Rom 15

Dalar nangan la ning bel la tur rakrakai ana tortorot

1 Dala ning dala tur rakrakai, i wakak ning dalar nangan la ning bel la tur rakrakai ana tortorot. Pa gong dala nuk pas dala ka. 2 Dala rop taktakai dalar nuk pas otleng na halalindala, pa dalar tol a ututnala ning ir nangan la sur ir arakrakai anunla tortorot. 3 Anasa e Karisito otleng, bel i nuk pas i ot, larning di ka tumus tari ting na Buk Tabu mange, “God, a laulau a warwara ning di atongi hom, i akadik iau otleng.” Buk Song 69:9

4 Anasa a warwarala rop ning di ka tumus tari nating ting na Buk Tabu, di tumus tari sur ir asaer dala, sur dalar tur rakrakai ana nundala tortorot, pa ir nangan dala otleng sur dalar harnanai ana tortorot sur a utna ning e God ir toli lamur.

5 A nunung mang e God ot, ning i sira arakrakai anundala tortorot, pa i sira nangan dala, ir dat taum mulo sur ir takai ka a nuknukimulo, ning mulo mur e Karisito Iesu. 6 A nunung larning, sur ir takai ka a balamulo pa elngemulo sur mulo taum mulor atong leklek pas e God, a Taman anundala Leklek e Iesu Karisito.

E Karisito i hanot otleng sur a taraila ning bel a tarai Israel

7 I maining mulor gas artalai pas mulo, arlar ning e Karisito i gas pas mulo, sur mulor atong leklek tetek e God. 8 A atongi ta mulo mange, e Karisito i hanot arlar ana tena titol anuna tarai Juda, sur ir tolsot pas a lelela ane God ning i tol tari tetek na tumtubunla. Ning i toli larning i asangani mang a warwara ane God i momol. 9 I hanot otleng sur a tarai ning bel a tarai Israel lar atong leklek pas e God ana nuna marmaris. Larning di ka tumus tari ting na Buk Tabu mange,

“I maining ar atong leklek pas u

napir a tarai ning bel a tarai Israel,

pa ar saksak na atong leklek tetek u.” 2 Sam 22:50

10 Pa di ka tumus tari otleng mange,

“Mulo a tarai ning bel a tarai Israel,

mulor gasgas taum ana tarai ane God.” Lo 32:43

11 Pa di ka tumus tari otleng mange,

“Mulo a tarai rop ning bel a tarai Israel,

mulor atong leklek pas a Leklek,

mulo a kaba taraila rop mulor saksak na atong leklek pasi.” Buk Song 117:1

12 E Aisaia otleng i warwara na propet o e Karisito mange,

“Takai ir hanot miting na kaba tarai e Jesi[a] arlar ana sibul ning i gomo miting na wakir a rakai.

Ir king pa ir nigon a tarai miting na matanitula,

pa a tarai ning bel a tarai Juda lar tortorot onoi,

pa lar harnanai ana tortorot sur a wakakna ning ir toli.” Ais 11:10

13 Pa nunung tetek e God, esaning dala harnanai suri ana tortorot sur a wakakna ning ir toli. A nunung sur ir abukus mulo ana tnan gasgas pa a bal molmol, ning mulo tortorot onoi. Pa ana rakrakai ana Talngan Tabu ot, mulor harnanai ana tnan tortorot sur a wakakna ning e God ir toli lamur.

E Pol i warwara ana nuna titol

14 Na tastasikla, a tasmani ot mang mulo bukus ana wakak a toltol pa a tastasim, pa mulo tolsot pasi sur mulor asaer artalai mulo. 15 Ika, te na pas ne a warwara kol ana dingla na ututna, sur mulor nuknuk ulak onoi. A tumtumus tetek mulo, anasa ana nuna marmaris, e God i aslang pas iau, 16 sur ar tena titol ane Karisito Iesu tetek a tarai ning bel na tarai Juda. A arlar ana tena artabar tetek e God, ning a warawai ana Wakak a Warwara ane God, sur a tarai ning bel na tarai Juda la anuka artabar tetek e God ning ir gas onoi. Pa a Talngan Tabu ka atotoh tar la.

