Daebafo Mata Beuk 7

Manetualain kee-dede nala hataholi lifun natun esa haa hulu haa (144.000)

1 Basa ndia, boe ma au ita Manetualain atan haa leme nusa-sodak mai. Ala lambadeik lai daebafok buꞌun haa sala fo ala lakalee ani. De ani ta bisa nafumbu nai tasi dale, nai madak lain, ma ta bisa nafumbu ai la.[~1~] 2 Manetualain fee sala koasa so, fo tao lakalulutu madak lain ma tasi. Boe ma au ita ata feꞌek esa neme nusa-sodak mai. Ata ndia neme ledo sasadun mai. Ana neni kekee-dededek neme Manetualain mai, fo mana masoda nakandondoo henin. Boe ma nanggou natingga nafada ata nusa-sodak kahaa kala sila, nae, 3 “Mahani dei! Boso tao makalulutu madak lain do, tasi do, ai la. Mahani losa ai kee-dede basa Manetualain hataholi nadedenun nai daebafok oda-mata nala.”[~2~]

4 Boe ma, lafada au, lae, ata nusa-soda kala ndia kee-dede lala Manetualain hataholi nala so. Sila dedesi nala, hataholi lifun natun esa haa hulu haa, fo leme basa leo Israel asa. Na ndia:

5 neme leo Yahuda, hambu hataholi lifun sanahulu dua;

leo Ruben, hambu hataholi lifun sanahulu dua;

leo Gad, hataholi lifun sanahulu dua;

6 leo Aser, hataholi lifun sanahulu dua;

leo Naftali, hataholi lifun sanahulu dua;

leo Manase, hataholi lifun sanahulu dua;

7 leo Simeon, hataholi lifun sanahulu dua;

leo Lewi, hataholi lifun sanahulu dua;

leo Isaskar, hataholi lifun sanahulu dua;

8 leo Sibulon, hataholi lifun sanahulu dua;

leo Yusuf, hataholi lifun sanahulu dua;

ma neme leo Benyamin, hataholi lifun sanahulu dua.

Hataholi malalao kala koa-kio Manetualain no Biꞌilombo Ana

9 Basa boe ma, au ita hataholi makadoto kala, losa ta bisa hingga nala sila basa sala. Ala mai leme basa leo la, basa hataholi nusa kala, basa dedeꞌa-kokola kala, ma basa nusa kala nai daebafok ia. Basa sala lakabubua lasale Ndia fo mana nanggatuuk nai kadela mana palenda ndia, ma Biꞌilombo Ana. Ala pake badu fulak ma toꞌu palm dook. 10 Boe ma ala soꞌuk koa-kiok noꞌu, lae,

“Ai koa-kio neu ai Manetualain,

fo mana nanggatuuk nai kadela mana palenda ia.

Ai boe oo, soꞌu dema-demak Biꞌilombo Ana ia!

Sila ia, fee masodak neu ai.

Sila ia, soi dala sodak soaneu ai.”

11 Basa hataholi makadoto kala kokolak lateꞌe leondia, boe ma Manetualain ata nala makadotok leme nusa-sodak mai sendek lunggulanggak losa mata-idu nala deta dae, lasale kadela mana palenda inahuuk ndia. Malangga kadua hulu haa kala sila, ma banda kahaa kala, ala tao leondiak boe. Sila basa sala lakaluku-lakatele neu Manetualain, 12 ma ala soda lae,

“Tetebes! Tetebes ndia!

Ai boe oo, koa-kio neu Manetualain!

Ai soꞌu dema-demak Lamatuak naden boe!

Ndia duduꞌan ndia, ndaan nalan seli.

Ndia koasan ndia, inahuun seli.

Ndia balakain ndia, ana seli.

Ai moke makasi neu Manetualain makandondoo henin.

Ai fee hada-holomata neu Manetualain ta no namaketuk.

Tetebes ndia!”

13 Ala koa-kio basa leondia, boe ma esa neme malangga kadua hulu haa kala sila, natane au, nae, “Hataholi noꞌu kala mana pake badu fula kala ia, o malela kasa do? Sila ndia leme bee mai?”

14 Tehuu au ataa, ae, “Ta ama. Au ta alelak see sila. Ama bubuluk dai lena.”

Boe ma ana nafada au, nae, “Sila ndia, hataholi la fo kalua leme doidoso inahuuk mai.

Sila ndia, hataholi fo mana pake Biꞌilombo Ana daan ndia,

fo safe sila baloꞌa nala,

ma tao fula malalaok sila badu nala.[~3~]

15 Huu ndia, de ala lambadeik nai Manetualain kadela mana palendan matan.

Ala ono-lau Manetualain leledo-leꞌodaen nai Ndia Uma Huhule-haladoin.

Manetualain sama-sama no sila nakandondoo henin.

Manetualain nanea sala nakandondoo henin.

16 Dei fo sila ta lameda ndoe so bali.

Dei fo sila ta lameda maa mada so bali.

Dei fo sila ta lameda ledo haa sala so bali.

Dei fo sila lou nala ta kasimboto laꞌe ledo matobin so bali.[~4~]

17 Biꞌilombo Ana mana dekak no kadela mana palenda ndia,

dei fo Ana dadik sila manahoon.

Dei fo Ana hoo neni sala,

leu linu nai oe matak fo maneni masodak.

Dei fo Manetualain boe, koka heni sila doidoso nala,

fo ta lamatani so bali.”[~5~]

<- Daebafo Mata Beuk 6 Daebafo Mata Beuk 8 ->