1 “Hapit e en ebpatey; henduen be te egkevidtew en is gehinawa ku. Andam en he edawat kedì is penlevengà. 2 Edliǥuyan a te menge mesudì. Utew inmezaat te ǥehinawa ku is kedsudia zan kedì. 3 He Megbevayà, tevangi a wey a melibri. Wazè en duma he ebpeketavang kedì, kekenà, iyan ke zà. 4 Midsabpeng nu is ked-isip-isip te menge emiǥu ku su wey zan kenà mekesavut. Umbe kenè nu ituǥut he ebpekezaag dan kayi te kedsumbunga zan kedì. 5 Iring sikandan te etew he edluib te menge emiǥu zin su wey mekeselapì, he iyan egkehimu he hinungdan te kebpekebmereǥen te menge anak din.

6 “Midhimu a te Megbevayà he meengiti te menge etew, ne ed-ilevan e zan diyà te vuked. 7 Mibmerusirem en is ked-ehè ku tenged te kegkeseeng ku, ne henduen be te neiring en te ǥimukud is lawa ku. 8 Is menge etew he mid-isip dan he metazeng sikandan neinuinu kayi te nehitavù kedì. Ed-isipen e zan he lalung he iring te etew he wazà medsarig te Megbevayà. 9 Iyan isip dan he melig-en wey edsigudu ed-iseg is kelig-en te kebpengungubpaan te etew he metazeng. 10 Piru ebpeuman a ebpesusi kandan. Ne siguradu egkesavut ku zutun te kedsusi zan he wazà minsan sevaha kandan he nekesavut. 11 Meǥaan en egketapus is menge andew ku. Wazà medlampus is menge pelanu wey menge tinguhè ku. 12 Piru migkaǥi sikandan te kela ke mebmeupiya zed is kebpekesavuk ku te huziyan he timpu. Ke sikandan te, ‘Divaluy te merusirem ne zuen kerayag he ebpekeuma.’ 13 Emun ebperateng a, ne iyan ebperetengen ku is kebpekeubpè ku ziyà te lugar te menge minatey. Egkesuatan ku en te ebpelastar is hizeǥaan ku keniyan te merusirem he lugar. 14 Is leveng ed-isipen ku he amey ku, ne is menge tagkey he egketket kedì, ed-isipen ku he iney ku wey menge etevey ku. 15 Duen ku pe be egkeperateng? Hentei is ebpekekaǥi he zuen ku pa egkeperateng? 16 Is perateng ku eduma kediey ziyà te lugar te menge minatey. Ebpezumehè key ziyà te zizalem te tanà.”

<- Job 16Job 18 ->