1 “Ebpekehuyab is kumeng ku tenged keniyan te vagyu. 2 Pemineǥa niw is edraǥeb he laǥeng te Megbevayà. 3 Impekilat din diyà te langit taman te kineziyuan he vahin te kelibutan. 4 Ne egkezineg is kedraǥeb te mezaǥing he laǥeng din. Wazè din eǥena is kedraǥeb te laǥeng din. 5 Egkein-inuwan is edraǥeb he laǥeng te Megbevayà. Mibaal sikandin te egkein-inuwan he menge vaal he kenè tew egketegkad. 6 Ebmenduan din is ayis te kedtanà diyà te tanà wey is uzan te ked-uzan te mereǥes, 7 su para mekehimeley is menge etew te terebahu zan, ne ebpekepurung dan ebpekeisip-isip te menge vaal te Megbevayà. 8 Is menge langgam, ed-eles diyà te menge elesè dan ne zutun dan dà emun timpu te vagyu. 9 Is bagyu wey is meǥenew he keramag ne ziyà ebpuun te midteǥuan duen. 10 Pinaaǥi te ǥehinawa te Megbevayà nepurma is ayis, wey nehimu he ayis is meluag he wahig. 11 Ebpenuen din te wahig is menge ǥapun, ne ibpekilat din heini. 12 Ed-eneb-eneb is menge ǥapun seled te tivuuk he kelibutan sumalà te mandù te Megbevayà. 13 Ibpeuzan te Megbevayà te mereǥes su para zuen wahig diyà te tanà, etawa pinaaǥi te kebmansu zin te etew, etawa pinaaǥi te kebpaahaa zin te gaǥew zin.

14 “Pemineǥa nu heini, Job, wey ngunngunua nu is egkengein-inuwan he ebeelan te Megbevayà. 15 Netuenan nu ve ke ebmenmenuwen te Megbevayà te edumala is menge ǥapun, wey ke ebmenmenuwen din is kebpekindab te kilat? 16 Netuenan nu ve ke maan is edletewletew is menge ǥapun diyà te zivavew? Baal heini te egkein-inuwan he Megbevayà he kenà edtaman is ketau zin. 17 Sikew is edrimrimusengan tenged te meinit he keramag he ebpuun diyà te zivavà, 18 ebpekeuǥup ke ve te Megbevayà te kedempas te langit wey te kedhimuwa kayi he mezesen iring te peǥelungan he brunsi? 19 Emun uluwanen ka, keǥiyi key ke hengkey is ereg he egkeǥiyen dey ziyà te Megbevayà. Kenè dey egketuenan ke ebmenmenuwen te egkaǥi is ketezengan dey su nerusireman is ked-isip-isip dey. 20 Kenà a egkaǥi ziyà te Megbevayà he ebpekidlalis a kandin, su kela ke zèdeeti e zin. 21 Wazà etew he egkepurungan din egketengtengi is andew su ebpekesirang heini su utew mesiǥa he ziyà te langit emun idlayap te keramag is menge ǥapun. 22 Puun te zizaya, egawas is Megbevayà he ed-ilak-ilak iring te vulawan ne egkein-inuwan is kebpekesirang din. 23 Kenè tew egketegkad is Mekeǥeǥehem he Megbevayà he lavew te langun, ne kenè kiw ebpekeuvey ziyà te kandin. Metazeng sikandin wey kenà ebpenlupiglupig, 24 umbe, edtehuzen sikandin te menge etew. Ne kenè din edseǥipaan is menge etew he kunaan dan ke metau sikandan.”

<- Job 36Job 38 ->