APOKALIPSE 5

Tappet tox xix Kahnẽn Kutok

1 Ha ta' pẽnãhã 'ãte, pa' xip tappet tox kĩy xahix 'ũyĩpxe'e kopah, yã nõm te' xat 'ũyĩm kopah, yã nõm te mĩmpe yũm'ax yĩmũ' yũm, ha tappet tox kĩy xahix yĩmũ' pip kax'ãmi'ax punethok 'ũkeppa xi' xãmpah, ha kĩy'ax xohix te' 7 te tappet tox kĩy. 2 Ha ta' xip pexkox yõg nũ'kutnã'ax ka'ok, yã Topa yõg kãmãnat, ha hãm'ãktux ka'ok, hu:

—Pi'ã' xip nõm max, yã nõm te kĩy'ax mep yũmmũg, nũy tappet tox ko'ah? Kaxĩy.

3 Pa' xip'ah pexkox tu' xix hãm xexka tu' nõm max, yã nõm te tappet tox ko'ah, nũy kopa' pẽnã'. 4 'Ũkpotaha', yã' xip'ah nõm max, yã nõm te tappet tox ko'ah, nũy kopa' pẽnã'. 5 Ha ta' xip tik xexka', tu hãm'ãktux, hu:

—'Ãpota hok. Pẽnã', 'Ũxip nõm ka'ok, tu xoktut putuk, yã xuxet'ax Yona xop yõg xoktut, yã Namix yõg xupepmã xop kopa' xip, yã tute' xut. Tute kĩy'ax mep yũmmũg, nũy tappet tox ko'ah. Kaxĩy.

6 'Ãte' pẽnãhã', pa' xip nõm xuxet'ax Kahnẽn Kutok. Kaxĩy. 'Ũk-nĩhã' xip nõm te' xat yõg mĩmpe yũm'ax yĩmũ', ha yõnnã'ĩ te' 4 te Kahnẽn Kutok xakot, ha tik xexka te' 24 te Kahnẽn Kutok xakot kamah, ha Kahnẽn Kutok xok tap, payã' putpu' hi', tup-tox kup xohix te' 7, tu' pa xohix te' 7. 'Ũp-tox kup xi' pa yã koxuk te' 7 Topa yõg, yã koxuk mõ'pok hãpxexka xohix tu'. 7 Ha ta' mõg Kahnẽn Kutok, ha' xip tappet tox 'ũnõy yĩm kopah, yã nõm te' xat yĩm kopah, yã nõm yũm mĩmpe yũm'ax yĩmũ', ha Kahnẽn Kutok te tappet paha', 8 yã' paha', ha yõnnã'ĩ te' 4 te hãm tu' pip Kahnẽn Kutok keppah xix tik xexka te' 24 te hãm tu' pip kamah Kahnẽn Kutok keppah. Ha yõnnã'ĩ yõg 'ap pip, nũy yõg tutxit kaxyã', xix tik xexka xop te' kamah, tu' xohix yõg kãnẽy yãnãm 'ãta yĩxux pip kamah, nũy nõm kopa mõ'hap 'ũkõnnõn, nũy tu hax max 'ãpep pepix. Hã kaxĩy 'ũkuxa mãm ka'ok xop te Topa pu hãm'ãktux, ha hãm'ãktux te pepi' mõg. 9 'Ũxohix tek-tex tup hãk-tex, hu:

—'Ãmax 'ãpu tappet tox pa',

nũy kĩy'ax mep.

Hamũn, hõmã tikmũ'ũn te 'ãp-tex,

yã tikmũ'ũn pupi 'ãxok,

nũy tikmũ'ũn mõgã Topa hah.

Yã' xohix mõgãhã',

yã hep xohix xop yõg xop, xi' yĩy'ax xohix yõg xop,

xix hãm xexka xohix yõg xop, xix xop xohix.

10 'Ũxohix te 'ãmãnex xop putuk,

tu Topa pu hãpxopmã max.

Topa te nõm xat, yã' yõg tikmũ'ũn,

ha Topa yõg tikmũ'ũn te' nõy xohix xat putup hãm xexka tu'.

Kaxĩy.

11 'Ãte' pẽnãhã 'ũxeheh, tu pexkox yõg nũ'pok xop 'ãpak, yã' xohix te' 10.000 punethok xi' 1.000 punethok. 'Ũxohix te nõm te' xat xakot, yã nõm te mĩmpe yũm'ax yĩmũ' yũm, xix yõnnã'ĩ te' 4 xakot, xix tik xexka te' 24 xakot. 12 'Ũxohix tek-tex ka'ok, hu:

—Hõmã tikmũ'ũn tep-tex Kahnẽn Kutok.

Pa hõnhã 'ãxip, yã 'ãmax, yã 'ãka'ok nõynã'ãmõg.

Xate' xohix yõg hãpxop pop. Xate hãpxohix yũmmũg,

ha' xohix te 'ãmũn 'ãpak, nũy 'ãxexka mĩy, nũy 'ãmũn 'ãktux max.

Kaxĩy.

13 Ha ta' xupak 'ãte 'ũhi xop xohix pexkox tu' xix kõnãg xexka tu', yã xohik-tex, hu:

—Yã' max xe'ẽgnãg nõm te' xat, nõm te mĩmpe yũm'ax yĩmũ' yũm.

Yã' max xe'ẽgnãg Kahnẽn Kutok.

Yũmũ'ãte nõm pu' popmãhã hãpxop xohix.

Yũmũ'ãte nõm 'ãktux max, tu nõm 'ãpak,

tu' xexka mĩy yãy kuxa kopah.

Tute yũmũg xat putup mõkuma'mõg, ha' kux 'ohnãg.

Kaxĩy.

14 Ha yõnnã'ĩ te' 4 te:

—Hamũn! Kaxĩy.

Ha tik xexka xop te hãm tu' pip, tu' kuxa te' yẽy, tu Topa 'ãktux max xix Kahnẽn Kutok 'ãktux max.

<- APOKALIPSE 4 APOKALIPSE 6 ->