Link to home pageLanguagesLink to all Bible versions on this site
21
Mwet Israel Kutangla Mwet Canaan

1 Ke tokosra lun acn Arad, su oan layen eir in acn Canaan, el lohngak lah mwet Israel elos tuku sun acn Atharim, el som mweunelos ac sruokya kutu selos.[a] 2 Na mwet Israel elos orala sie wulela na ku nu sin LEUM GOD: “Kom fin lela kut in kutangla mwet inge, kut ac kisakunuloswot nu sum[b] oayapa siti selos, ac kut ac fah kunauselosla.” 3 LEUM GOD El lohngolos ac kasrelos kutangla mwet Canaan. Ouinge mwet Israel arulana sukelosla ac siti selos, ac sang inen acn sac Hormah.[c]

Serpent Soko Orekla Ke Bronze

4 Mwet Israel som liki Fineol Hor, ac ut ke inkanek ma som nu ke Meoa Srusra, tuh elos in ut na sisken facl sin mwet Edom. Tusruktu ke elos srak fahsr, mwet uh semutengla[~4~] 5 ac kaskas lain God ac Moses. Elos torkaskas ac fahk, “Efu kom ku uskutme liki acn Egypt kut in tuh misa in acn mwesis se inge, yen wanginna mongo ac kof we? Kut tasak ke mwe mongo koluk inge!”[~5~] 6 Na LEUM GOD El supwala serpent pwasin nu inmasrlon mwet uh, ac mwet Israel puspis ngalnguli ac misa. 7 Ac mwet uh tuku nu yorol Moses ac fahk, “Kut orekma koluk ke kut kaskas lain LEUM GOD ac lain kom. Pre nu sin LEUM GOD Elan usla serpent inge.” Ke ma inge Moses el pre ke mwet uh. 8 Na LEUM GOD El fahk nu sel Moses elan orala soko serpent osra, ac likiya mutun soko sak ah, tuh kutena mwet su ngalnguli fin ngetak nu kac, elos fah moul ac tia misa. 9 Ouinge Moses el orala soko serpent ke bronze ac likiya fin soko sak. Na kutena mwet su ngalnguli, elos ac ngetak nu ke serpent bronze soko ah, ac moul.[~6~]

Liki Fineol Hor Nu Ke Infahlfal Lun Mwet Moab

10 Mwet Israel elos sifil mukuiyak ac tulokunak lohm nuknuk selos in acn Oboth. 11 Toko elos som liki acn sac, ac tulokunak nien aktuktuk selos ke mahnum lun Abarim in acn mwesis kutulap in facl Moab. 12 Na elos sifilpa mukuiyak liki acn we ac aktuktuk ke infahlfal Zered. 13 Elos sifilpa mukuiyak liki acn we ac tuku nu layen epang in Infacl Arnon ac aktuktuk we, ke yen mwesis se su fahla nwe ke facl sin mwet Amor. (Infacl Arnon pa masrol lun facl sin mwet Moab ac mwet Amor.) 14 Pa sis Book In Mweun Lun LEUM GOD sramsramkin “...siti srisrik Waheb ke ipin acn lun Suphah, ac infahlfal uh, ac Infacl Arnon, 15 ac acn oatu ke infahlfal se ma fahla nwe ke siti srisrik Ar, ac suwosang nwe ke masrol lun acn Moab.”

16 Liki acn we elos som na nwe ke sie acn pangpang Lufin Kof, acn se ma LEUM GOD El fahk nu sel Moses, “Usani mwet uh nu sie, ac nga ac fah sang kof nu selos.” 17 In pacl sac mwet Israel uh yuk on soko inge:

