Ezekiel 29

Wach mokor kuom Misri

Kum kuom Farao

1 Odiechiengʼ mar apar gariyo, dwe mar apar, higa mar apar, wach Jehova Nyasaye nobirona kama: 2 “Wuod dhano, chom wangʼi kuom Farao ruodh Misri kendo ikor wach kuome kaachiel gi piny Misri duto. 3 Wuo kode kendo iwachne ni: ‘Ma e gima Jehova Nyasaye Manyalo Gik Moko Duto wacho:

“ ‘Adagi, in Farao ruodh Misri,

ichalo gi thuond rachier

modak e aore magi.

In to iwacho niya, “Aora Nael en mara,

mane aloso gi lweta awuon.”

4 To abiro keto olowu e dhogi

kendo abiro miyo rech duto manie aoreni mokie kalagaklani.

Abiro goli oko e aoreni,

ka rech duto omoko e kalagaklani.

5 Abiro boli e piny motimo ongoro,

in kaachiel gi rech duto manie aoreni.

Ibiro podho e dier pap alanga

kendo ok nochoki kata kwanyi.

Abiro chiwi kaka chiemo ne le mager mag piny

kendo ne winy mafuyo e kor polo.

6 Eka ji duto modak Misri nongʼe ni An e Jehova Nyasaye.

“ ‘Isebedo mayom yom ka odundu ni dhood Israel. 7 Kane gimaki gi lwetgi to ne ipilori mi ichwo gokgi; to kane giyiengore kuomi to ne itur ma imiyo odingʼ-gi owil.

8 “ ‘Kuom mano, ma e gima Jehova Nyasaye Manyalo Gik Moko Duto wacho: Abiro kedo kodi gi ligangla kendo abiro nego jogi gi jambgi. 9 Piny Misri biro dongʼ gunda mokethore maonge tich. Eka giningʼe ni An e Jehova Nyasaye.

“ ‘Nikech ne iwacho niya, “Aora Nael en mara; ma aloso gi lweta awuon,” 10 kuom mano, adagi kaachiel gi aoregi, kendo abiro loko piny Misri kama okethore, motwo kendo maonge tich, chakre Migdol nyaka Aswan, machop nyaka tongʼne gi Kush. 11 Onge tiend dhano kata le ma noluwe; onge ngʼama nodag kanyo kuom higni piero angʼwen. 12 Abiro miyo piny Misri doko piny mokethore e dier pinje mokethore, kendo mier mage madongo biro bedo kanyakla mar mier madongo ma ji odarie kuom ogendini, ka akeyogi e kind pinje.

13 “ ‘Kata kamano ma e gima Jehova Nyasaye Manyalo Gik Moko Duto wacho: Bangʼ higni piero angʼwen anachok jo-Misri kagologi e pinje mane akeyogie. 14 Abiro dwogogi kagologi e twech, mi aduokgi yo ka Malo mar Misri,[a] e lop kweregi. Kanyo ginibedie mayom yom moloyo ogendini duto. 15 Enobed pinyruoth mayom yomie moloyo pinjeruodhi duto kendo ok nochak otingʼre oyombi pinje mamoko kendo. Abiro miyo obed manyap mogik ma ok nochak obed gi loch ewi pinje mamoko. 16 Misri ok nochak obedi kama jo-Israel okete genogi kendo, to nobedi gima paronigi richogi sa asaya ma ginilokre ire mondo gikwae kony. Eka giningʼe ni An e Jehova Nyasaye Manyalo Gik Moko Duto.’ ”

Mich momi Nebukadneza

17 Tarik achiel, dwe mar achiel, e higa mar piero ariyo gabiriyo, wach Jehova Nyasaye nobirana kama: 18 “Wuod dhano, Nebukadneza ruodh Babulon nochoko jolwenje mondo oked matek gi piny Turo; wiyegi noluny kendo gokgi nobuth. To kata kamano en kaachiel gi jolweny mage ne ok giyudo mich moro amora kuom tijno mane otele mar kedo gi Turo. 19 Kuom mano, ma e gima Jehova Nyasaye Manyalo Gik Moko Duto wacho: Abiro chiwo Misri e lwet Nebukadneza ruodh Babulon, kendo obiro tingʼo mwandune odhigo. Obiro yako kendo oketho pinyno kaka chudo mar jolweny mage. 20 Asemiye Misri kaka mich kuom tichne, nikech en kod jolweny mage ne gitiyona, Jehova Nyasaye Manyalo Gik Moko Duto osewacho.

21 “Odiechiengno anami tungʼ moro dongi e dhood Israel, kendo anayaw dhogi e diergi. Eka giningʼe ni An e Jehova Nyasaye.”

<- Ezekiel 28 Ezekiel 30 ->