49
1 [Memoria Josiæ in compositionem odoris facta opus pigmentarii.[a] 2 In omni ore quasi mel indulcabitur ejus memoria, et ut musica in convivio vini. 3 Ipse est directus divinitus in pœnitentiam gentis, et tulit abominationes impietatis. 4 Et gubernavit ad Dominum cor ipsius, et in diebus peccatorum corroboravit pietatem.] 5 [Præter David et Ezechiam et Josiam, omnes peccatum commiserunt:[b] 6 nam reliquerunt legem Altissimi reges Juda, et contempserunt timorem Dei. 7 Dederunt enim regnum suum aliis, et gloriam suam alienigenæ genti. 8 Incenderunt electam sanctitatis civitatem, et desertas fecerunt vias ipsius in manu Jeremiæ.[c] 9 Nam male tractaverunt illum qui a ventre matris consecratus est propheta, evertere, et eruere, et perdere, et iterum ædificare, et renovare: 10 Ezechiel, qui vidit conspectum gloriæ quam ostendit illi in curru cherubim.[d] 11 Nam commemoratus est inimicorum in imbre, benefacere illis qui ostenderunt rectas vias.[e] 12 Et duodecim prophetarum ossa pullulent de loco suo: nam corroboraverunt Jacob, et redemerunt se in fide virtutis.] 13 [Quomodo amplificemus Zorobabel? nam et ipse quasi signum in dextera manu:[f] 14 sic et Jesum filium Josedec, qui in diebus suis ædificaverunt domum, et exaltaverunt templum sanctum Domino, paratum in gloriam sempiternam.[g] 15 Et Nehemias in memoriam multi temporis, qui erexit nobis muros eversos, et stare fecit portas et seras, qui erexit domos nostras.][h] 16 [Nemo natus est in terra qualis Henoch, nam et ipse receptus est a terra:[i] 17 neque ut Joseph, qui natus est homo princeps fratrum, firmamentum gentis, rector fratrum, stabilimentum populi:[j] 18 et ossa ipsius visitata sunt, et post mortem prophetaverunt.[k] 19 Seth et Sem apud homines gloriam adepti sunt, et super omnem animam in origine Adam.][l]
<- IESU FILII SIRACH 48IESU FILII SIRACH 50 ->
-
a Memoria Josiæ. RAB. Memoria Josiæ regis, etc., usque ad ipse zelo Dei mundat terram Judæ et Jerusalem ab omnibus abominationibus, qui ait: Zelus domus tuæ comedit me.
b Præter David, et Ezechiam, et Josiam, etc. Hi tres comparatione aliorum non dicuntur peccasse. Quod enim peccaverunt, condigna pœnitentia deleverunt, et devotione et pietate Deo placuerunt.
c Incenderunt electa civitatem sanctitatis, etc. ID. Quidam hunc locum in persona Christi intelligunt, etc., usque ad his autem destructis, ædificavit Ecclesiam Dei.
d Ezechiel qui vidit, etc. ID. Mystice, Ezechiel, etc., usque ad et pœnitentibus prædixisse remedia.
e In imbre. Significat quod prædicaverit super peccatores venturam esse pluviam vindictæ, et per viam mandatorum Dei gradientibus promiserit consolationem misericordiæ.
f Nam et ipse, etc. Quia Christum signat, qui est imago Dei: ut quicunque crediderit in Deum, hic quasi annulo signetur.
g Et Jesum filium Josedec. Quia per gratiam Jesu Christi, qui est rex noster et sacerdos, post captivitatem diabolicæ oppressionis, reædificatur Ecclesia.
h Nehemias. RAB. Consolator Deus, vel consolatus a Domino, etc., usque ad qui ædificat civitatem Dei, id est Ecclesiam, et consolatur mœrentes.
i Nemo, etc. Enoch, dedicatio. Hic Christum significat, qui ædificavit et consecravit Ecclesiam sanguine suo; qui sine peccato venit in mundum, et cum gloria suscepturus est in cœlum.
j Ut Joseph. Joseph, sicut Jacob pater ejus, terram promissionis desiderabat, Ægyptum detestabatur; instruens nos ut desideremus terram viventium, ut quiescamus in pace.
k Et ossa ipsius visitata sunt. RAB. Significat quod Joseph, etc., usque ad et sepelierunt in Sichem, quæ est Neapolis, urbs Samaritanorum.
l Seth et Sem, etc. Seth filius Adam, et Sem primogenitus Nœ, tam fide quam moribus hominibus sui temporis prælati sunt; in quibus Christus significatur, qui Deus et homo est.