2 Menge Hadì 24

1 Dutun te timpu te kedhadì ni Jehoyakim, midsurung ni Hadì Nebucadnezar he hadì te Babilonia is Juda ne nehimu he sakup din si Jehoyakim seled te tetelu he tuig. Piru te huziyan he timpu nekidsukulà si Jehoyakim ki Nebucadnezar. 2 Mibpengelinteuwan te Nengazen he surunga te menge tig-Babilonia, tig-Aram, tig-Moab, wey tig-Amon is Juda, sumalà te migkaǥi te Nengazen pinaaǥi te menge suluǥuen din he mibpenaub din. 3 Nehitavù heini ziyà te Juda sumalà is insuǥù te Nengazen su para ikepaawè din sikandan diyà te lugar zan wey mekepekeziyù kandin, tenged te menge salà he mibeelan ni Manase, 4 ragkes en is kebpenhimetayi zin te menge etew he kenà ereg he edhimetayan. Impetiǥis din is lengesa zan diyà te Jerusalem, ne kenà heini egkepesaylu te Nengazen.

5 Is duma pa he ǥuǥud mehitenged te kedhadì ni Jehoyakim wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Juda. 6 Ne hein minatey en si Jehoyakim, si Jehoyakin he anak din iyan nekeilis kandin te kedhadì.

7 Wazè en med-uman medsurung is hadì te Ehipto, su mid-aǥew te hadì te Babilonia is langun he menge lugar zin, puun te zal-ug te Ehipto taman te Wahig he Eufrates.

Is Kedhadì ni Jehoyakin diyà te Juda

(2 Cronica 36:9, 10)

8 Mibpenuiǥen si Jehoyakin te 18 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te tetelu he vulan. Is iney zin iyan si Nehusta he anak ni Elnatan he tig-Jerusalem. 9 Mezaat is ulaula zin diyà te etuvangan te Nengazen, iring te mibeelan te amey zin he si Jehoyakim.

10 Duen te timpu te kedhadì din, midsurung te menge upisyal ni Hadì Nebucadnezar he hadì te Babilonia is Jerusalem, ne midliǥuyan dan heini. 11 Ne midhendiyà si Nebucadnezar te Jerusalem dutun te kedliǥuwi kayi. 12 Ne midsurindir ziyà te kandin si Hadì Jehoyakin, duma is iney zin, menge suluǥuen din, menge dungganen he menge etew zin, wey menge upisyal zin.

Ne hein ikewalu he tuig te kedhadì ni Nebucadnezar ziyà te Babilonia, mibihag din si Jehoyakin. 13 Sumalà te nekaǥi zengan te Nengazen, mibpenguwa ni Nebucadnezar is langun he ketiǥeyunan diyà te valey te Nengazen wey ziyà te turuǥan, wey is langun he vulawan he menge gelemiten he mibpeveelan ni Hadì Solomon he hadì te Israel he para te valey te Nengazen. 14 Ne mibihag din is 10,000 he menge meǥinged diyà te Jerusalem, ragkes en is langun he menge upisyal wey is kinemeupiyahan he menge sundaru, ne is langun he memetau he ebaal, wey menge platiru. Iyan dà nesamà is utew menge pubri.

15 Mibihag ni Nebucadnezar si Jehoyakin ne mid-uwit din diyà te Babilonia, ragkes en is iney zin, menge esawa zin, menge upisyal wey dungganen he menge etew ziyà te Juda. 16 Mibihag daan ni Nebucadnezar is 7,000 he memevurut he menge sundaru wey 1,000 he memetau he ebaal wey menge platiru zuen te menge sundaru. 17 Is midhimu ni Nebucadnezar he hadì he ilis ki Jehoyakin iyan si Matania he anggam ni Jehoyakin. Ne mid-ilisan din is ngazan ni Matania te Zedekia.

Is Kedhadì ni Zedekia ziyà te Juda

(2 Cronica 36:11, 12; Jeremias 52:1-3)

18 Mibpenuiǥen si Zedekia te 21 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 11 he tuig. Is iney zin iyan si Hamutal he anak ni Jeremias he tig-Libna. 19 Mezaat is ulaula zin diyà te etuvangan te Nengazen, iring te mibeelan ni Jehoyakim. 20 Umbe, hein neuǥet impaawà te Nengazen diyà te lugar zan is menge tig-Jerusalem wey menge tig-Juda wey mekepekeziyù kandin. Neulaula heini ziyà te kandan tenged te kegkepeuki te Nengazen kandan.

Is Kegkezeeti te Jerusalem

(2 Cronica 36:15-21; Jeremias 52:3b-11)

Ne nekidsukulà si Zedekia te hadì te Babilonia.

<- 2 Menge Hadì 23 2 Menge Hadì 25 ->