i Moises te sogò te Timanem kandin, netegahan tadon te metoman se ipetaga-taga te Timanem te modi aldaw. 6 Meneng kenà sineligan te Timanem si Jesus, so Batà din sikandin. Insalig te Timanem kandin se pegpengibing te kedita te menge sakop te Timanem. Aw gayed kidon somalig diyà te egpelimanan tadon, ipetaga-taga tadon te sakop kidon din.

Doen mèpiya ogpeanan impetagad te Timanem

7 Yan se doun te keilangan toloen tadon se inikagi te Espiritu Santo,

“Pengkey seini aldaw, aw domineg kaw te kagi te Timanem, 8 ikà niyo egketugul. Ikà niyo eg-iling te menge kemonaan niyo doton te kebigtilan gebii, so impekagsen dan se olo dan, aw wedà dan tolò, aw migtandà dan te kedalem te pedowan te Timanem.”

9 Minikagi se Timanem, “Pengkey kinità dan se menge kepelahan ininang ko kandan dalem te kepatan se omay, meneng tinandà dan pa se kedalem te pedowan ko. 10 Yan se doun te neopal a kandan, aw minikagi a diyà kandan, ‘Gayed dan egsoway lekat kanak. Kenà dan egtaking te ibeg ko.’

11 Yan neopal a aw migpakang a, ‘Eked ko dan peogpai doma ko doton te mèpiya ogpeanan impetagad ko.’ ”

12 Yan menge kedowa ko, peg-ahà kaw amon wedad palos otaw doton kenyo medaet se pedowan aw eked tolò, aw amon wedad somoway lekat te Timanem wedad temanan. 13 Yan keilangan megpekegsenay kaw te kelikit te aldaw dalem pa te doen aldaw, amon wedad metugul kenyo pineokit te peg-akal kenyo meg-inang te salà, 14 so aw gayed kidon somalig diyà ki Cristo lekat te keteboan lamig te temanan, meinang kidon menge doma din.

15 Ikà niyo egkelibel te kagi te Timanem seini,

“Pengkey seini aldaw, aw domineg kaw te kagi te Timanem, ikà niyo egketugul. Ikà niyo eg-iling te menge kemonaan niyo gebii, so impekagsen dan se olo dan, aw wedà dan tolò.”

16 Se menge otaw gebii dimineg te kagi te Timanem aw wedà tolò kandin, yan se kedita te otaw timaking ki Moises te peglowà dan lekat te Ehipto. 17 So gayed dan mig-inang te salà, yan neopalan dan te Timanem taman te kepatan se omay, aw nematay se kedita dan doton te kebigtilan. 18 Migpakang se Timanem tepad kandan, “Eked ko dan palos peogpai doma ko doton te mèpiya ogpeanan impetagad ko.” Yan se punù te Timanem tepad kandan, so wedà dan tolò kandin. 19 Pineokit kenyan, netegahan tadon te wedà dan pekeogpà doton, so wedà dan pemenal te kagi te Timanem.

<- Hebreo 2 Hebreo 4 ->