49
Sahou Batanau Ta Jekop
1 Ano badeh Jekop luhi nadun oro mari ame ano i tiye, “Ado mari kawudi jo, ya jo kasehek sahou ki tado ta sasah kameh asahan tado na len hamon kameh eme:
2 “Ado nadu Isra-el mari kame le se kanuhun tama ado.
3 “Ruben, ou badeh kadok tek, ma ou badeh boto-on tek
Ma ou badeh kadok tek ou asahan mwena ma ou uni handru ta boto-on.
Ou boto-on labai ja ta naduk mwan mari ma ou le ai.
4 Ou kameh budon tam bado rasi bwe i buku none wadah atohou, arile i dah kameh boto-on tam kameh ano,
Tasah ou mene babeleben sau ta udu tamam ari bwe, eme ou ala amadin iy.
5 “Ya Simiyon ah Lebi badeh nadu tine ah.
Ah badeh sahou ta-ah nyarahan ta amwekes bahun.
6 Jo winiyan bawek hawe ah ta sahou kamu ta ah bwe.
Ma jo winiyan bawek hawe ah na len ta asehek sahou bwe.
Eme na losen ta-ah ma i dah kameh ah kameh atokos kati iri katin haka hawe amundroh lau leleyah.
7 Jo batanau ah ka-i ai, tasah losen ta-ah badeh ndra-in handru
Labai handru i buku siyer atohou eme i doh badeh ndra-in.
Ah kameh winiyan bakohok ari munyak bwe, ma ah kameh aseker bolo munyak mari badu Isra-el dah.
Ma iy ari i rasi labai ya iy ari iu i rasi labai ta lau badu Isra-el.
8 “Juda, ou kameh nadu tinem oro kameh atudun ou.
Tasah ou ateu bale lau ta amwekes bahun ewek tam.
Nadu tinem oro kameh kandru oro kameh aluh i andri tam.
9 Juda, ou badeh boto-on i buku none katin haka layon;
Ou adai iri lau ano, ou ame hamon ame ndrahunem ja, ame manyah ma ales boham hawe katim,
Ari lau winiyan balisiy ou bwe.
10 Juda, ou kameh kandro ta kabin kameh winiyan ba-au tam bwe,
Ma lundriyem oro kameh asahan kabin le ai,
Winiya le ndramak salin le barasahan.
Iri kon munyak rakon rakon buruwen kameh atiye lakou i tam,
Ma iri kameh aluh kandru i andri i nyara kalem ta anuhun sahou tiri i tam.
11 Ou kameh aseu donki kasen tam badeh i ta bada malou wa-in mwasin, ta bada wa-in seselek handru udu ta aliy.
Ma ou kameh sikine awin tam na ndraye wa-in saraman.
12 Madam badeh asaram i buku none wa-in le.
Ma lihim badeh belen i buku none ma-o sur belen.
13 “Sebulun kameh manyah tan kameh udu babi mirihik ta ndras.
Madasu tan badeh mwasin tiri ndron gwa.
Ya kobek tan badeh ili isos kon Sidon.
14 “Isakar badeh boto-on labai ja ta donki.
Iy amadin ndrokowa lakou ta ndrahu manyah badeh udu bwele-e donki.
15 Arile iy badeh anyolom ndrahu manyah badeh mwasin labai, ma anyolom munyak badeh mwasin,
Eme badeh iy aseken ta amwekes lahou,
Eme ma iy akor ta ato-ou iri lakou.
16 “Dan kameh asahan ndramak ta anuhun sahou tiri lau tan, i buku none iri boho kamen ra-em ra-em badu Isra-el.
17 Dan kameh asahan i buku none mwak udu ka-u san, ta atoh kati iri katin haka aloh hos,
Ma ndramak manyah udu bwele-en kameh i bwak i le konan i andri.
18 “Laban, jo badeh abe-en ou ta aseben tam.
19 “Gat kameh iri lau ta bahana kameh atohou a la-un arile iy kameh tikahei iri au.
20 “Munyak ta Aser kameh ateh ta nyamon mwasin,
Ma na nyamon tan le doh kameh iy edeu i na kabin.
21 “Naptali kameh i buku none katin haka aloh diya,
Iy badeh konen ili labai ma iy asehek sahou mwasin ma iy kameh sakaliye leleyah ili eme.
22 “Josep kameh i buku none bada malou wa-in, seselek ka-u gwa.
Eme badan badeh seselek i loken bada kabwek.
23 Iri lau ta amwekes budon ndra-in i badan kameh ame amwekes bahun boto-on labai i tan, ma atikah iy na bonara hawe nyah,
24 Arile bonara tan badeh boto-on labai,
Ma iy badeh bohan boto-on labai,
I doh badeh na boto-on ta mine Kindrei ta Isra-el,
Ma na boto-on ta ndramak ta atondrok iri katin haka, iy bek ta Isra-el ta winiyan batokos bwe.
25 I dah badeh na Kindrei ta tamam le aseben ou,
Ma i dah kameh Kindrei tinan le kameh atehei minen udu la-um, na nyosowan tan badu kandrah
Ma na nyosowan ta gwa waru badu baha munyak,
Ma na nyosowan tiri bulumakau hawe tiri nah,
26 Ma nyosowan ta tamam badeh sakalawi nyosowan ta kalom hawe kanyeu,
Ma sakalawi nyosowan tiri mandrei kede-eh,
Ma sakalawi nyosowan ta munyak mwasin badu ta buli ndrondro-ou kudu le buku doh, badeh kiroh keme la-u Josep,
Tasah iy badeh udu mwena ta nadu tinen oro mari.
27 “Benjamin badeh i buku none ari mwi ndriliu,
Na mandraben hawe na beyeh kameh iy abuyeh nyamon,
Iy idiy ano iy aimon ma iy akohok rayah.”
28 Oro ma ronoh la-uh doh badeh asahan boho kamen ma ronoh la-uh badu Isra-el. Eme i dah nyosowan ta tama oro edeu i la-u oro ari ari in hamon ta kandriyen toro.
Jekop Imek Ma A-eh Iy
29 Ano Jekop tiye sahou batanau i ta nadun oro, “Jo kameh iu i hawe tama oro ai, eme ado badeh katehei jo ki munu lek udu bilin ta Epron badu Hita. 30 Munu bek udu kon Makpelah, mirihik ta Mamre udu Kenan, mene Abraham sihinei ta Epron badu Hita i ndrahu lek ta ndramak imek ma hawe bilin mari. 31 Ndrahune Abraham uru udun Sara, ndrahu Aisik uru udun Rebeka, ma jo mene ihiy Liya udu aliy. 32 Munu bek doh udu aliy ma bilin badeh mene ndrasihinei badu tiri Hita.”
33 Ano Jekop asehek sahou ta batanau i ta nadun oro ano le badeh, iy suri katin ma luka i bada sau ma aden taku ma iy imek iu i hawe iri lau tan.
<- Jenesis 48Jenesis 50 ->