17 O e Karisito Iesu, a gas kol ana nuka titol tetek e God. 18 Bel a mang sur ar warwara ana ta utna masik. A mang sur ar warwara ka ana titol ning e Karisito ka tol tari ana kuk, ning a ben a taraila ning bel a tarai Juda sur lar longor tetek e God. La longor teteki anasa ana ututnala ning a atongi pa a toli na arpotor tanla. 19 La oroi a rakrakai ana akinalangla pa a ututnala na kulkulan ning a toli ana rakrakai a Talngan Tabu. Manglarning misaot e Jerusalem tuk to e Ilirikum ia ka warawai rop pas tingia ana Wakak a Warwara ane Karisito. 20 Ana kamkama nuka titol tetek e Karisito tuk onone, anuka tnan nuknuk sur ar warawai ana Wakak a Warwara ting na hananuala ning bel la tasman e Karisito, sur gong a tol a rumai saot na kamkam a rumai ning tik ka atur tari. 21 Larning di ka tumus tari ting na Buk Tabu mange,

“La ning belot di atai la onoi, lar oroi,

pa la ning belot la longori, lar tasmani.” Ais 52:15

22 A tohi sur ar han tetek mulo, ika a molot ana titol na warawai ting na hananuala. I a kamkamna ning belot a han tetek mulo.

E Pol i mang sur ir han utumo e Rom

23 Ika, onone anuka titol ka rop ana paparla ne. Ka galis a rau ana nuka tnan nuknuk sur ar oroi mulo. 24 Pa ning ar han utumo e Spen, a nuki mang ar kes siklik pas napirimulo pa dalar gas taum pas. Lamur ar kamtur ulak sur ar han utumo e Spen. Pa mang sur mulor nangan iau ana nuka tinan utumo.

25 Ika onone, ar han kaba usaot e Jerusalem sur ar nangan a tarai ane God tisaot. 26 Na tena tortorot to na naur a papar Makedonia pa e Akaia la gas sur lar minggen taum a mani, sur lar nangan a tarai ane God ning la kapan saot e Jerusalem. 27 Momol, la nuki mang i wakak ning lar toli larning. Pa i tostos otleng ning lar keles tar na tarai Juda, anasa na tarai Juda la ka nangan tar la, sur la otleng lar kibas a utna na ingun ning e God i angis la ono, ning nating ana tarai Juda ka. Pa i wakak sur la male lar angis na tarai Juda ana mani. 28 Pa ning ia ka arop tar anuka titol pa ia ka saran tar a artabar ne tetek a tarai ane God saot e Jerusalem, ar han utumo e Spen. Ana nuk a tinan utumo, ar geren nigon tar mulo. 29 Pa a tasmani mang ning ar hanot tetek mulo, ar bukus ana angangis ning e Karisito ka saran tari tak, sur ir nangan mulo.

30 Na tastasikla, ana risan a Leklek e Iesu Karisito pa ana marmaris anuna Talngan Tabu, a nunung mulo sur mulor tur taum hok ana mamahatla, ning mulo nunung tetek e God sur iau. 31 Mulor nunung e God sur ir alaun iau kusun a tarai ning bel la tortorot, ning saot na papar Judia. Pa mulor nunung otleng sur a tarai ane God saot e Jerusalem lar gas pas anuka titol na artabar tetek la. 32 Ning a nuknukna e God ar hanot tetek mulo ana gasgas, par manah taum o mulo sur ar kibas ulak pas a rakrakai.

33 E God, esaning a kama bal molmol, ir kes taum o mulo rop. Amen.

<- Rom 14 Rom 16 ->