Link to home pageLanguagesLink to all Bible versions on this site
2
Sɨnam Izpulne amtu

1 Sun Pentacostés pishta payu taizka, wan Cristora piantuzne mazakwain wanmakkarɨt. 2 Azain chiwazha tɨnta az kit chiyuras taizta. Tɨnta inkwakanain pat kit wan yal ayukmal napta, awa uzkularɨtkin. 3 Suasne uspane tɨ ĩn aiztukanain izara. Sun ĩn paimpa paimpain naiyarɨt. 4 Sun akwa Sɨnam Izpulne wan awaruza piznara. Suasne uspane mamaz kamtachi pit kwinta kiamɨzta. Izpulne usparuza paraninnara.

5 Sun payura mamaz suras Judío awaruzne Jerusalén pɨpulura pianara, Diosta wakpuj wain kit Diosta paikwan. Uspane wan suras aara. 6 Sun aztu mɨarawane, akkwan awane wanmakkat kit iztaspaarɨt. Ɨnintaruz kwinta kiamtuasmin, pakaish pakaish paiña pitmin mɨara. 7 Uspane ishkuat kit iztaspaat kit usparuzpain ka mɨmaara:

—¿An paramtuzne Galilea suras awa ki? 8 ¿Mizamakai? Mane auruzpain usparuza mɨpuspas. Uspane au pit pashpas kawira aizpa paramtu. 9 Apane awa purai:
Partia suraskas Media suraskas
Elam suraskas Mesopotamia suraskas
Judea suraskas Capadocia suraskas
Ponto suraskas Asia suraskas
10 Frigia suraskas Panfilia suraskas
Egipto suraskas Libia suraskas kashara Cirene pɨpulura
Roma pɨpuluras awakas apain pura. 11 Mɨnpazha usparuztas Judío awa azi. Mamaztuzne Judío awa namarɨt.
An awakas Creta suraskas Arabia suraskas purai.
Uspa paraka, aune wan Diospa watsal kal kirɨt aizpa au pitmin mɨpuspas, kizara.

12 Wanne iztaspaat kit chi kizmanamara. Usparuzpain mɨmaamɨzta:

—¿Chima kizshina sunne?

13 Mamaztuzne usparuza sun akwa ishanat kit ka kaizara:

—Uspane chappi kuat kit piarai, kizara.
Pedrone awaruza kaiznara

14 Suasne Pedrone mamaz once ɨnintaruzkasa nil satkun kit tɨnta parat kit ka paiña Judío kwaltuza paranamɨzta: “Na kaiztu aizpa mɨzhain. Judío awaruzkas, wan Jerusalén pɨpulura uztuzkas, nawa wat mɨrain, piankamanapa. 15 Uspane pirachimai, umin minñamtukanain. Mama tɨlawain i. Nueve urain i. 16 Joelne, Dios pit kainammmikane, an ñancha sun kit aizpa ka kaizta:

17 ‘Diosne sun minpa payura kaiztu.
Nane ap Izpul wan awara nail kit mɨlananash.
U painkulkas pashukas nawa kwinta kianazi.
U musitturuzkas u ɨlaparuzkas kainkizpaanazi.
18 Sun minpa payura nane ap Izpul,
ap kiwainmuruza ashamparuzakas ampuruzakas ɨninnat kit mɨlananash.
Uspane nawa kwinta kianazi.
19 Nane kwashpa chiyumal chiwazha watsal kal kinash. Nane uruza an izninnanash, piankamanapa.
Wan pailtɨmtuasmin, nane pilkin aimpikas ĩnkas ishkas izninnanash.
20 Pãnne tɨl parɨnazi.
Palapchane kwanam tɨlkwil aimpikanain namtɨnazi.
An kwiztane an watsal payu taizkane,
au Anpatne paiña kal kimɨznazi.
21 Mɨnpazha Anpatta paikumtune,
usne usparuza watsat mɨlnanazi, ĩnta ɨamanpa.’ ”[~1~]

22 Pedrone sun paiña Judío kwaltuza kaizta: “Israel awa, na kaiztu aizpa mɨrain: Diosne Jesústa, Nazarettas munmikasha nat kit uruza ɨninnara, akkwan tuntu iztasparɨt kal u iztakin kinpa. 23 Diosmin Jesústa uruza chɨhkatchasmin, usne chiwazha kishimtu aizpa an ñancha pian. Suasne une kwail awaruz ussa ɨninnat kit kurishta iru patpian piantaninta. 24 Sunkana Diosne ussa irɨttas kakulninta. Jesúsne irɨtpa izpul ɨmtura nukkulsachi, kajchira sɨptɨtmikakana. 25 Davidkas Jesúspa kwinta kit kit ka kaizta:

‘Nane ap Anpatta na iztukin iztau.
Usne ap makin uz, awa nawa ishkumanpa.
26 Katmizna ap kaijchu watsal ish.
Mane watsal pit pararau ap pitkasa. Katmizna mane nakas Diosta tɨriz kit wat kwaizkulnash.
27 Nune, ap Diosne, ap izpulta irɨttukin kwaimanazi.
Nune nawa, up kiwainmumikasha, pashit kit ap ñara pɨtninmanazi.
28 Nune nawa chiyura num mi kamtara, pailta payu uznapa.
Nune nakasa uz, na wat tuanpa,’[~2~] kizta.

