Link to home pageLanguagesLink to all Bible versions on this site
46
Peg-alin i Jacob doton te Ehipto

1 Nayan, miglolan si Jacob te kedakel te kedònan din, aw nesayo dan lekat te Canaan. Pegdateng dan doton te Berseba, doen ayam-ayam inimetayan i Jacob aw sinonog din amon segmanen din se Timanem iling te pegsagman te amay din si Isaac te Timanem. 2 Migpekità se Timanem diyà kandin te delem, aw timawal sikandin, “E Jacob.”

Timaba si Jacob, “Ee, seini a.”

3 Minikagi sikandin, “Siaken se Timanem. Siaken se Timanem egseligan te amay no gebii. Ikà egkelemitan te pegdoton no te Ehipto, so doton te Ehipto inangen ko se menge bowad-bowad nikaw ontò melangkaw pongan. 4 Domoma a kenyo te pegdoton niyo te Ehipto, aw ibingen ko heman se menge bowad-bowad nikaw molì dini te Canaan. Aw matay ka, si Jose se meglebeng kamno.”

5 Penga niyan, dimeleg dan si Jacob lekat te Berseba. Impesakay sikandin te menge batà din diyà te keriton impeibing te selotan te Ehipto. Impesakay dan heman se menge mengisù aw menge esawa dan. 6 Inibing dan heman se menge ayam-ayam dan aw menge kedònan inabat dan doton te Canaan, aw dimoton dan te Ehipto. Impetaking i Jacob se kedita te menge bowad-bowad din, 7 menge batà din meama aw bayi, aw menge apò din heman meama aw bayi.

8 Na, seini se menge ngadan te bowad-bowad i Jacob timaking kandin doton te Ehipto.

Si Ruben se kakay batà i Jacob. 9 Timaking si Ruben aw menge batà din meama si Hanoc, si Pallu, si Hesrom, aw si Carmi.
10 Si Simeon aw menge batà din meama si Jemuel, si Jamin, si Ohad, si Jakin, si Sokar, aw si Saul batà te bayi tege Canaan.
11 Si Levi aw menge batà din meama si Gerson, si Cohat, aw si Merari.
12 Si Juda aw menge batà din meama si Selas, si Peres, aw si Seras. (Nematay doton te Canaan se doma batà i Juda si Er aw si Onan.) Doen batà meama i Peres si Hesron aw si Hamul.
13 Si Isacar aw menge batà din meama si Tolas, si Puas, si Jasub, aw si Simron.
14 Si Sabulon aw menge batà din meama si Sered, si Elon, aw si Jaleel.
15 Yan se menge batà meama i Jacob timebaw diyà ki Lea doton te Mesopotamya. Doen heman batà dan bayi si Dina. Ketlowan teg telo se menge bowad-bowad i Jacob aw si Lea.
16 Timaking heman si Gad aw menge batà din meama si Sifeon, si Hagi, si Suni, si Esbon, si Eri, si Arod, aw si Areli.
17 Si Aser aw menge batà din meama si Imnas, si Iskas, si Isvi, si Berias, aw etebay dan si Sera. Doen batà meama i Berias si Eber aw si Melkiel.
18 Sempolò teg enem se kedita dan menge bowad-bowad i Jacob aw si Zilfa, sìyan allang imbegay i Laban diyà te batà din si Lea.

19 Dowa se batà i Jacob timebaw diyà te esawa din si Raquel, ngadan dan si Jose aw si Benjamin.

20 Dowa se batà meama i Jose timebaw doton te Ehipto, si Manases aw si Efraim. Yan se batà i Jose aw si Asenat, batà i Potiferas, sìyan egpengibing te menge otaw migsimba te aldaw doton te lonsod te On.
21 Doen menge batà meama i Benjamin si Belas, si Betser, si Asbel, si Geras, si Naaman, si Ehi, si Ros, si Mufim, si Hufim, aw si Ared.
22 Sempolò teg epat se kedita dan menge bowad-bowad i Jacob aw si Raquel.
23 Timaking heman si Dan aw batà din meama si Husim.
24 Si Neftali aw menge batà din meama si Jaseel, si Guni, si Jeser, aw si Selem.
25 Pito se kedita dan menge bowad-bowad i Jacob aw si Bilha, sìyan allang imbegay i Laban diyà te batà din si Raquel.

26 Keneman teg enem se kedita te menge bowad-bowad i Jacob dimoton te Ehipto. Wedà pesipati diyà te bilang se menge esawa te batà din. 27 Dowa se batà i Jose timebaw doton te Ehipto, aw yan kepitowan se kedita dan diyà te pamilya i Jacob te pegdoton din te Ehipto.

Peg-ogpà i Jacob doton te Ehipto

28 Nayan, insogò i Jacob si Juda monà kandin domoton ki Jose, so ibeg din songonen dan i Jose doton te Gosen. Pegdateng dan doton, 29 simakay si Jose te kelisa din, aw dimoton sikandin te Gosen amon somongon te amay din. Pegdateng din, kinelesan din se amay din, aw migkelag te ontò nenamay. 30 Minikagi si Jacob diyà ki Jose, “Mepakay den kanak aw matay a, so kimità a den kamno aw netegahan ko den te neantay ka pa.”

31 Penga niyan, minikagi si Jose diyà te menge kedowa din aw menge doma otaw diyà te pamilya te amay din, “Domoton a den te selotan amon meg-indan a kandin te dimateng den lekat te Canaan se kedita niyo menge kedowa ko aw menge doma otaw diyà te pamilya te amay ko. 32 Meg-indan a kandin te telediyaga kaw, aw egtonggò kaw te menge ayam-ayam, aw inibing niyo den se kedita te karniro niyo aw menge doma ayam-ayam niyo, aw kedakel te kedònan niyo. 33 Aw tewalen kaw te selotan, aw insaen kaw din aw eden se eg-inangen niyo, 34 keilangan meg-indan kaw kandin te telediyaga kaw lekat te pegkemengisù niyo, iling te eg-inangen te menge kemonaan niyo gebii. Doun niyan, ipeogpà kaw din doton te Gosen.”

Yan se inikagi i Jose diyà kandan, so eglindoan te menge tege Ehipto se telediyaga.

<- Genesis 45Genesis 47 ->