Nan Ikadwa ay Solat Pablo isnan iTesalonica

Nan Makwani Maipoon isnan Maikadwa ay Solat Pablo isnan iTesalonica

Nan mamati id Tesalonica et cha mangawngaw nan semekcha tay ad-icha maawatan ay khawis nan maisos-olo ay mangwanin sa kasin omali si Cristo. Isonga insolat Pablo nan naay maikadwa ay solatna isnan iTesalonica tatno ipaawatna ay faken tet-ewa nan naibfakha ay apchas et inmali si Jesus. Kanana en egay kayet inmat tay isnan sisya ay ad-ina omaliyan et masapol ay omam-amed nan ngaag ay angnen nan takho khapo isnan mamatiyancha isnan mangap-apos ken Cristo. Finagfag-ana chaicha ta itot-oloycha koma ay mangipafifikas isnan pammaticha ken Cristo olay mo mapap-alikhat cha. Infakhana akhes ay masapol ay enchono cha is ikatakhocha kag nan inikkan cha Pablo ya nan iib-ana issan makitetey-ancha ken chaicha. Ya infakhana ta eestencha ay cha mangangnen isnan khawis.

Nan Linaona

Nan lapon si solat 1:1-2

Nan nangichayawana ken chaicha khapo isnan kinagkhawischa 1:3-12

Tokhon maipoon isnan omaliyan kasin Cristo 2:1-17

Tokhon maipoon isnan okhalin nan mamati 3:1-15

Nan anongos nan solat 3:16-18

3 Lebfengna'y kad-in enyaman kami ken Apo Dios khapo ken chakayo ay iib-ami. Siya chi nan omno ay angnenmi, tay fomifikas nan pammatiyo ya nan layadyo am-in isnan ib-ayo. 4 Tay siya chi ichayechayewmi chakayo isnan am-in ay kaam-amongan nan mamati ken Apo Dios, tay olay mo chad-ama ay kholaen ya palikhatencha chakayo, ad-i enfab-aliw nan pammati ya nan anosyo. 5 Siya na nan mangipaila ay nalenteg nan angnen Apo Dios ay en-okom. Tay nan pangkhepna isnan mapalikhatanyo midkakay isnan en-ap-apowana et isakhanana chakayo ay maikali ay maitapi ischi. 6 Nalenteg tet-ewa si Apo Dios, tay chosaena ay mangipalikhat isnan cheycha'y mangipap-alikhat ken chakayo, 7 ya am-in tako ay maipap-alikhat, et palin-awaena. Siya nan at angnena isnan omaliyan Apo Jesus ay kag enfidfichang ay apey ay malpo id chaya, ay mangifofoweg isnan makabfalin ay anghelesna.[a] 8 Sa na't chosaen nan mangad-i ken Apo Dios ya nan cheycha'y ad-i mangafolot isnan Khawis ay Chamag maipoon ken Apo tako ay Jesus. 9 Et siya na nan chosacha, at selaeg cha ay madchongaw is eng-engkhana, tay maipawa cha isnan kawad Apo Jesus sa cha't maisisiyan isnan langlang nan kamabfalina. 10 Siya chi nan omat isnan akhew ay omaliyana, ay machad-ayawana isnan takhona, ya mataalan nan am-in ay mamati isnan mangil-ancha ken siya. Maitapi kayo ken chaicha, tay pinatiyo nan nanistikhowanmi maipoon ken siya. 11 Tay siya chi kad-in ilowalowanmi chakayo ta si Apo Dios, ifilangna chakayo ay maikali isnan fiyag ay nangayakhana ken chakayo.[b] Ya ta isnan kamabfalina, at maangnen am-in nan khawis ay pangkhepyo ya chonoyo maigkhapo isnan pammatiyo. 12 Mo siya chi nan maangnen at machad-ayaw nan ngachan Jesus ay Apo tako maichalan ken chakayo, ya machad-ayaw kayo akhes khapo ken siya. Maangnen am-in chana khapo isnan fachang nan Dios tako ya si Apo Jesu Cristo.