Link to home pageLanguagesLink to all Bible versions on this site
13
Susue-lalaik tetebes

1 Leo au bisa kokolak unik dedeꞌa mata-matak, fo dedeꞌa hataholik do, dedeꞌak neme Lamatuak ata nusa-sodan do, tehuu au taa aena susue-lalaik fa boe, na ndia nanalan hata? Au kokolang ndia, kada louk, sama leo meko fo kada nalii-nalii leo tong louk fo kada nalii tong-tang, tong-tang. 2 Leo, au aena babaꞌek fo afada Lamatuak hehelun neu Ndia hataholi nala, ma, au bubuluk basa bui kala, ma au alelak basa dedeꞌa kala fo hataholi malela kala bubuluk, ma, au namaheheleng neu Lamatuak matea losa au bisa lali heni lete kala, tehuu au taa aena susuek fa boe, na, ndia sosoan hata? Au tataong ndia, sosoan taa fa boe.[a] 3 Mete ma au seꞌo heni basa au hata nggala, fo basa na pake basa doi nala, fo fee hataholi kadiꞌi-taidae kala laꞌa, do fee au aong dadik neu tunu-hotuk,[~2~] tehuu au taa aena susuek fa boe, na, ndia sosoan hata? Au taa aena netes fo sosoꞌuk aok boe. Huu, kada sosoa taak ndia! Nanalan taa.

4 Huu, susuek ndia, dale malole.
Susuek ndia, nggaleloak.
Susuek ndia taa holo.
Susuek ndia, taa sosoꞌu aok.
Susuek ndia, taa koao.
5 Susuek ndia taa balakaik.
Susuek ndia, taa nau mesa kana senggi.
Susuek ndia, taa lofoanak luli.
Susuek ndia, taa nambeda dalek.
6 Susuek ndia, namahoko no hata fo tetebes,
ma taa nahiik dedeꞌak fo mana benu selik.
7 Susuek ndia, nakatataka babalak.
Susuek ndia, namahele nakandoo.
Susuek ndia, namahena nakandoo.
Susuek ndia, nahele nakandoo.
8 Susuek taa hahae nalelak.
Tehuu hata fo Lamatuak mana kokola nala lafadak ndia, doo-doo na, taa paluu so bali. Ma mete ma hataholi kokolak nenik dedeꞌak neme Lamatuak Dulan mai, doo-doo boe na, taa paluu so bali. Ma hata fo hataholi malela kala bubuluk ndia, doo-doo boe na, sosoan taa so bali. 9 Hatematak ia, ita bubuluk kada faak. Mete ma ita dadik teu Lamatuak mana kokolan, na, kada ita tafada dedeꞌak fo bei ta matetuk. 10 Tehuu losa ndia fain, na, dei fo basan dadi latetu. Faik ndia, dedeꞌa kala bei ta matetuk boe, ma, sosoan taa so bali.

11 Conto leoiak: faik fo au bei kadiꞌi anang, au akokola sama leo kakana ana kala lateme lakokola. Au boe oo duduꞌa sama leo kakana anak lateme duduꞌa. Tehuu hatematak ia, au dadi inahuuk so. Huu ndia, de au taa heo-hilu sama leo kakana kadiꞌik so bali.

12 Conto feꞌek bali: hatematak ia, ita bisa tita fa, tehuu bei ta manggaledok, sama leo ita pake titilo manggenggeok. Tehuu, doo-doo dei fo basan dadik manggaledok. Ita bisa titan sama leo nai ita mata nala. Hatematak ia au bubuluk kada faak. Tehuu doo-doo, dei fo au bisa bubuluk basa-basan, sama leo Manetualain bubuluk basa-basan laꞌeneu au ao-inang.

13 De, hatematak ia, hambu dedeꞌak telu fo ita musi taon, fo nahele nakandoo. Na ndia:

ita musi tamahele takandoo teu Lamatuak;
ita musi tamahena takandoo, tae, Ana heti basan dadik malole;
ma ita musi tasueao takandoo.
Neme dedeꞌa katelu kala ia, na, kasosoak nalan seli, fo ndia, susuek. Huu, susuek malolen lena heni neme basan mai.

<- 1 Korintus 121 Korintus 14 ->