Aj Ebrey 3

Jesús nimxixtl toklin tze'n te Moisés

1 Atzin ja'lin, ayi'y werman, saqxix ta'ye kyanmi'n twutz Dios, ex o chi txokli'y tu'n qMan Dios, tu'n kyoka te Ttanim ex te tja. Chi ximintzintza ti'j Crist, a Jesús, a sma'n tu'n Dios te onilqe, ex tok te tnejilxix pale te qe twutz Dios. 2 Atzin te Jesús jikyinxix twutz Dios tojjo toklin tzalu'n twutz tx'otx', ikytzi'n tze'n te Moisés ok jikyin tojjo toklin toj tja Dios ojtxe.[~1~]

3 Me atzin te Jesús nimxixtl toklin tze'nku te Moisés, ikyxjo tze'nku jun b'inchil ja nimxixtl toklin tze'nku te ja. 4 Qu'n tkyaqil ja, at jun b'inchilte, me ate qMan Dios b'inchilte tkyaqil tch'i'ysb'in, noq tu'n Tk'wal. 5 Atzin te Moisés ok jikyin toj tja Dios, me noq tze'nku jun aq'nil, ex tu'n tyolin ti'jjo a ktzajil tq'ma'n Dios te. 6 Qalatzi'n te Crist, nya jun aq'nil, qala' K'walb'aj, ex jikyinxixjo tkawb'il qib'aj, a awo, tja Diosqo, qa ma japin qu'n, ex qa ma qe qk'u'j te jun majx ti'jjo a nqo ayo'n ti'j toj kya'j, ex nqo yolin ti'j tzalu'n twutz tx'otx'.

Jun ajlab'l o tzaj tq'o'n qMan Dios qe, noq tu'n qnimb'il

7 Tu'ntzi'n ikyjo, chitzin Xewb'aj Xjan toj Tu'jil Tyol Dios kyjalu'n:

Qatzin ma kub' kyb'i'n ja'lin, a ntq'man Tyol Dios,

8 mi kub' kykujsin kyanmi'n tu'n kynimi'n,

tze'nqeku' kyxe'chila ojtxe,

aye' el kyi'jlin tajb'il Dios toj tzqij tx'otx'.

9 Ayeqetzi'n kyxe'chila ojtxe, aye' el kyi'jlin wajb'ila,

¿Ma mitzin xkyliji'y jni' yek'b'il wipi'n toj ka'wnaq ab'q'e?

10 Tu'ntzin ikyjo, o tzaj nq'oja kyi'j, chi Diosjo.

Ex kukx ntxalpajjo kyanmin,

ex kukx nchi txalpajjo toj kychwinqil,

ex nti'x nchi ximin ti'jjo wajb'ila.

11 Tu'npetzi'n, chi Diosjo, tzaj nq'oja kyi'j,

ex xi nq'ma'n kye, tu'n mina chi okx tojjo Canaán,

a tx'otx' te ajlab'l, a b'antnin wu'n, tu'n kyajlan wuk'iy.[~2~]

12 Werman, tu'npetzi'n tkyaqiljo lo, kyajsintz ti'j kyanmi'n, tu'n mina chi txalpaji'y toj kynimb'ila ti'j qMan Dios. 13 Qala', kyq'onx kynab'la kyxolxa tkyaqil q'ij, tze'nku at amb'il; tu'ntzin mi chi kub' sb'u'ni'y tu'n il, ex tu'n mina txi kykujsin kyanmi'n ti'jjo tajb'il qMan Dios.

14 Qa qaj tu'n qten junx tuk'a Crist toj kya'j, il ti'j tu'n qten wa'lxix toj tkyaqil, tu'n qb'et wen toj qchwinqil, ex tu'n tqexix qk'u'j, tze'nkuxjo tej xqo nimin te tnejil.

15 Tu'n ikyjo, chitzin Tyol Diosjo kyjalu'n:

Qatzin ma kub' kyb'i'n ja'lin, a ntq'ma'n Tyol Dios,

mi kub' kykujsin kyanmi'n tu'n kynimi'n tze'nqeku kyxe'chila ojtxe,

aye' el kyi'jlin tajb'il Dios.[~3~]

16 Tu'ntzi'n tkyaqiljo ikyjo, at ila' nxjelb'itza kye'y:

Tnejil, ¿Ankyeqexixjo xi kykujsin kyanmin, a otaqxi kyb'i Tyol Dios? ¿Nyapele aye' i etz ti'n Moisés toj tx'otx' Egipto? 17 Tkab', ¿Anqi'j tzaje tq'oj Dios toj ka'wnaq ab'q'e? ¿Nyapela kyi'jjo i b'inchin il toj tzqij tx'otx'? Ex tu'n ikyjo, b'e'x i kyim. 18 Toxin, ¿Anqi'j tzaje tq'oj Dios, ex anqi'j kub' tq'ma'n Dios, tu'n mi chi okxi tojjo tx'otx' te ajlab'l, a otaq txi tq'ma'n Dios kye? ¿Nyapela aye xjal, mix kub'e kynimine Tyol Dios?[~4~]

19 Tu'ntzintzjo, n-el qniky' te, qa mix i okxi xjal toj tx'otx' te ajlab'l, tu'n mix kub'e kynimine Tyol Dios.

<- Aj Ebrey 2 Aj Ebrey 4 ->