Hebrew Embokena 4

1 Avata God nu namonde kaifa ururari jangutarera, aminge beka gagojuse sisira. Ava sedo, namonde nundae igheghi use irarera! Erama gofedo, numokena ya jangutari ava kosasagheore dae sise, namonde igheghi use irarera. 2 Ainda beká mo: God da Bino Eveva seoro namondeda abuamane ningido ghusera aminga ava, God da Bino Eveva namondekena setero ningido irera. Jo dombu eni iraeri. Avata ne geka ava, dengoroimi nembo nininguseri. Ava sedo, ne aminda sonemba eni jo baeri. Ainda beká mo: ne ningido, jo tumondae useri. 3 O namonde mave tumonderaera amo, God kena ya teredo, dabade jangutari dae erera. Nu namondedae sedo jangutari da vasa a sifo gategusira ava, jo ighagha use eminge saeri:

“Na dubo eko etiri, durumuguse, beka gagojuse eminge siseni,

‘Ne jo namokena foa terovo, namonde dabade jangutae arera.’ ”

Amo jo jangutari da vasa a sifo namondedae sedo gategusira ava, jo ighagha use saeri. God nu anakora saramana iri, utu enda siroretiri nunda saramana dadabusira. Sifo aminda, nunda jangutari da vasa a sifo gategetiri fefetusira, ava irira. Ava sedo, geka bekári: evetu genembo eveva ainda jangutari da vasa a sifo gategetiri irira. 4 Vasa eninda nunda Geka jokáda, God aindae sise, eminge resira:

“God nunda saramana sifo 6 ainda jokáda etiri isambu dadabetiri, sifo 7 aminda, nu jangutusira,”

God da Geka aminge resira. 5 Kotugo, evetu genembo jo tumondae eraera aindae, eminge resira:

“Ne jo namokena foa terovo, namonde dabade jangutae arera,”

aminge resira. 6 God evetu genembo jangutaoro dae sisira. Avata evetu genembo giti God da Bino Eveva niningusera amo, ne jo tumondae edo, God kena jo ya teredo, God de dabade jangutae useri. Avata mendeni amboda sirorusera aimi, ne ya teredo, God de dabade jangutarera.

7 Evetu genembo mendeni da kotari mo: God nu jangutari da sifo sisira amo, nu Moses da ambo jimbi, Joshua nunda sifo aindae sariá sisira. Avata namonde kasama erera, amo jo geka beká iraeri. Ainda tuka mo: Joshua ambiri ainda amboda, God setiri David nu sifo eindae sise gefusira. God numoá tumondaoro dae sedo, sifo goroto emo afigusira. Avori, David anakora jebuga irise, sifo goroto seka afigedo irira, aindae ‘oroko’ sisira. Nunda geka, amo eviri:

“Oroko God nu beka sirurari ningareva amo, erá gogore eove!”

God setiri David aminge gefusira. 8 Avori, Joshua nu giti, evetu genembo unumbe bu jangutari da vasa aminda ya teredo sifo aminda jangutaetera amo, God nu amboda, numokena ya teredo jangutari da geka jo sae aeti. 9 Avata God amboda, jangutari da sifo aindae geka sisira. Ainda beká mo: kau God sifo 6 ainda jokáda saramana etiri dadabetiri, sifo 7 aminda jangutusira aminga ava, God da natofo amboda jangutarera. 10 Kau God nunda saramana dodo jangutusira aminga ava, mave God kena ya terarira amo, nu sifo aminda, nunda saramana dodo jangutarira.

11 Ava sedo, God kena ya tere jangutari dae sedo, namonde fakina beká ava arera. Erama namonde eni God da Geka ningae edo, jangutari da vasa a sifo ava kosasagheore dae sise resena. 12 God da Geka mo, jebuga irira. Geka ainda mendo sighonogori. Aimi gayari, genembo da duboá afigarira. Fisi da uju, nunda kotari, a nu rea dubo jokáda uju eraira a koteraira amo, foa isagha eraira. Amingurureari, God da Geka aimi evetu genembo da dubo jokáda rea irá gheraira, ava ijujeraira. 13 God kena roera jungari eni tefori. Roera isasambu utuda a endada, God kena mo isaghari. Namondeda irari a ari aindae, nune ategi arira.

4:14—5:10 Emboro+ Ya God Afakena Buvari Ava, Iesu Nune Afigusira.

14-15 Namondeda fristi+ iká bekáda Iesu numori. Nu namondeda dara a bouvu ava kasama eraira. Nu aindae sedo namondedae joka eraira. Kau derari namondekena foa gheraira aminga ava, Iesu kena foa ghedo ghusira. Avata Iesu nu jo gofedo, a ari eko eni jo ae usira. Nu teria bekári. Nu vitíra utu darigedo, God da dombuda teredo fefetusira. Ava sedo, namonde fakina beká ava use, tumonde gogoghombarera. 16 Namonde tumo fainghedo, God da anumba vasa sonemba buraera aminda, ya buvarera. Aminda sonemba tafuse iroro, sifo reda sonemba barera, nu sifo daba aminda joka edo, namonde sonembarira.

<- Hebrew Embokena 3 Hebrew Embokena 5 ->