Ebraio 8

Iesu kada tena tinabar

1 Ma ta nam ra lavur magit da tatike, go ia ra ngala: Kada ta tika na tena tinabar lualua damana, ma i tar ki ta ra lime tuna ra kiki na king kai ra ngala na Luluai arama ra bala na bakut, 2 a tultul ta ra pal i gomgom, ma ta ra pal tabu tuna, nina ba ra Luluai iat i ga vatur ia, ma vakir ra tarai. 3 Tago diat par a lavur tena tinabar, tikatikai, di vaki diat upi diat a tul tar ra vartabar ma ra varporong; kari i topa ia ure go ra tena tinabar lualua ba kana ta magit bula upi na tul tar ia. 4 Ma gala i ki ati ra pia, gala pa na tena tinabar muka, tago ta ra umana tena tinabar dia tar ki upi diat a tul tar ra vartabar da ra tinata na varkurai; 5 go diat, dia torom ta nam ba i da ra malalar i ra lavur magit arama ra bala na bakut, vada God i ga vateten Moses ba i ga vaninara upi na pait ra pal tabu; tago i biti dari: “Una gire, pi una pait ra magit parika, varogop ma ra malalar di ga ve tar ia tam ta ra ul a luana.” 6 Ma go i tar alube pa ra papalum i lia, tago i tar mal tar ra kunubu i lia, nina di tar vatur ia ma ra tinata na varvatading i lia vurakit. 7 Tago gala ra luaina kunubu i ga tar ko vurakit, gala pa da tikan mulai upi ta vauruana. 8 Tago i ga pit diat ma i ga biti dari:

“Gire, ra Luluai i tar biti, ba a umana bungbung diat a pot,

Ba avet a pait ta kalamana kunubu tana ma diat ta ra kuba i Israel ma ra kuba i Iuda;

9 Ma pa na da nam ra kunubu ave tar pait ia ma ra umana tama i diat ta nam ra bung iau ga ben vairop diat ta ra gunan Aigipto;

Tago pa dia ga tur padikat ta kaugu kunubu,

Ma iau ga lingan kan diat, ra Luluai i biti.

10 Ma i dari ra kunubu ba avet a pait ia ma diat ta ra kuba i Israel

Ba i tar par nam ra e, ra Luluai i biti:

Ina poe kaugu lavur vartuluai ta ra nuknuk i diat,

Ma ina tumu diat ta ra bala i diat;

Ma iau kaka kadia God,

Ma diat kaugu tarai;

11 Ma diat dia bartalaina ma diat dia barturana pa dia tovo vargiliane mule diat dari: Una nunure ra Luluai;

Tago diat par diat a nunure iau, diat dia ikilik ma diat dia ngala.

12 Tago ina mari diat ta kadia nirara, ma kadia lavur varpiam ina nuk vue muka.”

13 Ma tago i biti dari: “A kalamana kunubu,” i tar vamaulana ra luaina. Ma ra magit i papait na maulana ma i vailik tana, i maravai ba na panie kakit.

<- Ebraio 7 Ebraio 9 ->