“Lufin kof uh, unonak;
Kut ac fah onkakin kom ke soko on.
18 Lufin kof pukpukyak sin leum uh,
Ac sin mwet kol lun mwet uh;
Pukpukyak ke soko scepter lun tokosra,
Oayapa ke sikal lun mwet kol lalos.”
Elos mukuiyak liki yen mwesis nu Mattanah, 19 ac liki acn we elos som na nwe Nahaliel, ac liki acn Nahaliel me nu Bamoth, 20 ac liki acn Bamoth nu infahlfal in acn lun mwet Moab, ye mangon eol Pisgah, su oan ngeta nu fin acn mwesis.
Kutangyukla Tokosra Sihon Ac Tokosra Og
(Deuteronomy 2:26—3:11)

21 Na mwet Israel supwala mwet utuk kas nu sel Sihon, tokosra lun mwet Amor, ac fahk: 22 “Nunak munas, lela nu sesr in fahsr sasla in acn sum. Kut, ac cow natusr, fah tia kuhfla liki inkanek lulap in utyak nu in ima lom ku ima in grape sunom, ac kut ac fah tia nim kof ke lufin kof lowos uh. Kut ac fahsrna fin inkanek lulap ah, nwe ke kut alukela facl sum uh.” 23 Tusruktu Tokosra Sihon el tiana fuhlela mwet Israel in fahla fin acn sel. El orani un mwet mweun lal ac illa som nu Jahaz in acn mwesis, ac mweuni mwet Israel. 24 Tusruktu mwet Israel elos onela mwet puspis sin mwet lokoalok lalos ke mweun sac, ac sruokya acn selos, mutawauk ke Infacl Arnon nwe ke Infacl Jabbok layen epang, aok nwe ke sun masrol lun mwet Ammon uh, mweyen masrol se ingan musaiyukla arulana ku! 25 Na mwet Israel uh kutangla siti nukewa sin mwet Amor, weang Heshbon ac inkul nukewa ma oan apkuran nu we, na elos oakwuki we. 26 Heshbon pa capital siti lal Tokosra Sihon lun mwet Amor, su tuh mweun lain tokosra lun mwet Moab meet, ac eisla acn lal nukewa fahla na nwe Infacl Arnon. 27 Pa oru mwet ma yuk pas uh onkakin mu,

“Fahsru nu Heshbon, siti sel Tokosra Sihon!
Kut kena liye in sifilpa musaiyukyak ac akwoyeyukla.
28 Sie pacl ah, in siti se inge Heshbon,
Un mwet mweun lal Sihon illa oana sie e.
Elos kunausla siti Ar in acn Moab
Ac sukela inging sisken infacl Arnon.[~7~]
29 We nu suwos, mwet Moab!
Kowos su alu nu sin Chemosh,[~8~]
kowos arulana musalla!
God lowos uh oru tuh mukul we uh in mwet kakaing,
Ac mutan we elos mwet sruoh lal Tokosra Sihon lun mwet Amor.
30 Tusruktu fwilin tulik natulos kunausyukla,
Mutawauk Heshbon lac na nwe Dibon,
Liki acn Nashim nwe Nophah, apkuran nu Medeba.”

31 Ouinge mwet Israel oakwuki in acn lun mwet Amor, 32 ac Moses el supwala kutu mwet kalngeyuk nu ke siti Jazer in konauk lah elos ac mweuni fuka acn we. Mwet Israel elos sruokya siti sac wi inkul nukewa ma oan apkuran nu we, ac lusak mwet Amor su muta we.

33 Toko mwet Israel forla ac ut ke inkanek nu Bashan, ac tokosra Og lun Bashan el illa us un mwet mweun lal in mweunelos in acn Edrei. 34 LEUM GOD El fahk nu sel Moses, “Nik kom sangeng sel. Nga ac oru tuh kom in kutanulla, ac mwet lal nukewa ac acn sel. Oru nu sel oana ma kom tuh oru nu sel Sihon, tokosra lun mwet Amor, su leumi acn Heshbon.” 35 Ouinge mwet Israel elos unilya Tokosra Og, ac wen natul ac mwet lal nukewa — wangin mwet painmoulla — na elos oakwuki in acn sel.

<- OEKYUK 20OEKYUK 22 ->