29 Cristora piantuz mintain. Nane uruza Davidpa au irɨt Taittawa, nil kwinta kitpaish. Us irawane, uspane ussa kamara. Us kamkin aukasa kashain tu. 30 David uzasmin, usne Diospa kainammmika azi. Uskas Dios sun kin namta aizpa pianazi. Diosne ussa ka sun kin namta: ‘Up kwalne, Cristo munmikane, sun su sapmɨlnazi, ɨnninna.’[~3~] 31 Sunkanain Davidne Dios kimtu aizpa ñamin piankam kit Cristo irɨttas kakulnazi ka kwinta kinara: ‘Paiña Izpulkas irɨttuz ɨmtura nukkulmanazi. Paiña ñakas pɨtmanazi.’[~4~] 32 Mane aune sunta izat kit uruza ka kizpuspas: ‘Diosne Jesústa irɨttas kakulninta.’ 33 Sunkana Diosne ussa nuninta, us uzkin ɨninna. Paiña papihshne, Diosne, paiña Sɨnam Izpul sun kin namtɨt aizpa Jesústa mɨlara. Jesúsne mamin sun wan izara aizpakas wan mɨara aizpakas uruza izninnara. 34 Chiyura nurachikas, Davidmin Jesúspa ka kaizta:

‘Ap Diosne ap Anpatta kaizta:
Na uzkin uzti, awa nua wat minñanapa.
35 Nane wan awaruza nu ɨnintu aizpakas,
nu kaiztu aizpakas kininnanash.’[~5~]

36 Une, Israel awane, mɨat kit piankamtain. Nane Jesúspa watcha kaiztus. Une Jesústa iru patpian piantaara. Diosne ussa Anpatkas Cristokas munta.”

37 Pedro kaizta aizpa mɨarawane, uspane uspa kaijchura kwail minñat kit Pedrorakas mamaz ɨnintaruzakas mɨmara:

—Ap Israel kwal ¿Chima kianapai?

38 Suasne Pedrone sɨnkanara:

—Kwail kiarɨt aizpa maiztain. Dios iztakin pailtara munnarain, Jesucristora kanpamtuz namanapa, Dios u kwail kiara aizpa mainninnanapa. Suas Diosne paiña Sɨnam Izpul uruza mɨlananazi. 39 Diosne sun kin namnara aizpa uruzakas uspa pashparuzakas mamaz attishtas awaruzakas mɨlananazi. Au Anpatkas au Dioskas wan awa narɨttuzakas akwarɨttuzakas sun mɨlananazi.

40 Sunmin kwinta kinara. Pedrone an akkwan pitkasa kurunnat kit paranat kit kaiznara:

—Diosta paikwarain, uruza watsat mɨlnanapa, sun kwail awakasa naizamanpa.

41 Pedro kaizta aizpa mɨraruzne munna ɨarɨt. Sun payura kutña mil awane, Dios ɨnintamikasha, Cristora piantuzkasa wanmakkara. 42 Sun awaruzne ɨnintaruz kamtanara aizpa mɨamɨz kit sulmin uzat kit Diosta parejuin kwinta kiara. Uspane wanmakkara, usparuzpain kumira nail kit kwan.

Diosta piantuzne wanmaktɨt uzamtu

43 Wan awane iztaspaara, ɨnintaruz iztasparɨt kal kiara akwa. Uspane watsal iztasparɨt kal kiat kit akkwan awara kiwainara, Diosta piankamanapa. 44 Wan Cristora nɨjkulturuzne wanmakkat kit chiwazha mɨj aizpa wanta naiyara. 45 Uspane chiwazha mɨj aizpa paininara, sun pial pailtara we mɨjtuza nailna. 46 Uspane pailta payura Diospa yalta wanmakkara. Usparuzpa wan yalta kumira nail kit kuat kit wat kulara. Uspane usparuza kwinñara. 47 Uspane ka kaizara: “Diosne kwisha wari.” Wan awane Dios pit piantuzpa minñat kit kaizara: “An awane kwisha wari.” Au Anpat Jesús awaruza watsat mɨlnamtuasmin, usne Dios pit piantuza pailta payu wiannara, uspakasa wanmakkanapa.

<- Hechos 1Hechos 3 ->