Eklesiastes 2

Mor mokalo tongʼ onge tiende

1 Ne aparo e chunya niya, “Bi sani, abiro temi gi gik ma moro wangʼ mondo afwenyie gima ber.” To mano bende ne ayudo kaonge tiende. 2 Ne awacho niya, “Nyiero en fuwo kendo en angʼo ma mor makamano konyo?” 3 Ne atemo bedo mamor kuom madho kongʼo, kendo bedo mofuwo, ka pacha pod telona gi rieko. Ne adwaro fwenyo ni en angʼo mowinjore mondo ji otim e bwo polo e ndalo matin mar ngimani.

4 Ne achako tije madongo kaka: Ne agero ute ne an awuon kendo apidho mzabibu e puothe. 5 Kendo ne aloso puothe mamoko kod puothe mopidhie yiende mar yweyo mi apidho kit olembe mopogore opogore eigi. 6 Ne akunyo yewni ma pi gudore mondo yiendego oyud pi. 7 Ne angʼiewo jotich machwo kod mamon kendo ne an gi jotije mamoko mane onywol e oda. Bende ne an gi kweth mangʼeny mag dhok kod rombe moloyo ngʼato angʼata mane okuongona bedo jatelo e Jerusalem. 8 Ne achoko fedha gi dhahabu, kod girkeni mag ruodhi gi gwenge. Ne abedo bende gi jower machwo kod mamon, kendo gi mon duto mane nyalo moro chuny dichwo. 9 Ne abedo ngʼama lich miwuoro moloyo ngʼato angʼata mane okuongona bedo jatelo e Jerusalem. E magi duto riekona matut nosiko koda.

10 Ne ok atuono wangʼa gimoro amora mane onyalo gombo,

kendo chunya bende ne ok atuono mor.

Chunya nobedo gi mor kuom tijena duto mane atimo,

kendo mano ema nobedo pok mar tijena duto.

11 To kata kamano kane anono duto mane lweta osetiyo

kod gino mane asenyagora mondo ayudi,

gik moko duto ne onge tiendgi, mana kalawo bangʼ yamo;

onge ohala mane ayudo e bwo wangʼ chiengʼ.

Rieko kod fuwo onge tiendgi

12 Bangʼe ne aketo pacha mondo angʼe pogruok

manie kind rieko, memruok kod fuwo.

En angʼo ma ruoth mokawo kar ruoth machielo nyalo timo

moloyo mano mosetim?

13 Ne afwenyo ni rieko matut ber moloyo fuwo,

mana kaka ler ber moloyo mudho.

14 Ngʼatno man-gi rieko neno kuma odhiye,

to ngʼama ofuwo to wuotho e mudho,

to kata kamano ne afwenyo ni

gimoro achiel ema timore ni ji ariyogi.

15 Eka ne aparo e chunya niya,

“Gima yudo ngʼama ofuwo biro yuda an bende.

Koro en ohala mane ma abiro yudo kuom bedo gi rieko?”

Bangʼe ne awacho e chunya niya,

“Kata mana ma bende onge tiende.”

16 Mana kaka ngʼama ofuwo ok par,

e kaka ngʼama nigi rieko bende ok par;

nikech e ndalo mabiro ok nopargi giduto.

Ngʼama ofuwo gi ngʼama riek,

giduto gibiro tho machalre!

Tich matek onge tiende

17 Omiyo ne asin gi ngima, nikech tich mitimo e bwo wangʼ chiengʼ ne pek mohewa. Magi duto onge tiendgi, gichalo gi lawo bangʼ yamo. 18 Ne asin gi gik moko duto mane asenyagora godo e bwo wangʼ chiengʼ, nikech nyaka ne awegi ne ngʼatno mabiro bangʼa. 19 To ere ngʼama ongʼeyo ni ngʼat mabiro luwano nobed ngʼama ofuwo kata ngʼama riek? Kata obed mariek kata mofuwo, to obiro kawo gimoro amora mane aloso gi lucha. Ma bende ne ayudo ni onge tiende. 20 Omiyo chunya nochako hum nono kuom tije duto mane asenyagorago e bwo wangʼ chiengʼ. 21 Nimar dhano nyalo tiyo tije gi rieko, gi ngʼeyo kod lony mar tich, to bangʼe nyaka owe gik moko duto ma en godo ne ngʼato nono mane ok otiyo tijego. Ma bende onge tiende kendo en hawi marach miwuoro. 22 En angʼo ma ngʼato yudo kuom tije matek motimo e bwo wangʼ chiengʼ? 23 Ndaloge duto mag tich en lit gi kuyo; kata mana gotieno pache onge gi kwe. Ma bende ne ayudo ni onge tiende.

24 Onge gima ber ma dhano nyalo timo moloyo chiemo kod metho mi oyud mor e tije. Ma bende, aneno ni oa mana e lwet Nyasaye. 25 Nikech ka ok en Nyasaye, to en ngʼa manyalo chiemo kendo yudo mor? 26 Ngʼatno ma Nyasaye morgo, omiyo rieko, ngʼeyo kod mor, to jaricho omiyo tich mar choko kendo kano mwandu mondo omi ngʼatno ma Nyasaye morgo. Ma bende ne ayudo ni onge tiende, mana ka ngʼama lawo bangʼ yamo.

<- Eklesiastes 1 Eklesiastes 3 ->